បើយោងតាមប្រភពព័ត៌មានកូរ៉េបានឱ្យដឹងថា សល់មិនដល់កន្លះខែទៀតប៉ុណ្ណោះកុងត្រារបស់ក្រុមចម្រៀងនារី BLACKPINK និងផលិតកម្ម YG ត្រូវបានបញ្ចប់។ ដោយកុងត្រារបស់សមាជិកទាំង ៤ នឹងផុតកំណត់នៅពាក់កណ្ដាលខែ សីហា ឆ្នាំ ២០២៣។ ជាទូទៅក្រុមចម្រៀងខេប៉ុបនីមួយៗ តែងតែចុះកុងត្រារយៈពេល ៧ ឆ្នាំក្នុងការចេញច្រៀង ប៉ុន្ដែដល់ឆ្នាំទី ៨ ដែលត្រូវបន្ដកុងត្រាមិនមានក្រុមចម្រៀងច្រើនទេដែលបន្ដកុងត្រា។ ស្របពេលជាមួយគ្នាដែរទើបធ្វើឱ្យអ្នកគាំទ្រជាច្រើនហាក់មានការភ័យព្រួយដល់ជោគវាសនារបស់ក្រុមចម្រៀង BLACKPINK ថា តើពួកគេអាចបន្ដចុះកុងត្រា ឬប្រម៉ូតជាលក្ខណៈក្រុមទៀតដែរទេ? ព្រោះអ្វីដែលអ្នកគាំទ្រចង់ឃើញបំផុតគឺក្រុមចម្រៀងនារីមួយនេះបន្ដចេញច្រៀងរួមគ្នា និងបញ្ចេញបទចម្រៀងថ្មីៗ ជាបន្ដបន្ទាប់។

កាលពីពាក់កណ្ដាលខែ កក្កដា ឆ្នាំ ២០២៣ ក៏បានលេចពាក្យចចាមអារ៉ាមថា Lisa អាចនឹងបន្ដកុងត្រាជាមួយផលិតកម្ម YG ឡើយ ហើយនាងនឹងជាសមាជិកទី ១ ដែលអាចចាកចេញពីផលិតកម្ម។ ខណៈសមាជិកទាំង ៣ រូបផ្សេងទៀតកំពុងចរចាលើកុងត្រាថ្មីរបស់ខ្លួន ប៉ុន្ដែមិនទាន់មានដំណឹងថាការបន្ដកុងត្រាថ្មីនឹងបន្ដនៅពេលណាឡើយ។

ដំណឹងដែល Lisa អាចនឹងចាកចេញពីផលិកម្មបានធ្វើឱ្យអ្នកគាំទ្រជាច្រើនមានការព្រួយបារម្ភខ្លាំង ប៉ុន្ដែផលិតកម្ម YG បានចេញផ្ដល់ព័ត៌មានជាបណ្ដោះអាសន្នសិនថា ដោយសារតែ Lisa មានការងារច្រើន ទើបមិនទាន់មានពេលបានចរចាពីកុងត្រាថ្មី។
អ្នកជំនាញបានវិភាគថា ប្រសិនបើក្រុមចម្រៀងនារី BLACKPINK មិនបន្ដកុងត្រា វានឹងជាការខាតបង់ដ៏ធំមួយសម្រាប់ផលិតកម្ម YG ដោយសារបច្ចុប្បន្នក្រុមចម្រៀងនារីថ្មីរបស់ YG គឺ BABYMONSTER ក៏មិនទាន់បានចេញជាផ្លូវការនៅឡើយ។

តែយ៉ាងណាមិញ យោងតាម Pop Flop បានឱ្យដឹងថា ប្រភពផ្ទៃក្នុងបានបង្ហើប សមាជិក BLACKPINK ទាំង ៤ ចុះកុងត្រាថ្មីរួចរាល់ទៅហើយគ្រាន់តែមិនទាន់ប្រកាសជាផ្លូវការប៉ុណ្ណោះ។ ថែមទាំងកំពុងរៀបចំខ្លួនត្រឡប់មកវិញជាមួយអាល់ប៊ុមថ្មីឆាប់ៗទៀតផង។
ដូច្នេះមានតែរង់ចាំមើលទាំងអស់គ្នាថា តើក្រុមចម្រៀងនារី BLACKPINK នឹងបន្ដកុងត្រាជាមួយផលិតកម្ម YG ឬក៏យ៉ាងណា៕






















































Account
Security
Favourite Content