ទារកនៅក្នុងតំបន់ Staffordshire នៃប្រទេសអង់គ្លេស ណាដែលកើតចំថ្ងៃនៃការឡើងសោយរាជ្យរបស់ព្រះមហាក្សត្រត្រូវបានកំណត់ថានឹងទទួលបានពែងអនុស្សាវរីយ៍ដើម្បីជាការចងចាំ។
ក្រុមប្រឹក្សានៃសេវាចុះឈ្មោះនៃតំបន់ Staffordshire បានឲ្យដឹងថា អំណោយពិសេសនឹងត្រូវផ្តល់ជូនឪពុកម្តាយទារកដែលកើតនៅថ្ងៃសៅរ៍ ទី៦ ខែឧសភា ឆ្នាំ២០២៣។ ក្រុមគ្រួសារនឹងអាចមកទទួលយកពែងនោះបានតាមរយៈការទាក់ទងទៅក្រុមប្រឹក្សាបន្ទាប់ពីពិធីឡើងសោយរាជ្យ។

សមាជិកក្រុមប្រឹក្សាលោក Simon Tagg បាននិយាយថា កំណើតនៃ “ទារកគ្រប់រូប” នៅក្នុងតំបន់នេះគឺជាបុព្វហេតុមួយសម្រាប់អបអរពិធីសោយរាជ្យ។
លោកថា៖ «ការឡើងសោយរាជ្យរបស់ស្តេច Charles III នឹងក្លាយជាព្រឹត្តិការណ៍ប្រវត្តិសាស្ត្រ ហើយសម្រាប់ទារកដែលកើតនៅថ្ងៃនោះ វានឹងក្លាយជាពេលវេលាដ៏គួរឱ្យចងចាំសម្រាប់ឪពុកម្តាយរបស់ពួកគេ»។
សមាជិកក្រុមប្រឹក្សារូបនេះបន្តថា «ប្រជាជននៅទូទាំង Staffordshire នឹងមើលពិធីឡើងគ្រងរាជ្យនៅលើកញ្ចក់ទូរទស្សន៍ ជួបជុំជាមួយអ្នកជិតខាង និងមិត្តភក្តិ និងចូលរួមព្រឹត្តិការណ៍ពិសេសៗដើម្បីចងចាំពិធីនេះ»។
លោក Simon ថ្លែងថា វានឹងជាថ្ងៃចុងសប្តាហ៍ដ៏គួរឱ្យចងចាំ និងជាឱកាសដ៏ល្អសម្រាប់សហគមន៍ក្នុងការជួបជុំគ្នា និងអបអរសាទរពេលវេលាមួយនេះនៅក្នុងប្រវត្តិសាស្ត្រ។
គួរជម្រាបថា ទារកដែលកើតចំថ្ងៃឡើងសោយរាជ្យរបស់ព្រះមហាក្សត្រិយានី Elizabeth II កាលពីថ្ងៃទី ២ ខែមិថុនា ឆ្នាំ ១៩៥៣ ក៏ធ្លាប់ទទួលពែងជាការចងចាំ គឺពែងប្រាក់។
ព្រឹត្តិការណ៍ឡើងសោយរាជ្យជាផ្លូវការរបស់ស្តេច Charles III ត្រូវបានគេរំពឹងថានឹងក្លាយជាព្រឹត្តិការណ៍ធំបំផុតមួយ ជាមួយនឹងពិធីជប់លៀង ការផ្សព្វផ្សាយ ការតាំងពិរព័ណ៌ពិសេស និងការអបអរទូទាំងចក្រភពអង់គ្លេស៕


























Account
Security
Favourite Content