អ្នកគាំទ្រទូទាំងពិភពលោកបានបង្ហាញក្ដីនឹករឭកនិងសោកស្ដាយចំពោះការចាកចេញភ្លាមៗរបស់តារាចម្រៀងអង់គ្លេស Liam Payne ដោយបានចូលស្ដាប់បទចម្រៀងរបស់លោកទាំងបទទោល និងបទចម្រៀងក្នុងក្រុម One Direction រហូតធ្វើឱ្យបទជាច្រើនត្រលប់មកជាប់ចំណាត់ថ្នាក់កំពូលជាថ្មីលើវេទិកាស្ដាប់ចម្រៀង Spotify។

មុនទទួលមរណភាពកាលពីសប្តាហ៍មុន Liam Payne មានអ្នកស្តាប់ប្រចាំខែ ៤,៧ លាននាក់នៅលើកម្មវិធី Spotify ប៉ុន្តែចំនួននោះបានកើនឡើងជិតទ្វេដងរហូតដល់ ៨ លាននាក់នៅពេលនេះ។ លើសពីនេះ បទចម្រៀងដំបូងរបស់លោកមានចំណងជើងថា “Strip That Down” ដែលចេញកាលពីឆ្នាំ ២០១៩ បានទទួលការស្ដាប់បន្ថែមជាង ៨ សែនដង។

មិនតែប៉ុណ្ណោះ តួលេខនេះក៏កំពុងកើនឡើងដែរសម្រាប់ក្រុម One Direction ដែលធ្លាប់មានអ្នកស្តាប់ប្រចាំខែខ្ទង់ ៤២ លាននាក់ តែឥឡូវនេះឡើងដល់ជិត ៥០ លាននាក់ ខណៈបទចម្រៀងកំពូលៗទាំង ៣ របស់ពួកគេ ដូចជាបទ “Night Changes” “Story of My Life” និងបទ “What Makes You Beautiful” សុទ្ធសឹងទទួលបានការស្ដាប់បន្ថែមពី ១៣ ទៅ ១៧ លានដងទៀតក្នុងសប្ដាហ៍ចុងក្រោយ។
ផ្អែកតាមសេចក្ដីរាយការណ៍កន្លងមក តារាចម្រៀង Liam Payne បានទទួលមរណភាពក្នុងវ័យ ៣១ឆ្នាំ ក្រោយធ្លាក់ពីរានហាលសណ្ឋាគារជាន់ទី៣ ក្នុងទីក្រុងប៊ុយណូស៊ែ ប្រទេសអាហ្សង់ទីនកាលពីថ្ងៃទី១៦ ខែតុលា។ លទ្ធផលកោសល្យវិច័យបានបង្ហាញថាក្នុងរាងកាយរបស់លោកមានផ្ទុកសារធាតុញៀនដូចជាកូកាអ៊ីន និង Crack នៅពេលស្លាប់។
នៅថ្ងៃទី១៧ ខែតុលា ពោលគឺមួយថ្ងៃបន្ទាប់ពីការស្លាប់របស់ Liam Payne បទចម្រៀងរបស់ One Direction បានទទួលការចូលស្ដាប់សរុបរហូតដល់ ៥៧,៥ លានដង ដែលជាតួលេខប្រចាំថ្ងៃខ្ពស់បំផុតក្នុងប្រវត្តិសាស្ត្រ Spotify បើទោះបីអ្នកគាំទ្រជាច្រើនបានបង្ហោះសារលើបណ្ដាញសង្គមថាពួកគេមិនទាន់អាចស្ដាប់បទចម្រៀងរបស់លោក ព្រោះរន្ធត់ចិត្តខ្លាំងពេកក៏ដោយ ៕





























Account
Security
Favourite Content