World Monuments Fund (WMF) បានបញ្ចូលព្រះចន្ទក្នុងបញ្ជី “2025 World Monuments Watch” ជាទីតាំងដែលត្រូវឃ្លាំមើលពីការគំរាមកំហែង ឆ្លើយតបនឹងការរីកចម្រើនផ្នែកវិទ្យាសាស្រ្ត និងសកម្មភាពអវកាសនៅលើឋានព្រះចន្ទដែលកំពុងតែមានកំណើនកើនឡើងយ៉ាងឆាប់រហ័ស។

ចាប់តាំងតែពីឆ្នាំ១៩៩៦ World Monuments Fund (WMF) បានដើរតួនាទីយ៉ាងសំខាន់នៅក្នុងការអភិរក្សទីតាំងវប្បធម៌សំខាន់នៅលើពិភពលោក ដោយរៀងរាល់ ២ឆ្នាំម្ដង អង្គការមិនរកប្រាក់ចំណេញមួយនេះ នឹងបញ្ចេញបញ្ជីឈ្មោះទីតាំងបេតិកភណ្ឌ ដែលត្រូវការការពារ ដើម្បីលើកកម្ពស់ការយល់ដឹង និងលើកទឹកចិត្តឱ្យមានការចូលរួមថែរក្សាទីតាំងសំខាន់ៗទាំងនេះ។
ដូចគ្នាដែរ នៅឆ្នាំ ២០២៥នេះ WMF បានបើកបង្ហាញទីកន្លែងចំនួន ២៥ផ្សេងគ្នាជុំវិញពិភពលោក និងមានមួយស្ថិតនៅក្រៅភពផែនដី ដែលនេះជាលើកដំបូងក្នុងប្រវត្តិសាស្រ្តមនុស្សជាតិ។ ជារឿងដែលគួរឱ្យភ្ញាក់ផ្អើល អង្គការខាងលើនេះ បានកំណត់ថា ព្រះចន្ទ ជាទីតាំងដែលកំពុងប្រឈមមុខនឹងហានិភ័យ ពីការបំផ្លិចបំផ្លាញទីតាំងប្រវត្តិសាស្ត្រដែលមនុស្សបានទៅដល់ទីកន្លែងមួយនេះ។
ប្រធានអង្គការ World Monuments Fund លោកស្រី Bénédicte de Montlaur បានលើកឡើងពីមូលហេតុនៃការសម្រេចនេះថា ហានិភ័យកើនឡើង ចំពេលមានដែលសកម្មភាពផ្សេងៗនៅលើភពមួយនេះបានកើនឡើង ដោយមិនមានច្បាប់មាត្រដ្ឋានត្រឹមត្រូវ។ លោកស្រីបានបង្ហាញក្ដីបារម្ភថា ទីតាំងបេតិកភណ្ឌសំខាន់ៗនៅលើឋានព្រះចន្ទទាំងនោះ អាចនឹងទទួលរងការរុះរើ ឬធ្វើឱ្យខូចខាត ដោយសារតែឧស្សាហកម្មអវកាសកំពុងតែរីកចម្រើនទាំងក្នុងវិស័យឯកជន និងរបស់រដ្ឋាភិបាល។


បេតិកភណ្ឌ ជាវត្ថុ និងទីតាំងទាំងនេះ ជាភស្តុតាងដ៏សំខាន់ដែលឆ្លុះបញ្ចាំងពីអតីតកាលរបស់មនុស្សនៅលើភពឋានមួយនេះ។ WMF បានឱ្យដឹងថា សម្បត្តិបេតិកភណ្ឌតាំងនោះមានមិនតិចជាង ១០០នោះទេ រួមទាំង Tranquility Base ដែលជាទីតាំងមនុស្សបានជាន់នៅលើដួងចន្ទជាលើកដំបូងកាលពីឆ្នាំ១៩៦៩ ព្រមគ្នានឹងដានជើងរបស់អវកាសយានិក Neil Armstrong និងរបស់របរផ្សេងៗដែលបន្សល់ទុកដោយបេសកកម្ម Apollo 11។
ក្រៅពីព្រះចន្ទ ទីកន្លែងចំនួន ២៤ផ្សេងទៀត រួមមាន អគារប្រវត្តិសាស្ត្រទន្លេ Musi ប្រទេសឥណ្ឌា, តំបន់បេតិកភណ្ឌកោះណូតូ ប្រទេសជប៉ុន និងប្រាសាទបុរាណ Belchite ប្រទេសអេស្ប៉ាញជាដើម។ ទីតាំងទាំង ២៤នេះ បានបញ្ចូលក្នុងបញ្ចីតែមួយ ដោយសារតែហានិភ័យពីកត្តាសំខាន់ៗដូចជា តំបន់មានជម្លោះ ការប្រែប្រួលអាកាសធាតុ គ្រោះមហន្តរាយធម្មជាតិ និងចំនួនអ្នកទេសចរច្រើនលើសកម្រិតជាដើម។
គួរបញ្ជាក់ផងដែរថា តាំងតែពីចាប់ផ្ដើមបេសកកម្មមួយនេះ World Monuments Fund បានបរិច្ចាគទឹកប្រាក់ជាង ១២០លានដុល្លារអាមេរិក និងបានចូលរួមអភិរក្សទីតាំងសំខាន់ៗជុំវិញពិភពលោក ប្រមាណ ៣៥០កន្លែងរួចមកហើយ៕



























Account
Security
Favourite Content