ក្រុមរូបថតភ្នំពេញ ឬ Phnom Penh Photography Collective គ្រោងនឹងដាក់តាំងបង្ហាញពិព័រណ៍រូបថតលើកដំបូងរបស់ក្រុមក្រោមប្រធានបទ «អ្នកនៅទីក្រុងភ្នំពេញ» ដោយមានសហការជាមួយ WILD Phnom Penh និងសាលាភាពយន្ត PSE។

ពិព័រណ៍ «អ្នកនៅទីក្រុងភ្នំពេញ» នឹងបង្ហាញពីភាពទាក់ទាញនៃការរស់នៅរបស់ប្រជាជន និងវប្បធម៌របស់អ្នករស់នៅទីក្រុងភ្នំពេញ តាមរយៈរូបថតពីអ្នកថតរូបដែលមានទេពកោសល្យប្រមាណ ៤០ នាក់។
តាមរយៈសេចក្តីប្រកាសអំពីកម្មវិធីពិរព័ណ៌របស់ខ្លួនលើទំព័រហ្វេសប៊ុក Phnom Penh Photography Collective បានឲ្យដឹងថា “រាជធានីភ្នំពេញសម្បូរទៅដោយភាពចម្រុះនៃមនុស្សមកពីជុំវិញពិភព ដូច្នេះហើយយើងយល់ថា វាគួរឱ្យចាប់អារម្មណ៍ណាស់ក្នុងការបង្ហាញពីភាពចម្រុះនៃម្ចាស់ស្រុក និងជនបរទេសនានា ហើយយើងសង្ឃឹមថាមនុស្សគ្រប់រូបនឹងរីករាយ ក៏ដូចជាមានមោទនភាពចំពោះទីក្រុងរបស់ពួកគេផ្ទាល់“។
Phnom Penh Photography Collective បានបញ្ជាក់ថា ក្រុមបានធ្វើដំណើរជុំវិញទីក្រុងភ្នំពេញ តាមរយៈព្រឹត្តិការណ៍ដើរថតរូបលើកទី ៣ របស់ខ្លួននៅថ្ងៃទី ០១ ខែមេសា ហើយយ៉ាងហោចណាស់អ្នកចូលរួមម្នាក់ត្រូវបានសម្ភាសន៍ ខណៈពេលដែលក្រុមថតរូបសម្រាប់ពួកគេនៅតាមផ្លូវ។ អ្នកថតរូបប្រហែល ៤០ នាក់ រួមទាំងសិស្សមកពីសាលាភាពយន្ត PSE បានចូលរួម ដូច្នេះពិព័រណ៍ខាងមុខនឹងអាចបង្ហាញរឿងចំនួន ៤០ ផ្សេងៗគ្នាទៅកាន់ពិភពលោក។
លើសពីនេះ ការចូលទស្សនាការតាំងពិព័រណ៍គឺមិនគិតថ្លៃទេ ប៉ុន្តែ Phnom Penh Photography Collective លើកទឹកចិត្តអ្នកទស្សនាឱ្យចូលរួមបរិច្ចាគដល់សាលាភាពយន្ត PSE ដើម្បីបន្តគាំទ្រអ្នកថតរូប និងផលិតវីដេអូជំនាន់ក្រោយតទៅទៀត។
គួរបញ្ជាក់ថា ពិព័រណ៍នេះសហការជាមួយ WILD Phnom Penh និង PSE Film School ហើយគ្រោងនឹងដំណើរការពីថ្ងៃទី៣០ ខែមេសា ដល់ថ្ងៃទី ៣១ ខែឧសភាឆ្នាំ ២០២៣ នៅWILD Phnom Penh។
សម្រាប់ព័ត៌មានបន្ថែមសូមចូលទៅទំព័រហ្វេសប៊ុក Phnom Penh Photography Collective៕

























Account
Security
Favourite Content