តារាចម្រៀងស្រីហុងកុងល្បី G.E.M បានធ្វើឲ្យមហាជន និងអ្នកគាំទ្រជាច្រើនមានការភ្ញាក់ផ្អើលខ្លាំងក្រោយរូបនាងខុសបច្ចេកទេសរអិលដួលលើឆាកតន្ដ្រីពេលកំពុងច្រៀងក្នុងកម្មវិធីតន្ដ្រីទេសចរណ៍របស់នាងនៅឯ GuangZhou កាលពីថ្ងៃទី ១០ ខែ ធ្នូ ឆ្នាំ ២០២៣។



នាពេលនោះ រូបនាងបានស្លៀករ៉ូបពណ៌សវែងដែលមើលទៅដូចជាឈុតរ៉ូបកូនក្រមុំ រ៉ូបនេះមើលទៅធំ និងវែងជាហេតុធ្វើឲ្យតារាស្រី G.E.M ពិបាកក្នុងការដើរព្រមទាំងទប់លំនឹងរបស់ខ្លួន។ មួយវិញទៀត នាងបានឈរនៅឯទីខ្ពស់លើឆាកតន្ដ្រី។ បើតាមសម្ដីរបស់អ្នកគាំទ្រដែលមានវត្ដមាននៅទីនោះ រូបនាងបានដួលផ្ងាក្រោយមួយទំហឹង ដែលធ្វើឲ្យគ្រប់គ្នាស្រែក និងមានការព្រួយបារម្ភជាខ្លាំងចំពោះតារាស្រី G.E.M។ ជាសំណាងល្អ រូបនាងមិនមានរបួសធ្ងន់ធ្ងរ និងអាចបន្ដច្រៀងយ៉ាងជឿជាក់រហូតដល់ចប់កម្មវិធី។


ការដួលលើឆាកតន្ដ្រីរបស់តារាស្រីវ័យ ៣២ ឆ្នាំរូបនេះក៏បានក្លាយជាប្រធានបទត្រូវគេលើកយកមកពិភាក្សាពាសពេញបណ្ដាញសង្គម Weibo និងការលើកឡើងពីភាពរឹងមាំ អត់ធ្មត់របស់នាងលើឆាកតន្ដ្រី។ នាងត្រូវបានគេសរសើរមិនដាច់ពីមាត់ដោយអាចគ្រប់គ្រងស្ថានការណ៍បានយ៉ាងល្អកំឡុងពេលកើតហេតុភ្លាម មិនភ័យ មិនតក់ស្លុត។



មែនទែនទៅ បន្ទាប់ពីបញ្ចប់ការប្រគំតន្ដ្រីទៅដោយជោគជ័យ ចុងក្រោយតារាស្រី G.E.M បាននិយាយដើម្បីកុំឲ្យអ្នកគាំទ្រមានការព្រួយបារម្ភ និងលើកឡើងថា៖ មនុស្សជាង ៣ ម៉ឺននាក់កំពុងទស្សនាការប្រគំតន្ដ្រីរបស់នាង ឲ្យតែមានពន្លឺ និងការគាំទ្រ បើទោះជាដួល ក៏រូបនាងអាចងើបឈរមកវិញបានដែរ។ ការតស៊ូងើបមកវិញទើបជារឿងសំខាន់ ដូច្នេះកុំមានការព្រួយបារម្ភ។
គួរបញ្ជាក់ G.E.M ជាតារាស្រីហុងកុងដ៏ល្បីម្នាក់ នាងចាប់ផ្ដើមចេញប្រឡូកក្នុងវិស័យសិល្បៈដំបូងក្នុងឆ្នាំ ២០០៨។ នាងចាប់ផ្ដើមមានឈ្មោះល្បីល្បាញខ្លាំងក្នុងប្រទេសចិន នាឆ្នាំ ២០១៤ ក្រោយបង្ហាញខ្លួនក្នុងកម្មវិធី I Am a Singer 2៕






















































Account
Security
Favourite Content