អាចនិយាយបានថាជាឆ្នាំដ៏ពិសេស ដោយកម្មវិធីមហោស្រពភាពយន្តទីក្រុងកានឆ្នាំនេះបានផ្តល់ពានរង្វាន់តារាសម្ដែងស្រីល្អបំផុតដល់តារាស្រីសំខាន់ៗទាំង ៤ ពីភាពយន្ត “Emilia Pérez” ដោយក្នុងនោះរួមមានតារាអេស្ប៉ាញ Karla Sofía Gascón, តារាអាមេរិក Zoe Saldaña, តារាម៉ិកស៊ិក Adriana Paz និងតារាចម្រៀង Selena Gomez។

បើទោះបីជា Selena Gomez មិនបានស្ថិតក្នុងប្រទេសបារាំងនៅក្នុងថ្ងៃប្រកាសពានរង្វាន់កាលពីចុងសប្ដាហ៍កន្លងទៅក៏ដោយ ប៉ុន្តែនាងក៏បានចែករំលែកអារម្មណ៍ដ៏រំភើបតាមរយៈការបង្ហោះ Instagram Story បន្ទាប់ពីទទួលដំណឹងរីករាយនេះពីតារាសម្ដែង Zoe Saldana។ នាងបានអរគុណដល់មហោស្រពកាន និងអរគុណក្រុមការងារ និងអ្នកសម្ដែងទាំងអស់ពីភាពយន្ត “Emilia Pérez” ផងដែរ។





សម្រាប់ការទទួលពានរង្វាន់តារាសម្ដែងស្រីឆ្នើមនៅក្នុងព្រឹត្តិការណ៍នេះ តារាសម្ដែង Karla Sofía Gascón បានតំណាងឱ្យតួឯកស្រីទាំង៤ ក្នុងរឿង “Emilia Pérez” ដើម្បីឡើងទទួល ខណៈរូបនាងបានក្លាយជាស្ត្រីកែភេទដំបូងគេក្នុងប្រវត្តិសាស្ត្រដែលទទួលបានពានរង្វាន់នៅមហោស្រពភាពយន្តទីក្រុងកាន។

នាងបាននិយាយក្នុងពេលឡើងទទួលពានថា៖ “ពានរង្វាន់នេះមិនមែនសម្រាប់តែខ្ញុំទេ ប៉ុន្តែវាជារង្វាន់សម្រាប់អ្នករាល់គ្នាដែលតស៊ូដើម្បីសិទ្ធិរបស់ខ្លួន។ ពួកយើងត្រូវបានគេមើលងាយ ហើយក្លាយជាជនរងគ្រោះនៃអំពើហិង្សាដោយមិនដឹងមូលហេតុ។ ខ្ញុំគិតថាពានរង្វាន់នេះមានន័យច្រើនជាងអ្វីដែលមនុស្សជាច្រើនអាចស្រមៃទៅទៀត”។
ប្រធានគណៈកម្មាធិការពានរង្វាន់មហោស្រពកាន អ្នកនាង Greta Gerwig បាននិយាយពីមូលហេតុចំពោះការសម្រេចចិត្តផ្តល់ពានរង្វាន់ដល់តារាស្រីបួននាក់នៅឆ្នាំនេះ ថា៖ “ប្រសិនបើពួកយើងផ្តល់ពានរង្វាន់ដល់តារាសម្តែងតែម្នាក់ នោះវានឹងដូចជាបំផ្លាញថាមពលពិសេសដែលពួកគេបានបង្កើតរួមគ្នា។ ពួកគេម្នាក់ៗសុទ្ធតែមានសមត្ថភាពពិសេសៗខុសគ្នា ប៉ុន្តែនៅពេលសហការជាមួយគ្នា ធ្វើឱ្យលទ្ធផលចេញមកកាន់តែពិសេស” ៕


























Account
Security
Favourite Content