ក្រៅពីរឿងល្អមើល តួស្អាត រឿងមួយទៀត ដែលភាគយន្តភាគកូរ៉េធ្វើបានល្អមិនចាញ់គ្នានោះ គឺការបង្ហាញមុខម្ហូបសាមញ្ញទូទៅ ឱ្យក្លាយជាមុខម្ហូបទំនងឈ្ងុយឆ្ងាញ់ រហូតធ្វើឱ្យអ្នកគាំទ្រត្រូវកូរពោះ ឃ្លានបាយភ្លាមៗ។
ពីស៊ុបក្ដៅៗពីរឿង Itawon Class រហូតដល់បង្អែមលាងមាត់ពីរឿង Vincenzo ថ្ងៃនេះ AMS សូមបើកបង្ហាញមុខម្ហូប ៦ មុខពីរឿងភាគល្បីឈ្មោះ ៦ ចំណងជើង ដែលអ្នកគាំទ្ររឿងកូរ៉េ គួរសាកឱ្យដឹងរសជាតិ។
Sundubu-jjigae ពីរឿង Itaewon Class


នឹកដល់រឿង Itaewon Class ប្រហែលជាមិនអាចរំលងស៊ុបកូរ៉េហិរៗ Sundubu-jjigae បាននោះទេ។ ជាក់ស្ដែង ម្ហូបមួយមុខនេះ ពិតមានសារសំខាន់សម្រាប់តួអង្គ Park Sae-ro-yi ព្រោះតួឯកប្រុសរូបនេះបានប្រែក្លាយរូបមន្តម្ហូបប្រចាំគ្រួសាររបស់ឪពុក ឱ្យក្លាយជាម្ហូបប្រចាំហាង ហើយថែមទាំងបាននាំម្ហូពនេះទៅដណ្ដើមពានរង្វាន់កំពូលពីកម្មវិធីប្រកួត Best Pub បានជោគជ័យទៀតផង។
ស្ករ Dalgona ពីរឿង Squid Game

ពីស្ករគ្រាប់សាមញ្ញៗលក់តាមដងផ្លូវ Dalgona បានក្លាយជាស្ករគ្រាប់ពិឃាតដែលបានសម្លាប់មនុស្សរាប់សិបនាក់ក្នុងរឿង Squid Game និងក្លាយជាស្ករគ្រាប់ដ៏ពេញនិយមបំផុតនៅលើពិភពលោកមួយ នៅពេលដែលរឿងនេះចាក់ផ្សាយ។ ជាកស្ដែង មានទស្សនិកជនមិនតិចរូបទេ ដែលរៀនធ្វើស្ករមួយនេះ ដើម្បីសាកល្បងលេងល្បែង ដូចនឹងតួអង្គនៅក្នុងសាច់រឿង។
ស្ករគ្រាប់ដែលមានឈ្មោះថា Ppopgi ឬ Dalgona នេះ គឺជាចំណីដ៏ពេញនិយមរបស់កូរ៉េខាងត្បូងនៅក្នុងទសវត្សរ៍ឆ្នាំ ១៩៧០ និងទសវត្សរ៍ឆ្នាំ ១៩៨0 ជាមួយនឹងគ្រឿងផ្សំងាយៗពីរមុខតែប៉ុណ្ណោះ គឺ ស្ករ និង Backing Soda។
Gimbap ពីរឿង Extraordinary Attorney Woo

ក្រៅពីច្បាប់ និងត្រីបាឡែន ប្រហែលជាគ្មានអ្វីដែលអាចយកបេះដូងរបស់ មេធាវី Woo Young-woo ទៀតទេ ក្រៅពី Gimbap ព្រោះបាយមូលបែបកូរ៉េមួយនេះ មិនត្រឹមតែមានរសជាតិឆ្ញាញ់ប៉ុណ្ណោះទេ តែក៏ជាអាហារដែលមានអត្ថន័យស្រាប់មេធាវីស្រីរូបនេះដែរ។
នៅក្នុងជីវិតជាក់ស្ដែង Gimbap ក៏ជាម្ហូបដ៏ពេញនិយមសម្រាប់ទទួលទានជាអាហារថ្ងៃត្រង់របស់ប្រជាជនកូរ៉េដែរ ព្រោះម្ហូបនេះមានភាពងាយស្រួល និងរហ័ស ជាពិសេសក្នុងមួយដុំៗគឺមានគ្រឿងផ្សំចម្រុះ គ្រប់តម្រូវការ មិនថាបាយ បន្លែ និងសាច់។
Corndog ពីរឿង Start-Up


សម្រាប់ទស្សនិកជនមួយចំនួនដែលបានទស្សនារឿង Start –up ទំនាក់ទំនងដ៏ជ្រាលជ្រៅដែលមានអត្ថន័យបំផុត ប្រហែលជាមិនមែនជាទំនាក់ទំនងស្នេហារវាងតួឯក Seo Dal-mi និង Nam Do-san នោះទេ តែប្រហែលជាជាប់ចិត្តនឹងទំនាក់ទំនងរវាងតួអង្គ Han Ji-pyeong និងលោកយាយ Choi Won-deok ច្រើនជាង។
នៅក្នុងរឿងភាគមួយចំណងជើងនេះ Corndog មិនមែនគ្រាន់តែអាហារសម្រន់ធម្មតានោះទេ តែក៏មានអត្ថន័យខ្លាំងសម្រាប់ទំនាក់ទំនងរវាងតួអង្គ Han Ji-pyeong និងលោកយាយ Choi Won-deok ព្រោះ Corndog គឺជាអាហារដែលលោកយាយ បានផ្ដល់ឱ្យតួប្រុសនៅពេលជួបគ្នាដំបូង ហើយ Corndog ដដែលនេះ ក៏បានធ្វើឱ្យអ្នកទាំងពីរបានមកជួបគ្នាម្ដងទៀតដែរ។
Jjajangmyeon ពីរឿង My Roommate Is a Gumiho


បើទោះបីជាមានឈុតឆាករបស់តួអង្គ Lee Dam ខ្លះនៅក្នុងភាពយន្តភាគរឿងនេះ ស្ទើតែខ្លាចជាវីដេអូ Mukbang ទៅហើយ មិនថាឈុតឆាកញ៉ាំសាច់មានបំពង Chimaek និងសាច់ជ្រូក Jokbal តែមុខម្ហូបលេចធ្លោបំផុតដែលមិនអាចបំភ្លេចបាននោះ គឺជាមីខ្មៅ Jjajangmyeon។
Jjajangmyeon គឺជាមុខម្ហូបមួយដ៏ពេញនិយមនៅក្នុងប្រទេសកូរ៉េ ហើយទស្សនិកជនប្រហែលជាធ្លាប់បានឃើញមីមួយប្រភេទនេះ លេចមុខនៅក្នុងរឿងកូរ៉េជាច្រើនចំណងជើងរួចមកហើយ។ យ៉ាងណាមិញ ទស្សនិកជនខ្លះប្រហែលជាមិនទាន់បានដឹងទេថា មីកូរ៉េដែលស្រោចដោយទឹកជ្រលក់ពណ៌ខ្មៅធ្វើពីសណ្ដែកមួយនេះ គឺមានដើមកំណើតដំបូងកើតចេញមកពីប្រទេសចិន។
Bungeopang ពីរឿង Vincenzo


Bungeopang ឬនំពុម្ពរូបត្រី មួយមុខនេះបានបង្ហាញខ្លួននៅក្នុងឈុតឆាកសាមញ្ញៗធម្មតា នៅក្នុងរឿង Vincenzo នៅពេលដែលតួអង្គ Vincenzo និង Hong Cha-young បានជួបនឹងរទះលក់នំនេះ ដោយចៃដន្យតាមដងផ្លូវ។
អាហារសម្រន់មួយមុខនេះ ក៏បន្ថែមឱកាសឱ្យតួឯកទាំងពីរអាចបង្កើនមនោសញ្ចេតនាជាមួយគ្នាផងដែរ ព្រោះពួកគេបានប្រកែកគ្នាពីភាពខុសគ្នារវាង Bungeopang និងនំពុម្ពរូបត្រីមួយទៀតដែលមានឈ្មោះថា Ingeoppang។ ខណៈពេលដែល Vincenzo យល់ថា នំនេះខុសគ្នាព្រោះពុម្ពរូបត្រីមានរូបរាងមាត់ខុសគ្នា Hong Cha-young បានប្រកែកថា នំនេះមិនដូចគ្នាព្រោះតែមានសាច់ម៉្សៅខុសគ្នា។
ដ្បិតនេះ គ្រាន់តែជាឈុតឆាកសាមញ្ញ មិនសូវមានសាច់រឿងក្ដី តែវាបានក្លាយជាឈុតឆាកមួយ ដែលទស្សនិកជនមួយចំនួនធំចងចាំមិនភ្លេច រហូតចង់សាកភ្លក្សនំពុម្ពស្នូលសណ្ដែកក្រហមនេះដូចគ្នា៕
























Account
Security
Favourite Content