ក្រោយបាត់មុខមួយរយៈដោយសារជម្លោះចម្រូងចម្រាសជាមួយផលិតកម្ម SM ស្ថាបនិក និងជាអតីតកំពូលផលិតកររបស់ផលិតកម្មនេះគឺលោក Lee Soo-man បានបង្ហាញមុខជាសាធារណៈវិញជាផ្លូវការជាមួយនឹងការចាក់បញ្ចាំងភាពយន្តឯកសារថ្មីរបស់លោកផលិតដោយក្រុមហ៊ុនហូលីវូដមានចំណងជើងថា “Lee Soo Man: King of K-Pop” ។

រៀបចំឡើងនៅតំបន់ Hollywood ក្នុងរដ្ឋកាលីហ្វ័រញ៉ា កម្មវិធីសម្ពោធ និងជប់លៀងពិសេសសម្រាប់ភាពយន្តសម្រាប់ចាក់ផ្សាយលើកម្មវិធី Amazon Prime មួយនេះរួមមានវត្តមានរបស់បុគ្គលល្បីៗ ៣០០ រូបពីឧស្សាហកម្មតន្ត្រី និងភាពយន្ត ដែលរួមមានទាំងតារាសម្តែង តារាចម្រៀង ពិធីករ តារាម៉ូដែល និង Influencers ជាច្រើន។ ជាពិសេសក្នុងចំណោមនោះក៏មានសិល្បករ K-pop កំពូលៗជាច្រើនរូបដែលលោកធ្លាប់ធ្វើការជាមួយកំឡុងពេលលោកស្ថិតនៅផលិតកម្ម SM មានដូចជា Si-won ក្រុម Super Junior, Taemin ក្រុម SHINee និងសមាជិក Girls’ Generation ដូចជា Tiffany, Hyoyeon និង Sunny។


សមាជិកនៃក្រុមនារីអន្តរជាតិថ្មីក្នុងក្រុមហ៊ុនថ្មីរបស់លោកមានឈ្មោះថា A2O រួមមានក្រុម A2O Rookies និង A2O May ក៏បានបង្ហាញវត្តមានជាមួយគ្នាផងដែរ។
ត្រូវបានគេស្គាល់ថាជាអ្នកត្រួសត្រាយផ្លូវសម្រាប់តារា K-pop តាំងជំនាន់ទី ១ លោក Lee Soo-man បានដើរតួនាទីយ៉ាងសំខាន់សម្រាប់ភាពល្បីល្បាញជាសកលនៃវិស័យចម្រៀងកូរ៉េ។ យ៉ាងណាមិញ លោកបានចាកចេញពីផលិតកម្ម SM Entertainment ក្នុងឆ្នាំ ២០២៣ បន្ទាប់ពីមានជម្លោះក្នុងជួរថ្នាក់ដឹកនាំ។ នៅឆ្នាំដដែលនោះ លោកបានលក់ភាគហ៊ុនរបស់លោកនៅក្នុងក្រុមហ៊ុន SM ទៅឱ្យក្រុមហ៊ុន HYBE ហើយក្រោមលក្ខខណ្ឌនៃការលក់ភាគហ៊ុននោះ លោកបានយល់ មិនប្រកួតប្រជែងក្រុមហ៊ុនក្នុងប្រទេសកូរ៉េខាងត្បូងរយៈពេល ៣ ឆ្នាំ ជាហេតុធ្វើឱ្យលោកចាប់ផ្ដើមបង្កើតក្រុមចម្រៀងនៅក្រៅប្រទេសវិញ។
ខណៈពេលដែលសកម្មភាពក្នុងស្រុករបស់លោកមានកម្រិតតិចតួច ការបញ្ចាំងភាពយន្តឯកសារនេះ និងការជួបជុំរបស់លោកជាមួយអតីតសិល្បករ SM បានបង្កការចាប់អារម្មណ៍យ៉ាងខ្លាំង និងមានការរំពឹងថាលោកនឹងសហការជាមួយពួកគេក្នុងពេលឆាប់ៗ ៕























Account
Security
Favourite Content