ក្រៅពីការប្រកួតបាល់ឱប និងការសម្ដែងដ៏ពិសេសរបស់កំពូលតារារ៉េប Kendrick Lamar កម្មវិធី Super Bowl ក៏បានទាក់ទាញការចាប់អារម្មណ៍អ្នកគាំទ្រភាពយន្តហូលីវូដផងដែរ ខណៈស្ទូឌីយោភាពយន្តធំៗលើពិភពលោកបានបង្ហាញ Trailer ភាពយន្តថ្មីៗរបស់ខ្លួនក្នុងកម្មវិធីដែលមានអ្នកទស្សនាពេលផ្សាយផ្ទាល់រាប់រយលាននាក់មួយនេះ។
រាប់ចាប់ពីការវិលត្រលប់មកវិញរបស់ Tom Cruise នៅក្នុងភាពយន្ត “Mission Impossible” រហូតដល់ភាពយន្ត “How To Train Your Dragon” Version មនុស្សសម្ដែង ខាងក្រោមនេះ AMS សូមបង្ហាញភាពយន្តល្បីៗ ៥ រឿងដែលបានបង្ហាញ Trailer ដ៏អស្ចារ្យក្នុងកម្មវិធី Super Bowl ឆ្នាំ២០២៥នេះ៖
១. Jurassic World Rebirth
ស្ទូឌីយោ Universal បានទម្លាក់ឈុតខ្លីៗសម្រាប់ភាពយន្ត “Jurassic World Rebirth” ជាវគ្គចុងក្រោយបង្អស់ក្នុងស៊េរីភាពយន្តដាយណូស័រដែលចូលរួមសម្តែងដោយ Scarlett Johansson និង Jonathan Bailey និងត្រៀមចេញបញ្ចាំងនៅដើមខែកក្កដា។
២. How To Train Your Dragon
ស្ទូឌីយ៉ូហូលីវូដដដែលនេះក៏បានចេញផ្សាយឈុតខ្លីៗសម្រាប់ភាពយន្ត “How To Train Your Dragon” ដែលថតតាមភាពយន្តគំនូរជីវចល DreamWorks ឆ្នាំ ២០១០ ប៉ុន្តែជា Version មនុស្សសម្ដែង និងត្រៀមចេញបញ្ចាំងនៅពាក់កណ្ដាលខែមិថុនា។
៣. Mission: Impossible: The Final Reckoning
បន្ទាប់ពីវគ្គ៧ កាលពីឆ្នាំ២០២៣ កំពូលតារាហូលីវូដ Tom Cruise នឹងត្រលប់មកសម្តែងជាភ្នាក់ងារសម្ងាត់ម្ដងទៀតក្នុងវគ្គប្រាំបីនៃរឿង “Mission: Impossible” មានចំណងជើងថា “The Final Reckoning” ត្រៀមចេញបញ្ចាំងនៅចុងខែឧសភា។
៤. Thunderbolts*
ក្រឡេកមើលស្ទូឌីយោ Walt Disney Pictures បានចេញផ្សាយឈុតខ្លីៗសម្រាប់រឿង “Thunderbolts*” ជាភាពយន្តបាញ់ប្រហារនិយាយអំពី Supervillain មួយក្រុមដែលត្រូវបានជ្រើសរើសសម្រាប់បេសកកម្មរដ្ឋាភិបាល។ ភាពយន្តនេះត្រៀមចេញបញ្ចាំងនៅដើមខែឧសភា។
៥. The Amateur
សម្រាប់អ្នកគាំទ្រតារាសម្ដែង Rami Malek វិញ ក៏បានឃើញឈុតខ្លីៗដំបូងនៃរឿង “The Amateur” ជាភាពយន្តនិយាយពីភ្នាក់ងារ CIA ម្នាក់ដែលជីវិតធ្លាក់ចុះនៅពេលប្រពន្ធរបស់ខ្លួនស្លាប់ក្នុងការវាយប្រហារភេរវកម្មនៅទីក្រុងឡុងដ៍។ រឿងនេះត្រៀមចេញបញ្ចាំងនៅពាក់កណ្ដាលខែមេសា ៕


























Account
Security
Favourite Content