ប្រទេសអ៊ូសបេគីស្ថានបានអនុម័តច្បាប់ថ្មី ដោយអនុញ្ញាតឱ្យកាត់បន្ថយរយៈពេលជាប់ពន្ធនាគារច្រើនបំផុត ៣០ថ្ងៃក្នុងមួយឆ្នាំ សម្រាប់អ្នកទោសណាដែលតាំងចិត្តអានសៀរភៅ។ នេះបើផ្អែកតាមការចុះផ្សាយរបស់សារព័ត៌មាន Euro News នៅថ្ងៃទី១៣ ខែកញ្ញា។

លោក Shakhrizod Shokirov មន្ត្រីនៃក្រសួងមហាផ្ទៃបានឱ្យដឹងថា ការអនុម័តច្បាប់នេះបានកើតឡើង តាមរយៈការសិក្សាពីវិធានការតែមួយពីប្រទេសផ្សេងទៀត ដោយលោកបានប្រាប់ទៅសារព័ត៌មាន Euro News ថា ៖ “ក្នុងប្រទេសប្រេស៊ីល ចាប់តាំងពីឆ្នាំ ២០១២ មក អ្នកទោសអាចកាត់បន្ថយថ្ងៃជាប់ទោសរបស់ខ្លួនចំនួន ៤ថ្ងៃសម្រាប់ការអានសៀវភៅមួយក្បាល និងអាចកាត់បន្ថយទោសសរុបបាន ៤៨ ថ្ងៃក្នុងមួយឆ្នាំ។ វិធានការស្រដៀងគ្នានេះ ក៏មាននៅក្នុងប្រទេសអ៊ីតាលី និងបូលីវីដែរ”។
បន្ទាប់ពីអានសៀវភៅចប់ អ្នកទោសនឹងត្រូវឆ្លងកាត់ការធ្វើតេស្តក្រោមការត្រួតពិនិត្យរបស់គណៈកម្មាធិការពិសេស ដើម្បីបញ្ជាក់ថា ពួកគេពិតជាបានស្វែងយល់ពីខ្លឹមសារនៃសៀវភៅពិតមែន។ ក្នុងករណីថា ការធ្វើតេស្តនេះបានជោគជ័យ អ្នកទោសនឹងអាចកាត់បន្ថយរយៈពេលជាប់ពន្ធនាគារចំនួន ៣ថ្ងៃសម្រាប់សៀវភៅមួយក្បាល។
Begmat Ochilov អ្នកឯកទេសនៅឯមជ្ឈមណ្ឌលសាធារណៈរដ្ឋសម្រាប់ស្មារតី និងការអប់រំ បានរៀបរាប់ថា៖ “អំណានអាចជួយអ្នកទោស ឱ្យចេះឆ្លុះបញ្ចាំងពីខ្លួនឯង និងយល់ពីចិត្តអ្នកដទៃ ដែលមានឥទ្ធិពលល្អដល់ក្រមសីលធម៌ និងជួយការពារកុំឱ្យពួកគេបង្កបទឧក្រិដ្ឋម្ដងទៀតនៅពេលអនាគត”។

ដ្បិតច្បាប់នេះ មិនអនុវត្តចំពោះអ្នកទោសដែលមានទោសជាប់ពន្ធនាគារមួយជីវិតក្ដី តែអ្នកជំនាញផ្នែកច្បាប់ និងការអប់រំ បានយល់ឃើញថា នេះគឺជាវិធានាការដ៏ល្អមួយ។ ជាក់ស្ដែង លោក Begmat Ochilov បានយល់ឃើញថា ច្បាប់នេះបានអនុញ្ញាតឱ្យអ្នកទោសអាចសិក្សារៀនសូត្របាន ជាជាងការនៅទំនេរចោល។
សម្រាប់សៀវភៅដែលនឹងយកមកប្រើប្រាស់ គឺជាស្នាដៃនិពន្ធទាំងនៅក្នុងស្រុក និងស្នាដៃអន្តរជាតិ ដែលមានប្រធានបទទូលំទូលាយសម្រាប់អ្នកទោស រួមមានសៀវភៅ “The Old Man and the Sea” “On War” “An American Tragedy” “Three Comrades” “Fahrenheit 451” “The Trial” “Martin Eden” “O‘tkan kunlar” “The Development Strategy of New Uzbekistan” និង “The Book of Leaders”៕





























Account
Security
Favourite Content