ព័ត៌មានកម្សាន្តប្លែកៗ
រសនិយម
តន្រ្តី
ភាពយន្ត
មាតិកាឌីជីថល
បើកសោជីវិត
ចង់ដឹងរឿងគេ
វនយាត្រា
Cicada Agent
ព្រះនាងកង្កែប
អាចនិយាយបានថា ពេលវេលានេះប្រហែលជាពេលដ៏ពិបាកមួយសម្រាប់សិស្សានុសិស្សដែលទើបតែបញ្ចប់ថ្នាក់ទី១២ ក្នុងការជ្រើសរើសជំនាញសិក្សាសម្រាប់ថ្នាក់សាកលវិទ្យាល័យដែលអាចជាផ្នែកធំមួយក្នុងការកំណត់អាជីពក្នុងថ្ងៃអនាគត។
ត្បិតមានអ្នកមួយចំនួនបានស្វែងរកឃើញពីចំណង់ចំណូលចិត្តរបស់ខ្លួន និងដឹងថាត្រូវទៅរៀននៅទីណារួចហើយ សិស្សមួយចំនួនទៀតនៅមិនទាន់អាចស្វែងរកអាជីពដែលខ្លួនស្រឡាញ់ ឬអាចដឹងថាខ្លួនស្រឡាញ់អ្វីហើយ តែមិនអាចធ្វើតាមគោលបំណងបានតាមរយៈហេតុផលផ្សេងៗ។
តួយ៉ាង ក្នុងកំលុងពេល Live មួយរបស់ Jungkook កាលពីឆ្នាំ ២០២២ អ្នកគាំទ្រម្នាក់បានចែករំលែកថា ខ្លួនចង់ធ្វើជាអ្នកបម្រើការនៅលើយន្តហោះ តែឪពុកម្តាយចង់ឱ្យគេធ្វើជាវេជ្ជបណ្ឌិត។ ក្រោយឃើញពីសំណេរនេះ Jungkook បានឆ្លើយតបវិញភ្លាមថា៖ “នេះជាជីវិតរបស់អ្នក ហើយអ្នកអាចរស់នៅជាមួយនឹងជីវិតនេះបានតែម្ដងទេ។ ខ្ញុំគិតថា អ្នកគួរតែរស់នៅដើម្បីខ្លួនឯង”។
នេះជាឧទាហរណ៍ដ៏ល្អមួយ ដែលសមាជិករបស់ BTS បានធ្វើក្នុងការលើកទឹកចិត្តដល់អ្នកគាំទ្ររបស់ខ្លួន តែនៅមានទង្វើល្អៗជាច្រើនទៀតដែល ក្រុមចម្រៀងខេប៉ុបមួយនេះបានធ្វើដោយផ្ទាល់ និងដោយប្រយោល។
ជាក់ស្ដែង បទចម្រៀងរបស់ BTS មិនតិចទេ ដែលបានដើរតួនាទីក្នុងការផ្សព្វផ្សាយគំនិតវិជ្ជមានទៅដល់អ្នកស្ដាប់ ជាពិសេសក្នុងការលើកទឹកចិត្តឱ្យជឿជាក់ និងធ្វើតាមអ្វីដែលខ្លួនប៉ង។ ដូច្នេះហើយ AMS សូមជីកកកាយឡើងវិញ នូវឃ្លាលើកទឹកចិត្តក្នុងបទចម្រៀងទាំង ៥ របស់ BTS ក្នុងការសម្រេចបំណង និងអាជីពក្នុងក្ដីសុបិន។
ជាក់ស្ដែង នៅក្នុងបទ N.O អ្នកទាំងប្រាំពីរបានច្រៀងថា “កុំរស់នៅក្នុងក្ដីស្រមៃរបស់អ្នកដទៃ” ដែលជាការលើកទឹកចិត្តឱ្យអ្នកស្ដាប់ជ្រើសរើសដើរតាមក្ដីសុបិនរបស់ខ្លនឯង និងកុំរស់នៅទៅតាមក្ដីសង្ឈឹមរបស់នរណាម្នាក់។ សង្កត់ធ្ងន់ទៅលើឃ្លានេះ នៅក្នុងបទ No More Dream ក្រុមចម្រៀងមួយនេះក៏បានច្រៀងដែរថា “បើទោះជាអ្នកមានជីវិតរស់នៅត្រឹមតែមួយថ្ងៃក៏ដោយចុះ ចូរធ្វើអ្វីដែលជាខ្លួនអ្នក និងលះបង់ភាពទន់ខ្សោយចោលឱ្យអស់”។ បន្ថែមពីនេះទៀត នៅក្នុងបទ Life មានឃ្លាមួយនោះបានច្រៀងថា “សម្រេចចិត្តដោយខ្លួនឯង ថាអ្វីដែលអាចធ្វើឱ្យអ្នកមានក្ដីសុខបាន”។
រីឯឃ្លាមួយទៀតដែលនៅក្នុងបទ Lost ចម្រៀងមួយនេះហាក់ចង់លើកទឹកចិត្តដល់អ្នកដែលកំពុងតែបាត់បង់ខ្លួនឯងក្នុងដំណើរដ៏វែងឆ្ងាយមួយនេះ ដោយច្រៀងចំៗថា “ការរង្វេងផ្លូវ ជាវិធីសាស្ត្រក្នុងការស្វែងរកផ្លូវ” ។ ក្នុងន័យសម្រាយ ឃ្លានេះប្រហែលជាសមាជិកទាំង ៧ចង់សំដៅថា បើអ្នកមិនរង្វេងផ្លូវទេ ប្រហែលជាអ្នកមិនអាចរកឃើញផ្លូវថ្មីដើម្បីទៅកាន់គោលដៅរបស់ខ្លួនបានឡើយ។
បន្ថែមពីនេះ កំលោះទាំង ៧ក៏បានជំរុញឱ្យអ្នកស្ដាប់ចម្រៀងរបស់ខ្លួនមានជំនឿចិត្តលើខ្លួនឯងដែរ ដោយនៅក្នុងបទ Anpanman ពួកគេបានច្រៀងថា “ថ្វីបើខ្ញុំត្រូវដួលម្ដងទៀត ឬខ្ញុំនឹងបង្កើតកំហុសម្ដងទៀត ឬសូម្បីតែខ្ញុំនឹងត្រូវកប់ជ្រៅនៅក្នុងភក់ក៏ដោយ ខ្ញុំនៅតែជឿជាក់លើខ្លួនឯង”។ ឃ្លានេះពិតជាមានអត្ថន័យសំខាន់ក្នុងការជំរុញភាពជឿជាក់ ព្រោះវាជាការពិតដែលមនុស្សម្នាក់ៗអាចនឹងបរាជ័យម្ដងហើយម្ដងទៀត តែបើសិនជាអ្នកក្លាហាន និងជឿលើអ្វីដែលខ្លួនកំពុងធ្វើ នោះអ្នកនឹងអាចសម្រេចក្ដីសុបិននៅក្នុងថ្ងៃណាមួយ។
ទទួលស្គាល់ថា ការជ្រើសរើសជំនាញសិក្សានៅក្នុងសកលវិទ្យាល័យជារឿងដែលពិបាក ព្រោះសិស្សអាចនឹងមានកង្វល់ច្រើនទៅលើភាពជោគជ័យក្រោយរៀនចប់។ តែ AMS សូមលើកទឹកចិត្តថា អ្នកគួរតែដើរតាមក្ដីស្រមៃរបស់ខ្លួនឯងយ៉ាងហោចណាស់ឱ្យបានម្ដង បើទោះបីជាវាខុសក៏មិនថ្វីដែរ ព្រោះអ្នកនៅតែអាចចាប់ផ្ដើមជាថ្មីម្ដងទៀតបានគ្រប់ពេលវេលាឱ្យតែអ្នកជឿជាក់លើខ្លួនឯង៕
Account
Security
Favourite Content