តារាចម្រៀង និងតារាសម្ដែង Jackson Wang បានបង្ហាញពីអារម្មណ៍ពិតរបស់ខ្លួនក្រោយប្រឡូកក្នុងសិល្បៈអស់ជាច្រើន ដែលធ្វើឲ្យអ្នកគាំទ្រមួយចំនួនហាក់មានការព្រួយបារម្ភចំពោះលោក។
ក្នុងបទសម្ភាសន៍ជាមួយទស្សនាវដ្ដី Bazaar លោកបាននិយាយពីអារម្មណ៍របស់លោក ពីអាជីពសិល្បៈរបស់ខ្លួន។ តារាប្រុសរូបនេះ បានលើកឡើងថា៖ លោកបានចំណាយពេលវេលាជាច្រើនធ្វើរឿងដែលគ្មានអត្ថន័យសម្រាប់ជីវិតរបស់លោក។ លោកហាក់មិនដែលមានពេលចាប់អារម្មណ៍ពីរឿងខ្លួនឯង និងដឹងពីអ្វីដែលខ្លួនចង់ធ្វើពិតប្រាកដ។ លោកធ្លាប់ឈឺចាប់ ដូច្នេះហើយទើបលោកសម្រេចចិត្ដផ្អាកសកម្មភាពសិល្បៈមួយរយៈសិន ដើម្បីស្វែងរកខ្លួនឯង។



ជាមួយគ្នាដែរ លោកក៏បានរំឭកដល់មិត្ដភាព ផងដែរ។ លោកបានលើកឡើងថា៖ ដោយសារលោកមានបទពិសោធន៍ច្រើន និងស្ថិតក្នុងពិភពសិល្បៈយូរមកហើយ នៅពេលដែលលោកស្គាល់មនុស្សថ្មីៗ លោកមិនច្បាស់ថា តើលោកកំពុងរាប់អានជាមួយមនុស្សម្នាក់នោះពិតដែរ ឬទេ? លោកពិតជាពិបាកក្នុងការស្វែងរក មិត្ដភាពស្មោះសរ ជាពិសេសមនុស្សដែលវ័យប្រហាក់ប្រហែលលោក។
ទន្ទឹមនេះ ក្រោយពីបទសម្ភាសន៍មួយនេះបានចេញផ្សាយ ធ្វើឲ្យអ្នកគាំទ្រជាច្រើនមានការព្រួយបារម្ភពីលោក ខ្លះក៏ហាក់មានមន្ទិលសង្ស័យថា លោកមានជម្លោះជាមួយសមាជិកក្រុម GOT7 ដែលធ្លាប់ផ្សព្វផ្សាយជាមួយគ្នាកាលពីមុន។ យ៉ាងណាក្ដីជាការឆ្លើយតប លោកបានបញ្ជាក់ថា៖ មិត្ដភាពពិតជាសំខាន់សម្រាប់លោក លោកមានមិត្ដភក្ដិជិតស្និទ្ធតិចតួចបំផុត។



គួរបញ្ជាក់ថា ក្នុងឆ្នាំ ២០២១ Jackson បានប្រកាសចាកចេញពីផលិតកម្ម JYP និងបានបង្កើតក្រុម Hip-Hop ផ្ទាល់ខ្លួន។ លោកចាប់ផ្ដើមវិលត្រឡប់ទៅផ្សព្វផ្សាយ នៅប្រទេសចិន វិញ។ លោកត្រូវបានគេចាត់ទុកជាតារាចិនប្រុសម្នាក់ដែលទទួលបានជោគជ័យខ្លាំងក្នុងទឹកដីប្រទេសកូរ៉េ និងទទួលបានការគាំទ្រយ៉ាងខ្លាំងនៅឯក្រៅប្រទេសផងដែរ។ ក្រឡេកមកមើលប្រជាប្រិយភាពរបស់លោកក្នុងប្រទេសចិន ក៏ហក់ឡើងខ្ពស់ខ្លាំងមិនធម្មតា ក្នុងវិស័យចម្រៀង៕

























Account
Security
Favourite Content