តារាសម្ដែងស្រីកូរ៉េជើងចាស់ Kim Ah-Joong បានបង្ហាញពីអារម្មណ៍ពិតរបស់ខ្លួនសង្ឃឹមរកបានដៃគូជីវិតម្នាក់អាចសាងគ្រួសារមានសុភមង្គល។

ក្នុងឱកាសចូលរួមកម្មវិធីរបស់ស្ថានីយទូរទស្សន៍ tvN គឺ “Unexpected Business 3” តារាស្រីវ័យ ៤១ ឆ្នាំរូបនេះបាននិយាយរំឭកដល់ការបង្កើតគ្រួសារ និងការរៀបការ។ រូបនាងបានលើកឡើងថា៖ នាងពិតជាស្ងប់ស្ងែងដល់អ្នកដែលអាចរកឃើញស្នេហ៍ពិត និងចាប់ដៃគ្នាចូលរោងមង្គលសាងគ្រួសារ។ ពួកគេពិតជាមានសំណាងខ្លាំង វាពិតជាមិនមែនងាយស្រួលក្នុងការស្វែងរកមនុស្សដែលស្រឡាញ់ពេញចិត្ដ និងយល់ចិត្ដគ្នាទៅវិញទៅមកឡើយ។ នាងសង្ឃឹម រូបនាងអាចមានសំណាងល្អ និងជួបមនុស្សដែលខ្លួនស្រឡាញ់ពេញចិត្ដដូចគ្នា។


នាងបន្ដថា៖ ប្រសិនបើមនុស្សម្នាក់មានអារម្មណ៍ចង់រៀបការជាមួយមនុស្សម្នាក់ទៀត ពិតណាស់ពួកគេច្បាស់ជាទុកចិត្ដគ្នាខ្លាំង និងពិតជាចង់រស់នៅជាមួយម្នាក់នោះពេញមួយជីវិត។ រឿងបែបនេះពិតជាមិនងាយស្រួលឡើយ វាពិតជាត្រូវការការទុកចិត្ដគ្នាខ្លាំង។
តារាស្រី Kim Ah-Joong ធ្លាប់បានលើកឡើងក្នុងបទសម្ភាសកាលពីឆ្នាំ ២០១៧ រូបនាងជាមនុស្សពិបាកក្នុងការរាប់អានមិត្ដភ័ក្ដិ នាងត្រូវចំណាយពេលយូរក្នុងការជិតស្និទ្ធជាមួយនរណាម្នាក់ ហើយវាកាន់តែពិបាកនៅពេលដែលនាងរាប់អានជាមួយមិត្ដភ័ក្ដិភេទផ្ទុយគ្នា។



នាងក៏ធ្លាប់បានលើកឡើងពីប្រភេទបុរសដែលនាងស្រឡាញ់ពេញចិត្ដថា មិនចាំបាច់ជាមនុស្សឡូយឆាយ តែជាមនុស្សមានអត្ដចរិតស្រដៀងៗ ជាមួយនាង។ បុរសម្នាក់នោះ មិនចាំបាច់ល្អឥតខ្ចោះ តែជាមនុស្សចេះយកចិត្ដគេដាក់ចិត្ដរបស់ខ្លួន និងងាយស្រួលចុះសម្រុង។ នាងលើកឡើងបន្ថែម៖ បើមិនមានប្រាក់ គឺអាចរកថែម និងសន្សំបាន បើខ្វះចំណេះដឹងក៏អាចរៀនសូត្របន្ថែម ប៉ុន្ដែចិត្ដគំនិតដែលល្អគឺមិនងាយរកនោះទេ។
គួរបញ្ជាក់ថា តារាស្រី Kim Ah-Joong បានចេញសម្ដែងចាប់តាំងពីឆ្នាំ ២០០៤ គិតមកដល់បច្ចុប្បន្ន រូបនាងប្រឡូកក្នុងអាជីពសិល្បៈអស់រយៈពេលជិត ២០ ឆ្នាំមកហើយ។ រូបនាងបានបង្ហាញខ្លួនក្នុងរឿងល្បីជាច្រើនដូចជា 200 pounds Beauty, The King, My P.S Partner, Live Up to Your Name និង Sign ជាដើម។ ក្រឡេកមកមើលជីវិតស្នេហាវិញ នាងមិនដែលប្រកាសពីទំនាក់ទំនងស្នេហាជាសាធារណៈឡើយ ៕


























Account
Security
Favourite Content