ទោះបីជារឿង The Odyssey របស់អ្នកដឹកនាំ Christopher Nolan នឹងចាក់ផ្សាយនៅថ្ងៃទី១៧ ខែកក្កដា ឆ្នាំ២០២៦ ក្ដី តែសំបុត្រកុនប្រភេទ IMAX 70mm ប្រមាណ ៩៥ភាគរយបានលក់ចេញរួចរាល់ហើយ ដោយបច្ចុប្បន្នមានអ្នកបានដាក់លក់បន្តវិញក្នុងតម្លៃដល់ទៅ ១០០០ ដុល្លារអាមេរិក។

យោងតាមសារព័ត៌មាន Variety សំបុត្រកុនរឿង Odyssey បានលក់ចេញជាច្រើនសំបុត្រក្នុងពេលមួយម៉ោង ហើយពេលនេះ អ្នកដែលបានទិញទាន់ កំពុងតែដាក់លក់សំបុត្រនេះឡើងវិញ ក្នុងតម្លៃខ្ពស់ជាងមុនរាប់រយដង។
តួយ៉ាង សំបុត្រមួយសម្រាប់ទស្សនាភាពយន្តនេះនៅយប់ថ្ងៃអាទិត្យ ឯរោងភាពយន្ត Cinemark ទីក្រុង Dallas បានឡើងថ្លៃប្រមាណ ៤០០ ភាគរយពីតម្លៃដើម ស្របពេលដែលសំបុត្រសម្រាប់ថ្ងៃសៅរ៍ ឯរោងភាពយន្ត AMC Lincoln Square ក្នុងទីក្រុងញូវយ៉ក បានដាក់ឱ្យដេញថ្លៃក្នុងតម្លៃចាប់ពី ១ពាន់ដុល្លារឡើងទៅសម្រាប់ ៤សំបុត្រ។
Variety បានឱ្យដឹងបន្ថែមថា តម្រូវការសម្រាប់សំបុត្ររឿង The Odyssey មិនមែនគ្រាន់តែទស្សនិកជនចង់ទស្សនាភាពយន្តថ្មីរបស់ Christopher Nolan ប៉ុណ្ណោះទេ ប៉ុន្តែដោយសារតែភាពយន្តនេះជាភាពយន្តដែលចាក់ផ្សាយក្នុងទម្រង់ថ្មីគឺ IMAX 70mm និងជាភាពយន្តដំបូងដែលថតដោយកាមេរ៉ា IMAX ទាំងស្រុង។

គួរឱ្យដឹងផងដែរថា The Odyssey គឺជាភាពយន្តដែលផលិតឡើងផ្អែកតាមអក្សរសិល្ប៍ក្រិកបុរាណរបស់ Homer និយាយពីរឿងរ៉ាវការធ្វើដំណើរត្រឡប់មកផ្ទះវិញពេញដោយឧបសគ្គ របស់ Odysseus សម្ដែងដោយ Matt Damon ដែលចំណាយពេលដល់ទៅ ១០ឆ្នាំ។
ភាពយន្តមួយចំណងជើងនេះ ក៏មានការចូលរួមសម្ដែងដោយតារាល្បីឈ្មោះជាច្រើនរូបទៀតដែរ ដូចជា Tom Holland, Zendaya, Anne Hathaway, Lupita Nyong’o, Robert Pattinson និង Charlize Theron ជាដើម៕



























Account
Security
Favourite Content