បន្ទាប់ពីទុកឱ្យអ្នកគាំទ្ររង់ចាំអស់ជាយូរ ទីបំផុតសមាជិកក្រុម Blackpink Lisa បានប្រកាសធ្វើការវិលត្រលប់មកឆាកតន្ត្រីវិញជាមួយបទចម្រៀងទោលថ្មីលើកដំបូង ក្នុងរយៈពេលជិត ៣ឆ្នាំ។ នេះបើផ្អែកតាមក្រុមហ៊ុន Sony Music Entertainment Korea បានឱ្យដឹងនៅថ្ងៃទី១៤ ខែមិថុនានេះ។

សូមបញ្ជាក់ថា ការចេញបទចម្រៀងលើកនេះនឹងជាការវិលត្រលប់ក្នុងនាមជាតារាទោលលើកដំបូងក្នុងរយៈពេលជិត ៣ឆ្នាំរបស់សមាជិកកូនពៅក្រុម Blackpink ចាប់តាំងពីអាល់ប៊ុមទោលដំបូងរបស់នាងមានចំណងជើង “Lalisa” បានចេញផ្សាយនៅក្នុងខែកញ្ញា ២០២១ ។
ម្ចាស់បទ “Money” ក៏បានបង្ហោះវីដេអូឃ្លីបមួយនៅរសៀលថ្ងៃព្រហស្បតិ៍នៅគណនី TikTok ជាមួយនឹងបទចម្រៀង background មានចំណងជើងថា “Teaser”។ នៅលើគេហទំព័រផ្លូវការរបស់ខ្លួន Lisa ក៏បានប្រកាសពីការវិលត្រឡប់លកនេះ ជាមួយពាក្យថា “Coming Soon” រួមជាមួយនឹងតំណភ្ជាប់ដើម្បីចូលស្ដាប់និងទាញយកបទចម្រៀងរបស់នាងដែលត្រៀមចេញនៅលើវេទិកាស្ទ្រីមតន្ត្រីនានាដូចជា Spotify និង Apple Music ។
បង្ហាញខ្លួនជាសមាជិកក្រុម Blackpink ក្រោមផលិតកម្ម YG Entertainment ក្នុងឆ្នាំ ២០១៦ រហូតដល់ខែកុម្ភៈ ឆ្នាំនេះ Lisa បានចេញបង្កើតផលិតកម្មផ្ទាល់ខ្លួនរបស់នាងគឺ Lloud Co.ដើម្បីគ្រប់គ្រងសកម្មភាពទោលរបស់ខ្លួន។ កាលពីខែមេសា ផលិតកម្មរបស់នាងបានចាប់ដៃគូជាមួយផលិតកម្ម RCA Records របស់សហរដ្ឋអាមេរិក ក្រោមក្រុមហ៊ុន Sony Music Entertainment សម្រាប់ការផ្សព្វផ្សាយរបស់នាងនៅទីផ្សារអន្តរជាតិ។
ក្រៅពីត្រៀមបញ្ចេញអាល់ប៊ុមចម្រៀង Lisa ក៏នឹងបង្ហាញខ្លួនក្នុងនាមជាតារាសម្ដែងលើកដំបូង តាមរយៈការដើរតួនៅក្នុងរដូវកាលទី ៣ នៃរឿងភាគ “The White Lotus” របស់ប៉ុស្តិ៍ HBO ក្នុងពេលឆាប់ៗខាងមុខនេះដែរ ៕























Account
Security
Favourite Content