បទចម្រៀង APT. ដែលជាស្នាដៃរួមគ្នាដំបូងបង្អស់របស់តារាចម្រៀងខេប៉ុបរបស់កូរ៉េខាងត្បូង Rosé និងតារាចម្រៀងប៉ុបរបស់អាមេរិក Bruno Mars បានបំផុសគំនិតចេញពីល្បែងកម្សាន្តរបស់យុវវ័យកូរ៉េ “Apartment Game”។

ជាស្នាដៃនិពន្ធទំនុកច្រៀងដោយខ្លួនឯងផ្ទាល់ Rosé បានបញ្ចូលល្បែងកម្សាន្តដែលនាង ក៏ដូចជាយុវវ័យកូរ៉េខាងត្បូងជាច្រើនរូបទៀតនិយមលើកយកមកលេងនៅពេលដែលមានការជួបជុំញ៉ាំអីជុំគ្នាម្ដងៗ ដោយហេតុថា ហ្គេមមួយនេះមិនទាមទារឱ្យមានឧបករណ៍ចាំបាច់ និងលក្ខន្តិកៈសាំញ៉ាំអ្វីនោះទេ។ បើទោះបីជាបែបនេះក្ដី ក៏ប៉ុន្តែ Apartment Game ពិតជាអាចធ្វើឱ្យបរិយាកាសនៃការជួបជុំកាន់តែរីករាយមួយកម្រិតបន្ថែមទៀត។

ដោយឡែកសម្រាប់វិធីសាស្រ្តក្នុងការលេងល្បែងមួយនេះវិញ ចាប់ផ្ដើមពីការប្រមូលអ្នកលេងមកអង្គុយជុំគ្នាជារង្វង់ហើយច្រៀងចម្រៀងនៃល្បែងមួយនេះ ដែលមានលំនាំដូចជាវគ្គផ្ដើមនៅក្នុងបទ APT. អ៊ីចឹង រួចអ្នកលេងទាំងអស់ត្រូវដាក់ប្រអប់ដៃលើគ្នាជាជាន់ៗដូចជាអាផាតមិន ទើបសម្រេចគ្នាកំណត់យកលេខជាន់នៃអាផាតមិននោះ។
បន្ទាប់ពីបានលេខហើយ សមាជិកដែលមានដៃនៅខាងក្រោមគេចាប់ផ្ដើមយកប្រអប់ដៃមកដាក់ខាងលើគេវិញម្ដងរួចចាប់ផ្ដើមរាប់ពីលេខមួយទៅ។ អ្នកបន្ទាប់ក៏ត្រូវបន្តធ្វើដូចគ្នាដែរ រហូតរាប់ដល់លេខដែលបានកំណត់ទើបចប់ល្បែងកម្សាន្តនេះបាន។ តួយ៉ាង បើសិនជាអ្នកលេងមូលមតិគ្នាថាយកលេខ ២០ នោះអ្នកដែលត្រូវដាក់ដៃនៅខាងលើចំលេខ២០ ជាអ្នកចាញ់ និងត្រូវលើកដាច់ឱ្យអស់ពីកែវតែម្ដង។

នៅពេលដែលពន្យល់សាច់រឿងពីក្រោយបទមួយនេះជាមួយនឹង The Black Label សមាជិក BLACKPINK រូបនេះបាននិយាយថា ខ្លួនក៏បានបង្រៀនក្រុមការងារឱ្យចេះលេងល្បែងមួយនេះផងដែរ ហើយពួកគេបានចាប់អារម្មណ៍នឹងល្បែងមួយនេះជាខ្លាំង។ ដូច្នេះហើយ ទើបនាងសម្រេចចិត្តសរសេរបទមួយនេះឡើងមក។
ជាក់ស្ដែង ១ថ្ងៃមុនបទចម្រៀងចេញ Bruno Mars ក៏បានបង្ហោះរូបភាពដែលពួកគេលេង Apartment Game នៅលើគណនី Instagram របស់ខ្លួនដែរ ដោយមិនភ្លេចប្រាប់ថា Rosé ជាអ្នកណែនាំដល់ខ្លួន៕
























Account
Security
Favourite Content