ធ្លាប់តែជាតួរាយរងអមឆាកក្នុង MV ចម្រៀង និងភាពយន្តមួយចំនួន ប៉ុន្តែលើកនេះស្រីស្អាត មាស នីងនីង ទទួលបានឱកាសសម្តែងជាតួអង្គសំខាន់ក្នុងរឿង «ខ្មោចគ្រូកំណើត» ពីផលិតកម្ម LD Entertainment។


ប្រាប់ឱ្យដឹងក្នុងថ្ងៃសម្ពោធរឿង «ខ្មោចគ្រូកំណើត» នីងនីង ថា នាងពិតជារំភើបខ្លាំង ដោយមិននឹកស្មានថា អាចមានឱកាសចូលរួមសម្តែងរឿងខ្នាតធំបែបនេះឡើយ។ មិនតែប៉ុណ្ណោះ តែទៀតក្តោបតំណែងតួអង្គសំខាន់ ជាតួខ្មោចចូល មើលទៅស្រដៀងមនុស្សវិកលចរិកដូច្នោះដែរ។ វាជាបទពិសោធន៍ថ្មីប្លែក ដែលនាងពុំធ្លាប់ជួបប្រទះពីមុនមកឡើយ តែនាងពេញចិត្តការសម្តែរឿងនេះខ្លាំងណាស់ ទោះបីពេលថតជួបផលលំបាកច្រើនក៏ដោយ។
តារាសម្តែងពន្លកថ្មីរូបនេះបន្តថា មែនទែនទៅនាងដាក់ពាក្យ casting សម្រាប់តួអង្គស្រីមួយទៀត ប៉ុន្តែផលិតករបែរជាផ្តល់តួអង្គសំខាន់នេះឱ្យនាងជំនួស ស្របពេលដែលនាងក៏ត្រូវការ challenge ថ្មី ដើម្បីអភិវឌ្ឍន៍សមត្ថភាពរបស់ខ្លួនឯង។


ថ្វីដ្បិតតែនេះជាលើកដំបូងដែល នីងនីង សម្តែងតួអង្គខ្មោច តែសមត្ថភាពតារាស្រីរូបនេះមិនធម្មតានោះឡើយ ដោយនាងដាក់អារម្មណ៍សម្តែងបានយ៉ាងល្អ រហូតអ្នកមើលស្រែកស្ទើរបែកសាលបញ្ចាំង ព្រោះតែភាពភ័យរន្ធត់ និងការពញ្ញាក់របស់តារាស្រីរូបនេះ។



មាស នីងនីង រំពឹងថា តាមរយៈស្នាដៃភាពយន្តខ្នាតធំនេះនឹងអាចជួយឱ្យប្រជាប្រិយភាពនាងកើនឡើងខ្ពស់ ក្លាយជាសិល្បករមានឈ្មោះបោះសំឡេងក្នុងរង្វង់សិល្បៈកម្ពុជា។ ក្នុងនោះផងដែរ នីងនីង ក៏មិនភ្លេចអរគុណទៅដល់ លោក ឆឹម សក្កដា ដែលបានបង្ហាត់បង្រៀនការសម្តែងដល់រូបនាង ដើម្បីមានឱកាសធ្វើការងារក្នុងក្តីស្រមៃរបស់ខ្លួនឯងដូចសព្វថ្ងៃ។
ក្រៅពីរឿង «ខ្មោចគ្រូកំណើត» ដែលកំពុងចាក់បញ្ចាំង សព្វថ្ងៃ នីងនីង ទទួលបានការងារសិល្បៈថ្មីៗជាហូរហែរ ដែលភាគច្រើនជាការថតស៉្បតពាណិជ្ជកម្មតែម្តង៕


























Account
Security
Favourite Content