បន្ទាប់ពីបានរៀបមង្គលការកាលពីថ្ងៃទី១៩ ខែធ្នូ តារាសម្ដែងថៃ James Jirayu និងភរិយា Foam Benjamat ក៏បានផ្ដល់បទសម្ភាសរួមគ្នាលើកដំបូងជាមួយសារព័ត៌មានក្នុងស្រុក។ ក្នុងបទសម្ភាសអ្នកទាំងពីរបានរៀបរាប់ដំណើរដើមទងនិងរឿងរ៉ាវជាច្រើនដែលពួកគេបានឆ្លងកាត់ជាមួយគ្នា ហើយខាងក្រោមនេះ AMS សូមលើកយកចំណុចគួរឱ្យចាប់អារម្មណ៍ខ្លះៗដែលពួកគេបានលើកឡើង៖
១. James Jirayu បានជួប Foam លើកដំបូងកាលពី១០ឆ្នាំមុន ដោយពេលនោះ James ត្រូវថតពាណិជ្ជកម្ម ហើយ Foam គឺជាអ្នកធ្វើការក្រោយឆាករបស់ក្រុមហ៊ុនផលិតពាណិជ្ជកម្មនោះ។
២. ជួបដំបូងៗ Foam គិតថា James គឺជា Gay ព្រោះធ្លាប់ឮព័ត៌មានខ្សឹបខ្សៀវបែបនេះពីរូបគេ ប៉ុន្តែពេលបានរួមការងារជាមួយគ្នា ទើបនាងដឹងថាការពិតមិនអីចឹងទេ។
៣. ត្បិតថាពេលរួមការងារគ្នាដំបូង ពួកគេមិនសូវបាននិយាយគ្នាច្រើន ប៉ុន្តែ James ក៏មានអារម្មណ៍ចូលចិត្ត Foam បាត់ទៅហើយ។ គេចូលចិត្តមនុស្សស្រីដែលមានចរិតលក្ខណៈបែបនេះ ពោលគឺជាមនុស្ស active ឧស្សាហ៍ ធ្វើនេះធ្វើនោះ ដូច្នេះហើយ James ក៏ព្យាយាមស្វែងរកវិធីដើម្បីបាននិយាយគ្នាជាមួយ Foam។
៤. ចុងក្រោយ James ក៏ឆាតទៅ Foam និងសុំ add LINE។ ពេលនោះ Foam នៅគិតក្នុងចិត្តថាគេប្រហែលឆាតទៅមនុស្សស្រីច្រើននាក់ហើយ ព្រោះមើលទៅដូចជាខិល ប៉ុន្តែគេក៏ពិសោធន៍ឱ្យឃើញថាគេមិនមែនជាមនុស្សបែបហ្នឹងទេ។
៥. អំឡុងពេលស្រលាញ់គ្នា មានព័ត៌មានអវិជ្ជមានចេញមកច្រើន និងមាន Comment អាក្រក់ៗមកកាន់ Foam។ ទោះបីយល់ពីអាជីពរបស់ James ប៉ុន្តែពេលខ្លះ Faom នៅតែមានអារម្មណ៍ថាវាធ្ងន់ធ្ងរពេកសម្រាប់នាង។ ការរិះគន់ខ្លះធ្វើឱ្យនាងគេងយំច្រើនថ្ងៃ រហូតចាប់ផ្ដើមគិតថាគួរបញ្ចប់ទំនាក់ទំនងនេះឬអត់? ប៉ុន្តែ James មិនព្រមបញ្ចប់ឡើយ និងតែងប្រាប់មិត្តស្រីថា៖ “ដែលយើងមានបញ្ហាបែបនេះគឺដោយសារតែអ្នកដទៃ យើងនឹងមិនបែកគ្នាដោយសារអ្នកដទៃទេ បើត្រូវបែកគឺត្រូវបែកដោយសារតែយើងឈប់ស្រលាញ់គ្នាប៉ុណ្ណោះ!”។
៦. Foam និយាយថា James ជាមនុស្សចិត្តត្រជាក់ខ្លាំង។ ភាពចិត្តត្រជាក់របស់គេបានជួយបន្ធូរបន្ថយបញ្ហានានាឱ្យធូរស្រាលបាន បញ្ហាខ្លះគេក៏ជួយដោះស្រាយ បញ្ហាខ្លះដោះស្រាយមិនបានក៏ទុកចោលទៅ។ គេជាមនុស្សមើលពិភពលោកក្នុងផ្លូវល្អ មិនដែលគិតមិនល្អចំពោះអ្នកណាទេ ធ្វើឱ្យនាងមានអារម្មណ៍កក់ក្ដៅដែលបាននៅក្បែរ។
៧. ចំណែក James និយាយថា Foam មិនមែនជាមនុស្សស្រីផ្អែមល្ហែមទេ ប៉ុន្តែគឺជាមនុស្សដែលសំឡឹងមើលពិភពលោកតាមការពិត តែងមានបំណងល្អបើទោះបីពេលខ្លះពាក្យសម្ដីនាងស្ដាប់ទៅចាក់ដោតពេកក៏ដោយ ប៉ុន្តែវាក៏ធ្វើឱ្យគេមានចិត្តឱ្យខំប្រឹងធ្វើគ្រប់យ៉ាងឱ្យប្រសើរឡើង។ ភាពមិនផ្អែមល្ហែមរបស់ Foam បែរធ្វើឱ្យជីវិតរបស់ James កាន់តែមានរសជាតិជាងមុន។
៨. ទោះមិនមែនជាមនុស្សស្រីដែល Sweet ប៉ុន្តែ Foam មើលថែ James ល្អខ្លាំងណាស់។ នៅពេល James មានការទៅក្រៅប្រទេស Foam គឺជាអ្នករៀបវ៉ាលី រៀបសម្លៀកបំពាក់ឱ្យគេទាំងអស់។ Foam ក៏ចូលចិត្តធ្វើម្ហូប និងចេះធ្វើនំដែរ ដោយបច្ចុប្បន្ននាងបានបើកភោជនីយដ្ឋាន ហើយម្ហូបក្នុងហាងភាគច្រើន នាងជាអ្នកធ្វើតែម្ដង។
៩. Foam មិនដែលរំពឹងថានឹងមានពិធីមង្គលការទេ ព្រោះគិតថាប៉ះពាល់ការងាររបស់ James ប៉ុន្តែថ្ងៃនេះពិធីមង្គលការដែលមានមនុស្សទូទាំងប្រទេសរួមអបអរក៏បានកើតឡើង។ Foam មិនយកបណ្ណាការពី James ឡើយ ព្រោះគិតថាមិនចាំបាច់។ នាងចង់ឱ្យ James ទុកលុយដែលគេសន្សំសម្រាប់កូនៗល្អជាង សម្រាប់នាងសុំតែចិញ្ចៀនមួយវង់គ្រប់គ្រាន់។
១០. ខណៈពេលសម្ភាស មានអ្នកកាសែតសួរថា៖ “មានមនុស្សជាច្រើនច្រណែន Foam ដែលបាន James ជាគូ” ប៉ុន្តែ Foam តបថា៖ “ត្រូវច្រណែន James Ji ទៅវិញទេដែលបានមនុស្សស្រីល្អនិងកម្រដូចខ្ញុំជាប្រពន្ធ” ៕