ជាការពិតជឿជាក់ថាមនុស្សស្រីនៅពេលមានដៃគូ ច្បាស់ណាស់នាងជាមនុស្សម្នាក់ហ៊ានលះបង់គ្រប់យ៉ាងដើម្បីតែមនុស្សដែលនាងស្រឡាញ់យ៉ាងពិតប្រាកដ។ ប៉ុន្តែត្រូវចាំថាមុនពេលស្រឡាញ់គេ យើងត្រូវស្រឡាញ់ខ្លួនឯងជាមុនសិន ជាពិសេសការរៀបចំកញ្ចប់ប្រាក់មួយចំណែកទំនុកបម្រុងសម្រាប់ខ្លួនឯងតែម្ដង។ ប្រសិនបើឆ្ងល់ហេតុអ្វីចាំបាច់ត្រូវបម្រុងសម្រាប់ខ្លួនឯង ងាកមកមើល ៣ ហេតុផលខាងក្រោមនេះ៖
១. មនុស្សប្រុសអាចប្រែចិត្តបានគ្រប់ពេល
ស្នេហារវាងមនុស្សពីរនាក់គឺជាអារម្មណ៍ដ៏ជ្រាលជ្រៅ និងងប់ងុលបំផុត។ ប៉ុន្តែអារម្មណ៍ទាំងនោះក៏អាចផ្លាស់ប្ដូរបានទៅតាមពេលវេលាដែរ។ មិនត្រូវគិតថាគេស្រឡាញ់យើងថ្ងៃនេះ ហើយនឹងបន្ដស្រឡាញ់យើងជារៀងរហូតនោះទេ។ ដូច្នេះជាមនុស្សស្រី យើងត្រូវតែប្រាកដចិត្តថាខ្លួនឯងមានលំនឹងសេដ្ឋកិច្ចមួយដ៏រឹងមាំដែលមិនថានៅពេលមានបញ្ហាជាមួយដៃគូ ក៏យើងនៅតែមានសុវត្ថិភាពទាំងផ្លូវកាយ និងផ្លូវចិត្តដដែល។

២. បម្រុងសម្រាប់រឿងដែលមិនបានគ្រោងទុកមុន
ពេញមួយជីវិតរបស់មនុស្សម្នាក់ៗច្បាស់ណាស់គឺមិនអាចទៅមុខដោយរលូនបានតាមអ្វីដែលគ្រោងទុកនោះទេ។ ជាក់ស្ដែងស្ថានភាពខ្លះកើតឡើងភ្លាមធ្វើឱ្យយើងនឹកស្មានដល់ដែលតម្រូវឱ្យមានការដោះស្រាយភ្លាមៗដូចគ្នា។ ក្នុងស្ថានភាពបន្ទាន់បែបនេះ យើងមិនអាចរងចាំការសម្រេចចិត្តពីភាគីម្ខាងទៀតបាននោះទេ ដូច្នេះប្រសិនបើយើងមានកញ្ចប់ប្រាក់មួយចំណែកសម្រាប់ត្រៀមទុកក្នុងហេតុការណ៍បែបនេះ នៅពេលដែលជួបប្រទះបញ្ហាភ្លាមៗគឺក្លាយជាដំណោះស្រាយដ៏ល្អបំផុតតែម្ដង។
៣. សម្រាប់ការចំណាយផ្ទាល់ខ្លួន
ជាមនុស្សស្រីជៀសមិនផុតនោះទេចំពោះតម្រូវការផ្ទាល់ខ្លួនមួយចំនួនដូចជាគ្រឿងសម្អាង សម្លៀកបំពាក់ ឬស្បែកជើងស្អាតៗនោះទេ។ ហេតុនេះយើងមិនអាចចេះតែលាដៃសុំពីដៃគូ ឬដកប្រាក់ពីការសន្សំរួមគ្នានោះដែរ ទើបការបម្រុងទុកសម្រាប់ខ្លួនឯងគឺពិតជាសំខាន់។ មិនដូច្នោះយើងច្បាស់ជាជួបអារម្មណ៍ខកចិត្តច្រើនដងជាមិនខាន ឬឈានដល់មានជម្លោះជាមួយនឹងដៃគូថែមទៀតផង៕


























Account
Security
Favourite Content