ក្រោយទទួលបានជោគជ័យលើការប្រឡងសញ្ញាបត្រមធ្យមសិក្សាទុតិយភូមិ អ្វីដែលសិស្សានុសិស្សត្រូវគិតគូរឱ្យបានល្អិតល្អិនបំផុតនោះ គឺការជ្រើសរើសសាកលវិទ្យាល័យ និងជំនាញដែលត្រូវសិក្សាបន្តថ្នាក់បរិញ្ញាបត្រ ដែលជាស្ពានចម្លងឆ្ពោះទៅរកអនាគតដ៏ល្អប្រសើរ។ ថ្ងៃនេះ AMS-Infotainment សូមបង្ហាញសាកលវិទ្យាល័យរដ្ឋ និងឯកជនល្បីៗបំផុតនៅភ្នំពេញ ដើម្បីប្អូនៗងាយស្រួលក្នុងការសម្រេចចិត្ត។ ក្នុងនោះរួមមាន៖
១សាកលវិទ្យាល័យភូមិន្ទភ្នំពេញ ឫហៅកាត់ជាភាសាបារាំងថា (URPP) និងភាសាអង់គ្លេស (RUPP)
គឺជាគ្រឹះស្ថានឧត្ដមសិក្សាចំណាស់ជាងគេ និងធំជាងគេនៅកម្ពុជា។ សកលវិទ្យាល័យភូមិន្ទភ្នំពេញត្រូវបានបង្កើតឡើងដំបូងនៅឆ្នាំ១៩៦០ ។ ចំពោះជំនាញសិក្សាល្បីៗបំផុតមានដូចជា៖ អក្សរសាស្ត្រខ្មែរ ប្រវត្តិវិទ្យា ចិត្តវិទ្យា ទេសចរណ៍ អក្សរសាស្ត្រអង់គ្លេស និងជំនាញជាច្រើនទៀត។

២វិទ្យាស្ថានភាសាបរទេស ហៅកាត់ IFL
វិទ្យាស្ថានភាសាបរទេស (Institute of Foreign Languages ឬ Institut des Langues Etrangères) ហៅកាត់ថា IFL ជាគ្រឹះស្ថានឧត្តមសិក្សាចំនុះឱ្យសាកលវិទ្យាល័យភូមិន្ទភ្នំពេញ ដែលជំនាញក្នុងការបណ្ដុះបណ្ដាលភាសាបរទេសដល់និស្សិតកម្ពុជា។ ជំនាញល្បីៗរួមមាន៖ ភាសាអង់គ្លេស ភាសាបារាំង ភាសាចិន ភាសាជប៉ុន និងភាសាកូរ៉េ។

៣ដេប៉ាតឺម៉ង់ប្រព័ន្ធផ្សព្វផ្សាយ និងសារគមនាគមន៍ដែលហៅកាត់ថា DMC
ចំនុះឱ្យសាកលវិទ្យាល័យភូមិន្ទភ្នំពេញ DMC ជាគ្រឹះស្ថានឧត្តមសិក្សាដំបូង និងឈានមុខគេក្នុងព្រះរាជាណាចក្រកម្ពុជា ដែលបណ្តុះបណ្តាលថ្នាក់បរិញ្ញាបត្រ ផ្នែកគ្រប់គ្រងប្រព័ន្ធផ្សព្វផ្សាយ និង វិជ្ជាជីវៈសារព័ត៌មាន តាំងពីឆ្នាំ២០០១។ និស្សិតមានឱកាសក្លាយជាអ្នកសារព័ត៌មានអាជីព ជាផលិតករភាពយន្ត ជាអ្នកសរសេរអត្ថបទ មានឱកាសធ្វើការក្នុងស្ថានីយ៍ទូរទស្សន៍ វិទ្យុ ប្រព័ន្ធផ្សព្វផ្សាយនានា។

៤សាកលវិទ្យាល័យវិទ្យាសាស្ត្រសុខាភិបាល
សាកលវិទ្យាល័យវិទ្យាសាស្ត្រសុខាភិបាល(ស.វ.ស) ហៅក្រៅថាសាលាក្រហម ជាគ្រឹះស្ថានឧត្ដមសិក្សាផ្នែកសុខាភិបាលដ៏ចំណាស់មួយ និងល្បីល្បាញបំផុតក្នុងប្រទេសកម្ពុជា ដែលបានបង្កើតឡើងតាំងពីឆ្នាំ ១៩៤៦មកម្ល៉េះ។

៥សាកលវិទ្យាល័យភូមិន្ទនីតិសាស្ត្រនិងវិទ្យាសាស្ត្រសេដ្ឋកិច្ច
សាកលវិទ្យាល័យ ភូមិន្ទនីតិសាស្ត្រ និង វិទ្យាសាស្ត្រ សេដ្ឋកិច្ច ជា សាកលវិទ្យាល័យ ដែលចំណាស់ជាងគេ នៅក្នុងចំណោមគ្រឹះស្ថានឧត្ដមសិក្សានៃព្រះរាជាណាចក្រកម្ពុជា។ សាកលវិទ្យាល័យ ផ្ដល់កម្មវិធីសិក្សាជាមួយនឹងការផ្ដោតជាចម្បង ទៅលើផ្នែកនីតិសាស្ត្រ សេដ្ឋកិច្ច និងការអប់រំពាណិជ្ជកម្ម។

៦ សាកលវិទ្យាល័យជាតិគ្រប់គ្រង
សាកលវិទ្យាល័យជាតិគ្រប់គ្រង (NUM) ជាគ្រឹះស្ថានឧត្ដមសិក្សាសាធារណៈដ៏ល្បីល្បាញមួយក្នុងប្រទេសកម្ពុជា បង្កើតឡើងតាំងពីឆ្នាំ ១៩៨៣មកម្ល៉េះក្នុងនាមជាវិទ្យាស្ថានវិទ្យាសាស្ត្រសេដ្ឋកិច្ច។ សាកលវិទ្យាល័យនេះផ្ដល់នូវជំនាញសិក្សាជាច្រើនដល់និស្សិតដូចជា៖ គ្រប់គ្រង, សេដ្ឋកិច្ច, ពាណិជ្ជកម្ម, ព័ត៌មានវិទ្យា, ច្បាប់ពាណិជ្ជកម្ម, ទេសចរណ៍ ជាដើម។

៧ សាកលវិទ្យាល័យភូមិន្ទវិចិត្រសិល្បៈ
សាកលវិទ្យាល័យភូមិន្ទវិចិត្រសិល្បៈដំបូងមានឈ្មោះជាសាលាភូមិន្ទសិល្បៈ ត្រូវបានកសាងឡើងក្នុងឆ្នាំ១៩១៨ ហើយបានក្លាយទៅជាសាកលវិទ្យាល័យភូមិន្ទវិចិត្រសិល្បៈនៅឆ្នាំ ១៩៦៥។ ចំពោះជំនាញសិក្សារួមមាន៖ បុរាណវិទ្យា ស្ថាបត្យកម្ម និងនគរោបនីយវិទ្យា តុបតែងលម្អរ វិចិត្រកម្ម និងចម្លាក់ជាដើម។

៨ សាកលវិទ្យាល័យភូមិន្ទកសិកម្ម
សាកលវិទ្យាល័យភូមិន្ទកសិកម្មជាគ្រឹះស្ថានឧត្ដមសិក្សាសាធារណៈផ្នែកកសិកម្ម មានទីតាំងនៅប៉ែកខាងលិចឈៀងខាងត្បូងនៃរាជធានីភ្នំពេញ បង្កើតឡើងនៅឆ្នាំ១៩៦៤ ក្រោមព្រះរាជកិច្ចដឹកនាំនៃព្រះបរមរតនកោដ្ឋព្រះបាទនរោត្តម សីហនុ។

៩ វិទ្យាស្ថានបច្ចេកវិទ្យាកម្ពុជា
វិទ្យាស្ថាននេះគឺជាគ្រឹះស្ថានឧត្ដមសិក្សាសាធារណៈដ៏ល្បីល្បាញបំផុតនៅកម្ពុជា តាំងពីឆ្នាំ ១៩៦៤ រហូតមកដល់បច្ចុប្បន្ននេះ។ វិទ្យាស្ថាននេះផ្ដោតការអប់រំសំខាន់លើការបណ្ដុះបណ្ដាលផ្នែកបច្ចេកទេស ដែលជាតម្រូវការចាំបាច់បំផុត ក្នុងការអភិវឌ្ឍប្រទេសកម្ពុជាក្នុងវិស័យ វិទ្យាសាស្ត្រ និងវិស្វករ។

១០ វិទ្យាស្ថានជាតិពហុបច្ចេកទេសកម្ពុជា
វិទ្យាស្ថានជាតិពហុបច្ចេកទេសកម្ពុជាគឺជាគ្រឹះស្ថានឧត្ដមសិក្សារបស់រដ្ឋធំជាងគេក្នុងព្រះរាជាណាចក្រកម្ពុជាដែលមានសមត្ថភាពផ្ទេរនូវបច្ចេកទេសដល់និស្សិត រៀបចំឡើងដោយរដ្ឋាភិបាលកម្ពុជានិងសាធារណៈរដ្ឋកូរ៉េ ដែលមានសហប្រតិបត្តិការជាមួយនិងសាកលវិទ្យាល័យ Jeon Ju នៃប្រទេសកូរ៉េខាងត្បូង ។ NPIC ត្រូវបានបើកសម្ពោធដាក់ឱ្យប្រើប្រាស់ជាផ្លូវការក្រោមអធិបតីភាពរបស់នាយករដ្ឋមន្ត្រី ហ៊ុនសែន នៅថ្ងៃទី១៦ ខែឧសភា ឆ្នាំ ២០០៥ ។

១១ សាកលវិទ្យាល័យអាមេរិកកាំងភ្នំពេញអន្តរជាតិ (AUPP)
AUPP ជាសាកលវិទ្យាល័យលំដាប់កំពូលមួយក្នុងតំបន់អាស៊ីអាគ្នេយ៍ ដែលអនុញ្ញាតឲ្យសិស្សបញ្ចប់ការសិក្សាទទួលបានការអប់រំបែបអាមេរិក និងសញ្ញាប័ត្រមកពីសាកលវិទ្យាល័យអាមេរិក បន្ថែមលើសញ្ញាប័ត្រដែលចេញពី AUPP។ មានន័យថា និស្សិតពុំចាំបាច់ត្រូវទៅសិក្សានៅសហរដ្ឋអាមេរិក និងចំណាយថ្លៃសិក្សាដ៏ច្រើនសន្ធឹកសន្ធាប់ឡើយ។

១២សាកលវិទ្យាល័យបញ្ញាសាស្ត្រកម្ពុជា
បញ្ញាសាស្ត្រកម្ពុជា ជាសាកលវិទ្យាល័យឯកជនមួយ ដែលមានប្រព័ន្ធសិក្សាល្អបំផុត។ គឺជាសាកលវិទ្យាល័យឯកជនមួយមានទីតាំងនៅក្នុងរាជធានីភ្នំពេញ។ សាកលវិទ្យាល័យនេះត្រូវបានបង្កើតនៅឆ្នាំ១៩៩៧ ហើយបានបើកនៅឆ្នាំ២០០០ ដោយផ្ដល់ការសិក្សាផ្អែកលើភាសាអង់គ្លេសនៅគ្រប់មុខវិជ្ជាទាំងអស់។

១៣ សាកលវិទ្យាល័យន័រតុន
សាកលវិទ្យាល័យន័រតុនគឺជាសាកលវិទ្យាល័យឯកជនលើកដំបូងនៅក្នុងប្រទេសកម្ពុជាបានបង្កើតឡើងតាំងពីឆ្នាំ ១៩៩៦។ សកលវិទ្យាល័យមានផ្ដល់នូវមុខជំនាញចម្រុះ។

១៤ សាកលវិទ្យាល័យ Paragon
សាកលវិទ្យាល័យ Paragon International University ត្រូវបានបង្កើតឡើងក្នុងឆ្នាំ ២០១០ ជាសាកលវិទ្យាល័យឯកជនមួយដ៏ល្បីល្បាញនៅភ្នំពេញ ។ សាកលវិទ្យាល័យ Paragon International បានមកពីការអភិវឌ្ឍន៍ប្រកបដោយជោគជ័យរបស់សាលាអន្តរជាតិ Paragon ដែលផ្តល់កម្រិតអប់រំខុសៗគ្នាចាប់ពីថ្នាក់មត្តេយ្យដល់វិទ្យាល័យចាប់តាំងពីឆ្នាំ ១៩៨៧ ។

១៥ សាកលវិទ្យាល័យ LimKokwing
ជាសាកលវិទ្យាល័យលំដាប់ជួរមុខមួយនៅក្នុងប្រទេសកម្ពុជា ដែលនិស្សិតបញ្ចប់ការសិក្សានៅទីនោះ នឹងក្លាយជាធនធានដ៏ឆ្នើម មានជំនាញច្បាស់លាស់។ ហើយជំនាញដែលផ្ដោតសំខាន់ៗរួមមាន៖ Media, ស្ថាបត្យកម្ម ជាដើម។

១៦ សាកលវិទ្យាល័យកម្ពុជា
សាកលវិទ្យាល័យកម្ពុជា ត្រូវបានស្ថាបនាឡើងនៅថ្ងៃទី ២៣ ខែមិថុនា ឆ្នាំ២០០៣។ សាកលវិទ្យាល័យកម្ពុជា (UC) គឺជាសាកលវិទ្យាល័យឯកជនឈានមុខគេមួយ ស្ថិតនៅលើផ្លូវណតប្រ៊ីដ ខណ្ឌសែនសុខ រាជធានីភ្នំពេញ។ ជំនាញល្បីៗរួមមាន៖ ទំនាក់ទំនងអន្តរជាតិ ប្រព័ន្ធផ្សព្វផ្សាយជាដើម។

ក្រៅពីរួមមាន៖
– សកលវិទ្យាល័យឯកទេសនៃកម្ពុជា (CUS)
– សកលវិទ្យាល័យបៀលប្រាយ
– សកលវិទ្យាល័យ មេគង្គកម្ពុជា
– សកលវិទ្យាល័យធនធានមនុស្សជាដើម
ប្រភពពីទំព័រហ្វេសប៊ុកផេក៖ The Youth

























Account
Security
Favourite Content