មួយរយៈចុងក្រោយនេះ ទស្សនិកជនប្រាកដជាមិនសូវឃើញតារាសម្ដែងជើងចាស់ Angelina Jolie សម្ដែងភាពយន្តខ្នាតធំញឹកញាប់ប៉ុន្មានទេ ព្រោះតារាស្រីចិត្តធម៌រូបនេះបានងាកមកធ្វើការងារនៅពីក្រោយឆាកដូចជាដឹកនាំរឿង ព្រមទាំងមមាញឹកក្នុងគម្រោងការងារសង្គម-សិទ្ធិមនុស្ស និងប្រេនសម្លៀកបំពាក់របស់នាង Atelier Jolie ផងដែរ។ ប៉ុន្តែថ្មីៗនេះមានសេចក្តីរាយការណ៍ថា តារាវ័យ ៤៨ឆ្នាំរូបនេះកំពុងចាប់ផ្តើមវិថីអាជីពថ្មីមួយទៀតនៅមហោស្រព Broadway ក្នុងនាមជាអ្នកផលិតនាំមុខសម្រាប់ការសម្ដែងល្ខោនតន្ត្រីរឿង ‘The Outsiders’ ។

Angelina បានបង្ហើបថា នាងមានក្តីរំភើប និងអន្ទះសាចង់ចែករំលែករឿងរ៉ាវនេះទៅដល់មហាជនខ្លាំងណាស់។ អ្នកស្រីថ្លែងថា៖ “ខ្ញុំមានសំណាងណាស់ដែលបានក្លាយជាផ្នែកមួយនៃផលិតកម្មនេះ.. ខ្ញុំបានសិក្សានៅ LEE SRASBERG ជាកន្លែងដែលខ្ញុំដឹងថាស្នេហាដំបូងរបស់ខ្ញុំអំពីការធ្វើជាតួសម្តែងល្ខោនគឺជាអ្វី។ ឥឡូវនេះ ខ្ញុំប្រហែលមិនអាចរកផ្លូវត្រឡប់ទៅសម្តែងបែបនោះវិញទេ។ ប៉ុន្តែខ្ញុំតែងតែសង្ឃឹមថាខ្ញុំអាចព្យាយាមបង្កើត និងរៀនរឿងនេះក្នុងពេលតែមួយ ជាមួយនឹងក្រុមការងារដ៏អស្ចារ្យ។”
គួរបញ្ជាក់ថា ‘The Outsiders’ គឺជារឿងបែបឧក្រិដ្ឋកម្ម និងជីវិតយុវវ័យ ដែលផ្អែកតាមប្រលោមលោកឆ្នាំ១៩៦៧ របស់អ្នកនិពន្ធ S.E. Hinton និងធ្លាប់ត្រូវបានផលិតជាភាពយន្តកាលពីឆ្នាំ១៩៨៣។ សម្រាប់អ្នកគាំទ្រល្ខោនតន្ត្រី Broadway ដែលចង់ឃើញស្នាដៃផលិតដំបូងរបស់ Angelina Jolie ប្រហែលជាត្រូវរង់ចាំយូរបន្តិច ព្រោះកាលបរិច្ឆេទចេញសម្តែងល្ខោនតន្ត្រី ឬ Musical មួយនេះគឺនៅថ្ងៃទី១១ ខែមេសា ឆ្នាំ២០២៤។ ទោះយ៉ាងណា ទស្សនិកជនភាគច្រើនជឿថាស្នាដៃច្នៃប្រឌិតរបស់តារាស្រីដែលមានទេពកោសល្យរូបនេះប្រាកដជាគួរឱ្យចាប់អារម្មណ៍ ៕




























Account
Security
Favourite Content