ក្រុមហ៊ុន Netflix ដែលធ្លាប់ត្រូវបានស្គាល់ថាជាអ្នកចាយលុយខ្ពស់បំផុតសម្រាប់ការផលិតរឿងនៅក្នុងប្រទេសកូរ៉េដោយផ្តល់ជូននូវថ្លៃឈ្នួលតារាសម្ដែងខ្ពស់កប់ពពក ឥឡូវនេះត្រូវបានរាយការណ៍ថាបានដាក់កម្រិតការចំណាយតឹងរ៉ឹងជាងមុន។

យោងតាមរបាយការណ៍របស់សារព័ត៌មាន OSEN កាលពីថ្ងៃទី ១២ ខែកញ្ញា ក្រុមហ៊ុន Streaming ដ៏ធំនេះបានទម្លាក់ប្រាក់ឈ្នួលខ្ពស់បំផុតសម្រាប់តួសម្តែងរឿងភាគ និងភាពយន្តកូរ៉េពីប្រហែល 400 លានវ៉ុន (ប្រហែល 290,000 ដុល្លារ) មកត្រឹម 300 លានវ៉ុន (ប្រហែល 220,000 ដុល្លារ) ក្នុងមួយភាគ។
ទោះបីជាទឹកប្រាក់ប្រហែល 220,000 ដុល្លារនេះ នៅតែជាតួលេខដ៏ច្រើនក៏ដោយ តែនេះក៏ជាការធ្លាក់ចុះគួរឱ្យកត់សម្គាល់ បើធៀបនឹងឆ្នាំមុននៅពេលដែលថ្លៃឈ្នួលបានកើនឡើងលើសពី 1 ពាន់លានវ៉ុន (ប្រហែល 730,000 ដុល្លារ) ក្នុងមួយភាគសម្រាប់តារាលំដាប់កំពូល។ អ្នកស្ថិតក្នុងឧស្សាហកម្មផ្ទាល់បានលើកឡើងថាការផ្លាស់ប្តូរនេះឆ្លុះបញ្ចាំងពីយុទ្ធសាស្រ្តរបស់ Netflix ក្នុងការទប់ស្កាត់ដើមទុនផលិតដែលកំពុងកើនឡើងរហូតដល់មានការរិះគន់ជាច្រើនពីអ្នកបណ្ដាផលិតក្នុងស្រុក។
ការផ្លាស់ប្តូរនេះកើតឡើងស្របពេល Byeon Woo Seok ដែលទទួលបានភាពល្បីល្បាញជាអន្តរជាតិជាមួយនឹងរឿងភាគល្បី ‘Lovely Runner’ បានបញ្ជាក់ពីការចូលសម្ដែងក្នុងរឿងភាគ Netflix ដំបូងគឺរឿង ‘Solo Leveling’ ។ ខណៈប្រជាប្រិយភាពកំពុងកើនឡើងរបស់លោកបានជំរុញឱ្យមានការរំពឹងទុកអំពីប្រាក់ឈ្នួលបំបែកកំណត់ត្រា អ្នកស្ថិតក្នុងឧស្សាហកម្មជឿជាក់ថាលោកទំនងជាទទួលបានទាបជាងតម្លៃកំណត់ថ្មីនេះ។
ទោះយ៉ាងណា ការលើកលែងនៅតែមាន ដោយតម្លៃតួសម្តែងអាចប្រែប្រួលអាស្រ័យលើទំហំគម្រោង ហើយការផលិតតាមរដូវកាលរបស់ Netflix ច្រើនតែបង្កើនប្រាក់ឈ្នួលរហូតដល់ 40 ភាគរយខ្ពស់ជាងកិច្ចសន្យាដំបូង ដែលអនុញ្ញាតឱ្យមានភាពបត់បែននៅក្នុងករណីមួយចំនួន។

ជាច្រើនឆ្នាំកន្លងមកនេះ ក្រុមហ៊ុន Netflix ត្រូវបានសាទរថាជាកម្លាំងជំរុញនៅពីក្រោយការរីកចំរើនជាសកលនៃមាតិកាកូរ៉េ។ ទន្ទឹមនឹងនេះដែរ អ្នករិះគន់បានលើកឡើងថា ការចំណាយរបស់ពួកគេបានបំប៉ោងតម្លៃផលិតកម្ម និងតម្លៃខ្លួនតារាសម្ដែង ហើយច្របាច់កទីផ្សារសម្រាប់ផលិតករក្នុងស្រុកវិញ។ តួយ៉ាងដូចជារឿងភាគ ‘When Life Gives You Tangerines’ ដែលចាយទុន 60 ពាន់លានវ៉ុន (ប្រហែល 44 លានដុល្លារ) និង ‘Squid Game’ ចាយទុន 100 ពាន់លានវ៉ុន (ប្រហែល 77 លានដុល្លារ) បានបង្ហាញពីការកើនឡើងយ៉ាងខ្លាំងនៃដើមទុនសម្រាប់ការផលិតរឿងកូរ៉េ។ ជាលទ្ធផល ទិន្នន័យឧស្សាហកម្មបង្ហាញថា ការផលិតរឿងភាគកូរ៉េបានធ្លាក់ចុះយ៉ាងខ្លាំង ពី 141 រឿងក្នុងឆ្នាំ 2022 មកនៅត្រឹម 80 រឿងក្នុងឆ្នាំនេះ។
បញ្ហានេះបានធ្វើឱ្យមានការចាប់អារម្មណ៍កាន់តែខ្លាំង នៅពេលមានសេចក្ដីរាយការណ៍អះអាងថាតារាសម្ដែងរឿង ‘Squid Game’ Lee Jung Jae អាចទទួលបានប្រាក់ឈ្នួល 1.3 ពាន់លានវ៉ុន (ប្រហែល 1 លានដុល្លារ) ក្នុងមួយភាគសម្រាប់រដូវកាលទី 2 ។ ក្នុងបទសម្ភាសន៍កាលពីខែមករា លោកបានសារភាពថាពាក្យចចាមអារ៉ាមនេះគឺ “បំផ្លើសបន្តិច” ប៉ុន្តែបានទទួលស្គាល់ថាលោកបានទទួលប្រាក់ឈ្នួលច្រើនជាងមុនពិតមែន ៕


























Account
Security
Favourite Content