តារាចម្រៀងកូរ៉េ Koo Jun Yup ឬត្រូវបានគេស្គាល់ថា DJ Koo បានចែករំលែកទិដ្ឋភាពដ៏មានអត្ថន័យនៃពិធីសម្ពោធរូបចម្លាក់អនុស្សាវរីយ៍ដែលលោកបានបង្កើតឡើង ដើម្បីជាការរម្លឹកដល់ភរិយាដែលបានចែកឋានទៅគឺតារាសម្ដែងតៃវ៉ាន់ Barbie Hsu (តួសាន់ឆាយ រឿង F4) ក្នុងឱកាសខួបគម្រប់មួយឆ្នាំនៃមរណភាពរបស់នាង។

កាលពីថ្ងៃទី២ ខែកុម្ភៈ DJ Koo បានបញ្ចេញវីដេអូឯកសារអំពីការបង្កើតស្នាដៃនេះឡើង ដោយគម្រោងនេះត្រូវបានបញ្ចប់បន្ទាប់ពីការសហការអស់រយៈពេលជាច្រើនខែជាមួយក្រុមការងារសិល្បៈឈានមុខគេនៅតៃវ៉ាន់ ដោយប្រើប្រាស់វត្ថុធាតុដើមពីដែកថែប និងលង្ហិន ខណៈរូបចម្លាក់មេមានកម្ពស់ប្រហែល ៣៣០ សង់ទីម៉ែត្រ។
DJ Koo បាននិយាយនៅក្នុងវីដេអូថា៖ «វាពិតជាលឿនណាស់ ដែលរយៈពេលមួយឆ្នាំបានកន្លងផុតទៅ ចាប់តាំងពី Barbie បានចាកចេញពីយើង។ ខ្ញុំចង់ឱ្យនាងនៅក្បែរយើងជានិច្ច ដូច្នេះហើយទើបខ្ញុំបង្កើតរូបចម្លាក់នេះឡើង»។ លោកបានបន្ថែមថា៖ «នាងធ្លាប់និយាយថា នាងគឺជាមនុស្សមកពីក្រៅភព ដូច្នេះហើយទើបខ្ញុំចង់បង្កើតកាឡាក់ស៊ីផ្ទាល់ខ្លួនសម្រាប់នាង»។
ការរៀបចំរូបចម្លាក់នេះ រួមមានដុំគូបចំនួន ៩ តំណាងឱ្យភពទាំង ៩ និងជាលេខដែល Barbie Hsu ចាត់ទុកថាជាលេខសំណាង។ DJ Koo ក៏បានចែករំលែកផងដែរថា រូបចម្លាក់នេះត្រូវបានដាក់បែរមុខទៅរកទិសខាងត្បូង ២០៨ ដឺក្រេ សំដៅទៅកាន់ទីក្រុងតៃប៉ិ ដែលជាកន្លែងគ្រួសាររបស់ Barbie Hsu និងរូបលោកផ្ទាល់កំពុងរស់នៅ។ លោកបានពន្យល់ថា៖ «លេខ ២០៨ ក៏តំណាងឱ្យថ្ងៃខួបអាពាហ៍ពិពាហ៍របស់យើងផងដែរ គឺថ្ងៃទី ៨ ខែកុម្ភៈ»។
ពិធីសម្ពោធជាលក្ខណៈឯកជនមួយត្រូវបានរៀបចំឡើងនៅថ្ងៃដដែលនោះ ដោយមានការចូលរួមពីក្រុមគ្រួសារ និងមិត្តភក្តិជិតស្និទ្ធ។ ក្នុងខណៈពេលថ្លែងអំណរគុណដល់អ្នកដែលបានធ្វើដំណើរមកចូលរួម Koo បានស្រក់ទឹកភ្នែក ហើយនិយាយថា៖ «Barbie បងនឹកអូនណាស់»។

ក្រៅពីនោះ DJ Koo ក៏បានចែករំលែកសំបុត្រសរសេរដោយដៃផ្ញើទៅកាន់ភរិយាដែលបានចែកឋានទៅផងដែរ។ លោកបានសរសេរថា៖ «នៅពេលដែលខ្ញុំអង្គុយនៅលើគែមគ្រែដ៏ទទេស្អាតរបស់យើង ខ្ញុំនៅតែមិនអាចប្រាប់បានថា តើនេះជាការពិត ឬជាសុបិននោះទេ។ នៅពេលដែលខ្ញុំបើកឡានទៅរកអូន ទឹកភ្នែកខ្ញុំហូរមិនឈប់ឡើយ»។
លោកបានបន្ថែមថា៖ «ខ្ញុំសុំទោសដែលបង្ហាញភាពទន់ជ្រាយបែបនេះ ប៉ុន្តែនេះគឺជាវិធីតែមួយគត់ដែលខ្ញុំដឹង ដើម្បីសម្រាលក្ដីនឹករបស់ខ្ញុំ»។ លោកបានបញ្ចប់សំបុត្រដោយពាក្យថា៖ «នៅពេលយើងជួបគ្នាម្ដងទៀត សូមឱ្យយើងនៅជាមួយគ្នាជារៀងរហូត។ ខ្ញុំនឹកអូន។ ខ្ញុំនឹកអូនជាងអ្វីៗទាំងអស់»។
សូមរម្លឹកថា Barbie Hsu បានទទួលមរណភាពកាលពីថ្ងៃទី២ ខែកុម្ភៈឆ្នាំមុន ក្នុងអំឡុងពេលធ្វើដំណើរកម្សាន្តនៅប្រទេសជប៉ុន ដោយសារជំងឺរលាកសួតពាក់ព័ន្ធនឹងជំងឺគ្រុនផ្ដាសាយ និងការឆ្លងមេរោគក្នុងឈាម (Sepsis)។ គូស្នេហ៍មួយគូនេះបានជួបគ្នាដំបូងក្នុងឆ្នាំ ១៩៩៨ និងបានជួបជុំគ្នាវិញបន្ទាប់ពីបែកគ្នាអស់រយៈពេលជាងពីរទសវត្សរ៍ ហើយបានរៀបការជាមួយគ្នាក្នុងឆ្នាំ ២០២២ ៕




























Account
Security
Favourite Content