អាល់ប៊ុមទោល “Layover” ប្រភេទថាសចម្រៀង “Vinyl” របស់តារាចម្រៀងខេប៉ុប V ទទួលបានការពេញនិយមលំដាប់ពិភពលោក ដោយមានអ្នកគាំទ្រដើម្បីគ្នាទិញរហូតដល់ដាច់ស្តុកមិនថានៅក្នុងប្រទេសជប៉ុន ចក្រភពអង់គ្លេស និងសហរដ្ឋអាមេរិក។

ជាក់ស្ដែង នៅក្នុងចក្រភពអង់គ្លេស អាល់ប៊ុមរបស់សមាជិក BTS មួយនេះបានដាច់ស្ដុកជាលើកដំបូងតាំងតែពីចាប់ផ្ដើមបើកកក់មកម៉្លេះ។ ក៏ប៉ុន្តែ កាលពីថ្ងៃទី១៨ ខែតុលាដែលជាថ្ងៃចេញលក់ជាផ្លូវការនៅក្នុងតំបន់នេះ Layover បានដាច់ស្តុកជាលើកទី ២ នៅតាមបណ្ដាហាងនានានៅក្នុងចក្រភពអង់គ្លេស ដូចជាហាងរបស់ BTS ផ្ទាល់ BTS Official UK Store, Record Store UK, Polydor និង The Sound of Vinyl ជាដើម។ នៅថ្ងៃបន្ទាប់ តម្រូវការនៃអាល់ប៊ុមនេះគឺនៅតែមានច្រើន រហូតដល់ហាង ៩កន្លែងទៀតក៏លែងមានថាសចម្រៀងមួយនេះលក់ជូនភ្ញៀវដែរ រួមមានហាង Horizons Music, Hive, WHSmith, SOKOLLAB និង Kyyo ។

ដោយឡែកនៅក្នុងសហរដ្ឋអាមេរិកវិញ ប្រជាប្រិយភាពរបស់តារាប្រុសវ័យ ២៨ឆ្នាំនេះក៏ខ្លាំងក្លាមិនចាញ់គ្នាដែរ រហូតដល់អាល់ប៊ុមទោលទី ១របស់ខ្លួនបានដាច់ស្តុកពីហាងជាច្រើន និងឈរឈ្មោះជា អាល់ប៊ុមលក់ដាច់ជាងគេ។ ផ្ដើមតាំងតែពីចុងខែកញ្ញា និងដើមខែតុលាមកម៉្លេះ “Layover” លក់អស់គ្មានសល់ នៅតាមបណ្ដាហាងធំដូចជា BTS USA Official Store, Weverse Official US Store, Target, Tower Records និង Elusive Disc។ លើសពីនេះទៅទៀត អាល់ប៊ុមនេះបានដាច់ស្តុករហូតដល់ទៅ ៣ដង នៅឯហាងលក់រាយ Target។
រហូតមកដល់ពាក់កណ្ដាលខែតុលា អាល់ប៊ុមនេះនៅតែលក់ដាច់ដូចដើម ដោយកាលពីថ្ងៃ ១៨ ខែតុលានេះ ថាសចម្រៀងប្រភេទ Vinyl បានដាច់ស្ដុកជាថ្មី នៅលើហាងអនឡាញរបស់ Barnes & Noble ធ្វើឱ្យអាល់ប៊ុមនេះបានក្លាយជាអាល់ប៊ុមលក់ដាច់បំផុតលំដាប់លេខ ១ នៅតាមហាងលក់រាយធំៗរបស់សហរដ្ឋអាមេរិកដូចជា Amazon, Walmart និង Best Buy ។

នៅក្នុងប្រទេសជប៉ុនវិញ អាល់ប៊ុមដែលមានចម្រៀង ៦បទមួយនេះបានដាច់ស្តុកពីហាងធំៗដូចជា BTS official Japan Store និង Universal Music Japan តាំងតែថ្ងៃទី ១នៃការបើកកក់មកម៉្លេះ។ តែតម្រូវការហាក់មិនថមថយនោះទេ ព្រោះក្រោយពីបន្ថែមស្តុកហើយ អាល់ប៊ុមនេះនៅតែបន្តលក់អស់ម្ដងហើយម្ដងទៀត រហូតទទួលបាននចំណាត់ថ្នាក់លេខ ១ នៅលើតារាងអាល់ប៊ុមប្រចាំថ្ងៃរបស់ Oricon។
បន្ថែមពីនេះ កាលពីថ្ងៃទី ១០ ខែតុលា The Recording Industry Association of Japan (RIAJ) បានប្រកាសទទួលស្គាល់ និងផ្ដល់វិញ្ញាបនបត្រលំដាប់ Platinum ដល់អាល់ប៊ុម Layover ក្រោយពីអាល់ប៊ុមទោលដំបូងរបស់ V បានលក់អស់ក្នុងចំនួន ២៥ម៉ឺនឈុតនៅក្នុងប្រទេសជប៉ុន គិតត្រឹមខែកញ្ញា ឆ្នាំ ២០២៤៕
























Account
Security
Favourite Content