មិនខុសពីការទស្សន៍ទាយមែន ឌីជេ ក្ដឹប គឺពិតជាមានវត្តមានក្នុងកម្មវិធី “THE NEXT LEVEL: RAPSTAR” របស់ផលិតកម្មបារមី និងភ្លើងគប់មែន។ តារារ៉េបរូបនេះត្រូវបានតែងតាំងជា Judge ដាក់ពិន្ទុ និងវិនិច្ឆ័យបេក្ខភាពមកប្រកួតប្រជែងចម្រៀងរ៉េបថ្មីដែលបង្កើតដោយកូនខ្មែរ។


គ្រាន់តែពិធីករទាំង ២ ប្រកាសសមាសភាព ឌីជេ ក្ដឹប ភ្លាមសំឡេងអ្នកគាំទ្រដែលបានចូលរួមសន្និសីទកាសែត ស្រែកហ៊ោកញ្ជ្រៀវកងរំពងតែម្ដង។ ក្នុងកម្មវិធីបានឲ្យរហស្សនាម DJ Kdep ជា ស្ថាបនិកវិស័យហ៊ីបហប The Legendary ហើយមហាជនក៏យល់ឃើញស្របនឹងគំនិតនេះហើយវាពិតជាស័ក្ដិសមមែនទែន ព្រោះជាការឲ្យតម្លៃលោកជារៀមច្បង។
ម្ចាស់បទ «សុរា» នៅព្រឹកនេះ បានសរសេរសាររ៉ាយរ៉ាប់ និងបង្ហាញពីអារម្មណ៍ ក្រោយទទួលបានការងារជាគណៈកម្មការលើកម្មវិធីប្រឡងរ៉េបថ្មី ដែលផលិតដោយកូនខ្មែរ។ លោកបានថ្លែងអំណរគុណ ក៏ដូចជាការចាប់បានឱកាសនាគ្រានេះថា “រំភើបណាស់! រីករាយណាស់! ត្រេកអរណាស់ ដែលបានខិតខំតស៊ូរហូតអាចធ្វើដំណើរមកដល់ចំណុចចាប់ផ្ដើមនេះ។ សូមអរគុណដល់មនុស្សល្អគ្រប់គ្នាដែលធ្លាប់បានជួយខ្ញុំកន្លងមកគ្រប់រូបភាពទាំងអស់ អរគុណសម្រាប់ការលើកទឹកចិត្ត/ អរគុណសម្រាប់ការជំរុញទឹកចិត្ត ទីបំផុតខ្ញុំធ្វើបានហើយ/ ខ្ញុំមិនធ្វើឲ្យបងប្អូនខកចិត្តឡើយ (អរគុណណាស់)”។


ក្ដឹប ក៏បានអរគុណជាពិសេស ដល់កំពូលតារារ៉េបនាជំនាន់នេះ គឺ វណ្ណដា ដែលបានឲ្យតម្លៃ ផ្ដល់ឱកាសការងារ ការលើកស្ទួយដើម្បីភាពរីកចម្រើននៅក្នុងវិស័យហ៊ីបហបខ្មែរ ឲ្យកាន់តែល្អអស្ចារ្យនៅលើឆាកអន្តរជាតិបន្តទៅមុខទៀត។ ជាពិសេស តារារ៉េបរូបនេះបានអរគុណទៅដល់អរគុណខ្លួនឯងដែលបានប្រឹងប្រែង អ្នកមានគុណ និងមិត្តភ័ក្ដិដែលនៅឆ្ងាយពីគ្នា។
វត្តមាន ក្ដឹប ជា Judge កម្មវិធី “THE NEXT LEVEL: RAPSTAR” ធ្វើឲ្យអ្នកសិល្បៈជាច្រើនជំនាន់មុនច្រើនរូប បានអបអរសាទរ ក៏ដូចជាត្រេកអរចំពោះការវិលត្រឡប់មកកាន់តន្ត្រី Hip-hop R&B ឡើងវិញ។ គួរបញ្ជាក់ផងដែរថា “THE NEXT LEVEL: RAPSTAR” មាន Judge ៣ រូប រួមមាន វណ្ណដា, ក្ដឹប និង នរិទ្ធ ហើយ captain ក៏ ៣ នាក់ដូចគ្នាដែរក្នុងនោះ យូហៃ, វិទូ និង Vito។
មកដល់ពេលនេះ២០ ឆ្នាំដែល ក្ដឹប បានប្រឡូកក្នុងវិស័យហ៊ីបហប រ៉េប។ ដោយពីឆ្នាំ ២០០៥ ដល់ ២០០៧ ឌីជេ ក្ដឹប ចាប់ផ្ដើមសរសេរបទចម្រៀងបែបហ៊ីបហប រ៉េប ហើយនៅអំឡុងឆ្នាំ ២០០៩ ក្ដឹប ក៏បានចាប់ផ្ដើមសរសេរ Original song បណ្ដើរៗហើយក៏ជាឆ្នាំមានឱកាសបានចេញទៅអាមេរិកលើកដំបូងក្នុងជីវិត និងស្គាល់ពិភពលោកថាធំប៉ុណ្ណា៕





រូបភាព៖ DJ Kdep Eysan និង Baramey Production























Account
Security
Favourite Content