White Canvas គឺជាកម្មវិធីប្រកួតស្នាដៃសិល្បៈគំនូរអន្តរជាតិ ដែលធ្វើឡើងក្នុងគោលបំណង ស្វែងរក បណ្តុះបណ្តាល គាំទ្រ និងផ្សព្វផ្សាយស្នាដៃរបស់សិល្បករនៅតំបន់អាស៊ី ព្រមទាំងជួយដាក់លក់ និងតាំងពិព័រណ៍ស្នាដៃទាំងនោះ។ White Canvas Cambodia បានរៀបចំការប្រកួតប្រជែងយ៉ាងជោគជ័យចំនួន ៣ ដងមក ខណៈរដូវកាលទី៤កំពុងបន្តទទួលពាក្យអ្នកចូលរួម។

យោងតាមការបង្ហោះនៅលើទំព័រហ្វេសប៊ុកផ្លូវការនៃកម្មវិធី White Canvas Cambodia បានឲ្យដឹងថា សិល្បករ-សិល្បការីគ្រប់រូបអាច ដាក់បញ្ចូលស្នាដៃសិល្បៈដ៏ឆ្នើមរបស់ខ្លួនចូលរួមក្នុងការប្រកួតប្រជែងចាប់ពី ថ្ងៃទី ១ខែ កម្ភៈ ឆ្នាំ ២០២៣ រហូតដល់ ថ្ងៃទី១៥ ខែសីហា ឆ្នាំ ២០២៣។
សម្រាប់ល័ក្ខខណ្ឌចូលរួមប្រកួត គឺមានប្រធានបទស៊េរី (មិនកំណត់ប្រធានបទឡើយ) តែរូបគំនូរត្រូវមានទំហំចាប់ពី ពី ៣០cm x ៣០cm ដល់ ១០០cm x ១០០cm លើកលែងតែកុមារប៉ុណ្ណោះដែលមិនត្រូវកំណត់ទំហំ ឯលក្ខខណ្ឌអាយុសម្រាប់មនុស្សពេញវ័យគឺចាប់ពី ១៦ឆ្នាឡើង សម្រាប់កុមារ ១៦ឆ្នាំចុះក្រោម។
ចំណែកឯស្នាដៃជ័យលាភីវិញ សម្រាប់កុមារ គឺមានពានរង្វាន់មាស នឹងទទួលបានរង្វាន់ iPad Mini មួយគ្រឿង ពានរង្វាន់ប្រាក់ នឹងពានរង្វាន់ និងសម្ភារៈគំនូរមួយឈុតធំ និងពានរង្វាន់សំរិទ្ធ ទទួលបានពានរង្វាន់ និងសម្ភារៈគំនូរពិសេសមួយឈុតធំ។
សម្រាប់បេក្ខជនមនុស្សពេញវ័យ ពានរង្វាន់មាស នឹងទទួលបានទឹកប្រាក់ ១ ០០០ ដុល្លារ ពានរង្វាន់ប្រាក់នឹងទទួលបានប្រាក់ ៥០០ ដុល្លារ និងពានរង្វាន់សំរឹទ្ធនឹងទទួលបានប្រាក់ ២០០ ដុល្លារ។
គួរជម្រាបផងដែរថា កាលពីរដូវកាលទី ៣ ពានរង្វាន់មាស ឬ «Gold Prize» នៃកម្មវិធីប្រកួតប្រជែងស្នាដៃសិល្បៈគំនូរវ៉ាយខេនវ៉ាស់កម្ពុជា ប្រចាំឆ្នាំ២០២២ ឬ White Canvas Cambodia 2022 (សម្រាប់លក្ខខណ្ឌមនុស្សពេញវ័យ) បានទៅលើ អ្នកនាង ខ្ចៅ ទូច វិចិត្រករស្រ្តីអាជីពវ័យ៤០ឆ្នាំ មកពីក្រុងបាត់ដំបង ដែលនិយមប្រើពណ៌ខៀវជានិមិត្តរូបសិល្បៈផ្ទាល់ខ្លួន៕


























Account
Security
Favourite Content