Dispatch បានចេញផ្សាយនូវអត្ថបទស៊ើបអង្កេតរបស់ខ្លួនទាក់ទងនឹងពាក្យចចាមអារ៉ាមរបស់ Kim Sae Ron និង Kim Soo Hyun ដោយមានភស្តុតាង និងប្រភពជាច្រើនដែលអាចបញ្ជាក់ថា រឿងអាស្រូវនេះជារឿងពិត។

ជាក់ស្ដែង ប្រភពមួយនេះបានលើកឡើងថា នៅក្នុងខែមីនា ឆ្នាំ២០២៣ ភ្នាក់ងារ Gold Medalist បានផ្ញើលិខិតឱ្យ Kim Sae Ron សងប្រាក់ជិត ៧០០លានវ៉ុន ឬប្រមាណ ៤៨ម៉ឺនដុល្លារអាមេរិកដែលក្រុមហ៊ុនបានបង់នៅពេលមានគ្រោះថ្នាក់ចរាចរណ៍ ត្រឡប់ទៅឱ្យក្រុមហ៊ុនវិញត្រឹមថ្ងៃទី៣១ ខែធ្នូ ឆ្នាំ២០២៣។ បន្ថែមពីនេះ នៅក្នុងលិខិតតែមួយនេះបានបញ្ជាក់ទៀតថា បើសិនតារាស្រីរូបនេះមិនសងបំណុលក្នុងពេលកំណត់ទេ ក្រុមហ៊ុននឹងធ្វើការដោះស្រាយរឿងនេះតាមផ្លូវច្បាប់។
ក្រោយទទួលបានលិខិតនេះ Kim Sae Ron ដែលមិនមានលទ្ធផលអាចសងលុយទាំងដុលត្រឡប់ទៅភ្នាក់ងារវិញ ក៏បែរទៅសុំជំនួយពី Kim Soo Hyun។ Dispatch បានឱ្យដឹងទៀតថា នៅថ្ងៃទី២៤ ខែមេសា ឆ្នាំ២០២៤ Kim Sae Ron បានផ្ញើសារជាអក្សរទៅកាន់អតីតមិត្តប្រុស ដើម្បីសុំការបញ្ជាក់ពីលិខិតខាងលើ និងសុំជំនួយ តែនាងមិនទទួលបានការឆ្លើយតបវិញឡើយ។ ទើប តារាស្រីរូបនេះសម្រេចចិត្តបង្ហោះរូបភាពរបស់ខ្លួន និង Kim Soo Hyun ព្រោះសង្ឈឹមថា នឹងទទួលបានទាក់ទងមកវិញ។

ក្រោយមានព័ត៌មាន ថា Kim Sae Ron នឹងធ្វើសេចក្ដីថ្លែងការណ៍ទាក់ទងនឹងរឿងខាងលើ Dispatch បានទាក់ទងទៅកាន់តារាស្រីរូបនេះដើម្បីធ្វើការបកស្រាយ តែនាងបែរជាប្រាប់ថា នាងមិនមានគោលបំណងបែបនេះទេ។ ស្របនឹងការឆ្លើយតបនេះ Dispatch បានសន្និដ្ឋានថា Kim Sae Rom ចង់ឱ្យរឿងនេះជារឿងសម្ងាត់រវាងខ្លួន និងក្រុមហ៊ុន និងមិនចង់ឱ្យមានបញ្ហាបន្តនោះទេ។ ក៏ប៉ុន្តែ Gold Medalist ក៏បានធ្វើសេចក្ដីថ្លែងការណ៍មួយ ច្រានចោលលើកទំនាក់ទំនងស្នេហារវាងតារាទាំងពីរ និងបានលើកឡើងថា ខ្លួនមិនយល់ពីមូលហេតុដែល Kim Sae Ron បង្ហោះរូបភាពមួយសន្លឹកនេះទេ។
លុះមកដល់ថ្ងៃទី១៦ ខែមេសា ឆ្នាំ២០២៥ នៅពេលដែល Kim Sae Ron ស្លាប់ ចំថ្ងៃខួបកំណើតរបស់ Kim Soo Hyun សារព័ត៌មាន Dispatch បានធ្វើការសាកសួរទៅកាន់ Gold Medalist ម្ដងទៀតទាក់ទងនឹងបំណុលដែល តារាស្រីរូបខាងលើបានជំពាក់ទីភ្នាក់ងារ។ ជាការឆ្លើយតប ភ្នាក់ងារនេះបានប្រាប់ថា ខ្លួនគ្មានគោលបំណងទារសំណងនោះវិញឡើយ តែការផ្ញើលិខិតនេះគឺ គ្រាន់តែធ្វើឱ្យវាត្រឹមត្រូវតាមផ្លូវច្បាប់តែប៉ុណ្ណោះ។

នៅពេលដែលប្រភពដដែលបានចោទសួរថា៖ “តើក្រុមហ៊ុនបានពន្យល់ Kim Rae Ron ពីរឿងនេះទេ?”។ ភ្នាក់ងារមួយនេះបានឆ្លើយថា អ្នកគ្រប់គ្រងនាងជាអ្នកបកស្រាយរឿងរ៉ាវទាក់ទងនឹងលិខិតនេះទៅកាន់តារាស្រីដោយផ្ទាល់ ហើយក្រុមហ៊ុនមិនមែនចង់ឱ្យ Kim Sae Ron សងលុយទាំងអស់ភ្លាមៗទេ តែអាចរំដោះសងនៅពេលដែលមានលទ្ធភាព។
ផ្ទុយមកវិញ ការបកស្រាយរបស់ Gold Medalist គឺខុសគ្នាពីសកម្មភាពរបស់ Kim Sae Ron ទាំងស្រុង។ ជាក់ស្ដែង ក្រោយពីការស៊ើបអង្កេត Dispatch បានយល់ឃើញថា Kim Sae Ron មិនបានទទួលដឹងឮថា លិខិតនេះ គ្រាន់តែធ្វើឡើងដើម្បីភាពត្រឹមត្រូវតាមផ្លូវច្បាប់ទេ តែនាងយល់ថា វាជារឿងពិត រហូតតារាស្រីរូបនេះមានការពិបាកចិត្តជាខ្លាំង។

ភាពខុសប្លែកមួយទៀត គឺនៅពេលដែលប្រភពដដែលនេះ បានសាកសួរពីប្រាក់សំណងដែលក្រុមហ៊ុនទទួលបានពី Kim Sae Ron ក្រុមហ៊ុននេះបានឆ្លើយថា ខ្លួនទទួលបានតែ ៣៥លានវ៉ុន (ប្រមាណ ២៤០០០ដុល្លារអាមេរិក) ដែលជាលុយបានពីការលក់ឡានរបស់តារាស្រីរូបនេះ។ យ៉ាងណាមិញ នៅពេលដែល Dispatch ធ្វើការស៊ើបអង្កេតបន្ត បានប្រទះឃើញថា Kim Sae Ron បានលក់ទ្រព្យសម្បត្តិ ដូចជាឡាន និងភាគហ៊ុនរបស់ខ្លួនដើម្បីសងប្រាក់ទៅក្រុមហ៊ុន ដែលមានចំនួនសរុបប្រមាណ ២០០លានវ៉ុន (ប្រមាណ ១៣៧០០០ ដុល្លារអាមេរិក)។
ទាក់ទងនឹងចំណងស្នេហាររបស់អ្នកទាំងពីវិញ ដ្បិត Gold Medalist បានព្យាយាមច្រានចោលម្ដងជាពីរដង តែ Dispatch បានរកឃើញថា មានហេតុផលជាច្រើនដែលអាចបញ្ជាក់ថា វាជារឿងពិត។ ជាក់ស្ដែង ការព្យាយាមច្រើនចោលរបស់ Gold Medalist អាចមកពីបញ្ហាទាក់ទងនឹងអាយុរបស់ Kim Sae Ron ទើបមិនហ៊ានឱ្យសាធារណជនដឹង មានត្រឹមតែអ្នកជិតដិតតែប៉ុណ្ណោះដែលដឹងឮរឿងនេះ៕























Account
Security
Favourite Content