ផលិតកររឿង The White Lotus លោក David Bernad បានឱ្យដឹងថា តួសម្ដែងសំខាន់ៗនៅក្នុងរដូវកាលទី ៣ ទាំងអស់ ទទួលបានតម្លៃខ្លួនស្មើគ្នា ដោយឥតប្រកែកបាន ព្រោះលោកចង់ឱ្យម្នាក់ៗមានសិទ្ធិស្មើគ្នា។

នៅថ្ងៃទី៨ ខែមេសានេះ ភាពយន្តភាគកំពូលប្រជាប្រិយភាព The White Lotus រដូវកាលទី ៣ ទើបតែបានបញ្ចេញភាគបញ្ចប់របស់ខ្លួន ដោយភាពយន្តមួយចំណងជើងនេះ ក៏ជាស្នាដៃសម្ដែងទី១របស់ តារាខេប៉ុបសញ្ជាតិថៃ Lalisa Manobal ផងដែរ។
ដ្បិត រឿងភាគនេះនិយាយពីដំណើរកម្សាន្តរបស់អ្នកមាន និងជាភាពយន្តរបស់ផលិតកម្មយក្ស Warner Bros ក្ដី តែតួសម្ដែងម្នាក់ៗសុទ្ធតែទទួលបានតម្លៃខ្លួនដូចគ្នា និងមិនខ្ពស់ដូចរឿងរបស់ Hollywood ដទៃទៀតទេ។ ជាក់ស្ដែងមិនថា តួធំដូចជា Walton Goggins និង Carrie Coon ឬតួជំនាន់ថ្មីដូចជា Lisa និង Sam Nivola សុទ្ធតែទទួលបានតម្លៃខ្លួនសរុបស្មើគ្នាក្នុងទំហំ ៣២ម៉ឺនដុល្លារអាមេរិក ឬ ៤ម៉ឺនដុល្លារអាមេរិកក្នុង ១ភាគ។

តាមរយៈកិច្ចសម្ភាសន៍ជាមួយ The Hollywood Reporter លោក David Bernad បាននិយាយថា៖ “អ្នកគ្រប់គ្នាទទួលបានការឱ្យតម្លៃស្មើៗគ្នានៅក្នុងរឿង The White Lotus។ ពួកគាត់ទទួលបានថ្លៃខ្លួនដូចគ្នា ហើយយើងបានរៀបឈ្មោះអ្នកសម្ដែងទៅតាមលំដាប់តួអក្សរ”។
ផលិតកររូបនេះបានពន្យល់ពីហេតុផលថា៖ “ដោយសារតែយើងត្រូវការអ្នកដែលមក ព្រោះតែចង់ចូលរួមក្នុងគម្រោងនេះពិតៗ មិនមែនមកដើម្បីកេរ្តិ៍ឈ្មោះ ឬកម្រៃនោះទេ។ វាជាប្រព័ន្ធដែលយើងកសាងឡើងតាំងតែពីរដូវកាលដំបូង ព្រោះពេលនោះយើងសឹងតែគ្មានលុយធ្វើរឿងនេះផង”។

លោក Meredith Tucker ប្រធានផ្នែកជ្រើសរើសតួសម្ដែងបានអធិប្បាយថា ត្បិតទទួលបានតិចមែន តែថ្លៃខ្លួនដែលរឿងផ្ដល់ឱ្យអ្នកសម្ដែង គឺត្រឹមត្រូវទៅតាមស្ដង់ដា ដោយលោកបាននិយាយបន្ថែមថា៖ “ការធ្វើបែបនេះ វាធ្វើឱ្យការងារនេះស្រួលជាងមុនមែនទែន ព្រោះយើងគ្រាន់តែប្រាប់តួសម្ដែងតាមហ្នឹង ហើយអ្នកធ្វើបានក៏ធ្វើ អ្នកធ្វើមិនបានក៏មិនបាច់ធ្វើ។ និយាយស្មោះត្រង់ទៅ ខ្ញុំក៏យល់ដែរ ព្រោះអ្នកខ្លះគាត់ពិតជាត្រូវធ្វើការរកស៊ីមែន”។
បន្តពីនេះ The Hollywood Reporter ក៏បានរំឭកផងដែរថា តារាជួរមុខលោក Woody Harrelson ដែលធ្លាប់ត្រូវបានជ្រើសរើសឱ្យសម្ដែងជាតួ Rich Hatchett មុននឹងផ្លាស់ប្ដូរមកជាលោក Walton Goggins ដោយសារបញ្ហាមមាញឹក ក៏ធ្លាប់បានចរចាថ្លៃខ្លួនជាមួយនឹងលំដាប់ CEO របស់ Warner Bros ដែរ តែលោកនៅតែទទួលបានតម្លៃខ្លួនដូចដើម ស្មើគ្នានឹងតួដទៃទៀត៕
























Account
Security
Favourite Content