តារាសម្ដែងនិងជាគ្រូក្បាច់គុនដ៏ល្បីល្បាញរបស់ហុងកុង Sammo Hung កាលពីពេលថ្មីៗនេះ ត្រូវបានគេចោទសួរម្ដងទៀតអំពីការចាកចេញរបស់លោកពីខ្សែភាពយន្ត “Kung Fu Hustle” របស់តារាសម្ដែង Stephen Chow (ទិនហ្វី) កាលពីឆ្នាំ២០០៤។ គេនៅចាំបានថា ពេលនោះលោកគឺជាអ្នកដឹកនាំផ្នែកក្បាច់គុនសម្រាប់ភាពយន្តនេះ ប៉ុន្តែក៏បានចាកចេញពីតួនាទីទាំងដែលភាពយន្តមិនទាន់ថតចប់ ដែលនាំឱ្យមានពាក្យចចាមអារ៉ាមជាច្រើនអំពីការបែកបាក់ទំនាក់ទំនងរវាងលោក និង ទិនហ្វី។

នៅក្នុងបទសម្ភាសមួយជាមួយតារាហុងកុង Manfred Wong កាលពីពេលថ្មីៗនេះ តារាសម្ដែង Sammo Hong បានធ្វើការបកស្រាយថាមូលហេតុដែលលោកដើរចេញពាក់កណ្ដាលទីកំលុងពេលថតនៅសៀងហៃនោះគឺដោយសារតែបញ្ហាសុខភាព។ ដោយសារកាលនោះគឺជារដូវក្ដៅ អាកាសធាតុក៏លំបាក និងមានមូសច្រើនខ្លាំង ពេលនោះលោកត្រូវមូសខាំ នាំឱ្យហើម និងរមាស់ពេញខ្លួន ដែលតម្រូវឱ្យលោកត្រលប់ទៅហុងកុងវិញដើម្បីសម្រាកព្យាបាល។ ប៉ុន្តែដោយសារការព្យាបាលរបស់លោកចំណាយពេលច្រើនជាងមួយសប្ដាហ៍ Stephen Chow ក៏ប្រាប់ឱ្យលោកមិនបាច់ត្រលប់ទៅវិញនោះទេ និងបានរកគ្រូបង្វឹកក្បាច់គុនផ្សេងមកជំនួសលោក។ នៅពេលពិធីករសួរ ថាតើលោកយល់យ៉ាងណាចំពោះ ទីនហ្វី លោកក៏បានឆ្លើយយ៉ាងខ្លីថា “លោកមិនចង់វាយតម្លៃអ្វីទេ”។

ទោះបីមានបញ្ហាពាក់កណ្ដាលទីក៏ដោយ ប៉ុន្តែការរួមចំណែករបស់ Sammo Hung ក្នុង “Kung Fu Hustle” នៅតែគួរឱ្យកត់សម្គាល់ ហើយឈ្មោះរបស់លោកក៏នៅតែមាននៅក្នុងបញ្ជីឈ្មោះអ្នកផលិតនិងក្រុមការងារនៅចុងបញ្ចប់រឿងផងដែរ។


ទោះបីបច្ចុប្បន្នមានអាយុ ៧២ ឆ្នាំហើយក្ដី ប៉ុន្តែតារាសម្ដែងជើងចាស់រូបនេះនៅតែត្រូវបានចងចាំនិងទទួលការគាំទ្រចំពោះស្នាដៃរបស់លោក។ ជាក់ស្ដែងថ្មីៗនេះ លោកបានទទួលពានរង្វាន់សមិទ្ធផលពេញមួយជីវិតពីកម្មវិធីពានរង្វាន់ភាពយន្តអាស៊ី Asian Film Awards ឆ្នាំ ២០២៣ និងពីកម្មវិធីពានរង្វាន់ភាពយន្តហុងកុង Hong Kong Film Award ឆ្នាំ២០២៤។ មិនតែប៉ុណ្ណោះ ភាពយន្តថ្មីចុងក្រោយរបស់លោកមានចំណងជើងថា “Twilight of the Warriors: Walled In” ក៏បានទទួលជោគជ័យណាស់ដែរលើតារាង Box Office ចិន ៕




























Account
Security
Favourite Content