ភាពយន្ត “The Conjuring: Last Rites” អាចរកចំណូលសម្រាប់សប្ដាហ៍ដំបូងខ្ពស់ជាងការរំពឹងទុក ហើយឥឡូវនេះបានគ្រងចំណាត់ថ្នាក់ចំណូលសប្ដាហ៍បើកឆាកខ្ពស់បំផុតក្នុងប្រវត្តិសាស្ត្រសម្រាប់ភាពយន្តភ័យរន្ធត់។

យោងតាមរបាយការណ៍ Box Office Mojo ភាពយន្តទីប្រាំបួនពីសែស្រឡាយរឿង The Conjuring របស់ផលិតកម្ម Warner Bros. និង New Line អាចប្រមូលចំណូលបាន ១៩៤ លានដុល្លារទូទាំងពិភពលោកពីការចេញបញ្ចាំងនាចុងសប្តាហ៍ដំបូង លើសពីការរំពឹងទុករបស់អ្នកជំនាញដែលបានព្យាករថានឹងអាចរកបានច្រើនបំផុត ១៨៧ លានដុល្លារ។ តួលេខនៃចំណូលនេះបានបំបែកកំណត់ត្រារបស់ភាពយន្ត “It” ដែលអាចរកចំណូលបាន ១៩០ លានដុល្លារកាលពីឆ្នាំ២០១៧។ ជាមួយការចំណាយទុនផលិតត្រឹម ៥៥ លានដុល្លារ ចំណូលនេះត្រូវបានចាត់ទុកថាជាការចំណេញយ៉ាងជោគជ័យបាត់ទៅហើយសម្រាប់ Warner Bros។
លើសពីនេះ “The Conjuring: Last Rites” ក៏បានបង្កើតកំណត់ត្រាចំណូលខ្ពស់បំផុតសម្រាប់ភាពយន្តភ័យរន្ធត់នៅទីផ្សារអន្តរជាតិផងដែរ ដោយអាចរកបាន ១១០ លានដុល្លារក្នុងសប្ដាហ៍ដំបូងរបស់ខ្លួន ខណៈអ្នកកាន់កាប់កំណត់ត្រានេះពីមុនគឺ រឿង “It: Chapter Two” អាចរកបាន ៩២ លានដុល្លារ កាលពីឆ្នាំ២០១៩។ នៅសហរដ្ឋអាមេរិកដែលជាទីផ្សារក្នុងស្រុក ភាពយន្ត “Conjuring” វគ្គចុងក្រោយនេះអាចរកបាន ៨៤ លានដុល្លារ ដែលនេះចំណូលបើកឆាកខ្ពស់បំផុតទីបីសម្រាប់ភាពយន្តភ័យរន្ធត់ បន្ទាប់ពីរឿង “It” ក្នុងឆ្នាំ ២០១៧ អាចរកបាន ១២៣ លានដុល្លារ និងរឿង “It: Chapter Two” ឆ្នាំ ២០១៩ អាចរកបាន ៩១ លានដុល្លារ។
ដឹកនាំដោយផលិតករជើងចាស់ Michael Chaves រឿង “The Conjuring: Last Rites” មានការវិលត្រលប់របស់តារាសម្ដែង Patrick Wilson និង Vera Farmiga មកដើរតួជាប្ដីប្រពន្ធ Ed និង Lorraine Warren ដដែលក្នុងនាមជាអ្នកស៊ើបអង្កេតដែលប៉ុនប៉ងកម្ចាត់បិសាចចេញពីផ្ទះរបស់គ្រួសារមួយ។ លោក James Wan ដែលជាអ្នកបង្កើត Franchise រឿងនេះព្រមទាំង Peter Safran បានត្រលប់មកវិញជាផលិតករ។ គួរបញ្ជាក់ថា ចក្រវាល “Conjuring” ដែលរួមមានស៊េរីភាពយន្តជាច្រើនទៀតដូចជា “The Nun” និង “Annabelle” គឺជា Franchise រឿងភ័យរន្ធត់ដែលរកចំណូលបានខ្ពស់បំផុតក្នុងប្រវត្តិសាស្ត្រ ពោលគឺរហូតដល់ ២.៣ ពាន់លានដុល្លារ ៕


























Account
Security
Favourite Content