ភាពយន្ត “Superman” អាចទទួលបានចំណូល ១២២ លានដុល្លារពីការបញ្ចាំងនៅសហរដ្ឋអាមេរិក និងកាណាដាកាលពីចុងសប្តាហ៍ ដែលជាតួលេខដ៏ខ្ពស់សម្រាប់ការចាប់ផ្ដើមសករាជថ្មីនៃត្រកូលភាពយន្ត Superhero របស់ស្ទូឌីយោ DC។

មិនតែប៉ុណ្ណោះ ភាពយន្តដែលមានតារាសម្ដែង David Corenswet ដើរជាតួឯកនេះ ក៏អាចរកចំណូលបាន ៩៥ លានដុល្លារបន្ថែមទៀតនៅក្នុងទីផ្សារអន្តរជាតិ ដែលធ្វើឱ្យចំណូលសរុបសម្រាប់សប្ដាហ៍ដំបូងរបស់ខ្លួនកើនដល់ ២១៧ លានដុល្លារ ខណៈដើមទុនផលិតគឺ ២២៥ លានដុល្លារ។ នេះបើផ្អែកតាមការឱ្យដឹងកាលពីថ្ងៃអាទិត្យ ពីក្រុមហ៊ុន Warner Bros ដែលជាអ្នកចែកចាយ។
សូមបញ្ជាក់ថា ភាពយន្ត “Superman” ឆ្នាំ២០២៥នេះ គឺជាភាពយន្តថ្មីពី Franchise វីរបុរស Superman ដែលបានបង្ហាញខ្លួនដំបូងនៅក្នុងសៀវភៅ Comic ក្នុងឆ្នាំ ១៩៣៨ ។ ភាពជោគជ័យលើតារាង Box Office ឬប្រាក់ចំណូលរបស់ខ្សែភាពយន្តនេះគឺពិតជាមានសារៈសំខាន់ចំពោះអនាគតរបស់ Warner Bros និង DC Studios។
ថ្វីត្បិតតែមានតួអង្គ Superhero ល្បីៗជាច្រើនដូចជា Batman និង Wonder Woman ក៏ដោយ ប៉ុន្តែចំណូលពីការលក់សំបុត្រកុនរបស់ភាពយន្ត DC នៅមិនអាចប្រៀបផ្ទឹមនឹងចំណូលពីខ្សែភាពយន្ត Superhero របស់ Marvel Studio ដែលជាបុត្រសម្ព័ន្ធរបស់ Walt Disney បាននោះទេ។
ភាពយន្ត “Superman” ថ្មីនេះត្រូវបាននិពន្ធ និងដឹកនាំដោយលោក James Gunn ដែលជាផលិតករដ៏ល្បីឈ្មោះ និងជាអ្នកដឹកនាំខ្សែភាពយន្ត “Guardians of the Galaxy” ទាំង ៣ វគ្គរបស់ Marvel កាលពីពេលកន្លងមក។ លោក James Gunn ត្រូវបានតែងតាំងជាសហនាយកប្រតិបត្តិមួយរូបរបស់ DC Studios ក្នុងឆ្នាំ ២០២២ រួមជាមួយនឹងផលិតករ Peter Safran និងត្រូវបានចាត់ទុកថាជាបុគ្គលដ៏សំខាន់ដែលអាចនាំមកនូវភាពជោគជ័យជាប់លាប់ចំពោះគម្រោងភាពយន្ត និងរឿងភាគទូរទស្សន៍ថ្មីៗរបស់ DC ៕



























Account
Security
Favourite Content