តារាចម្រៀងនិងសម្ដែងហុងកុង Aaron Kwok បានចែករំលែកថា លោកបានអនុវត្តទម្លាប់ដ៏តឹងរ៉ឹង ដោយទទួលទានអាហារតែមួយពេលប៉ុណ្ណោះក្នុងមួយថ្ងៃ ដោយសារតែរាងកាយរបស់លោកងាយឡើងទម្ងន់ខ្លាំង។

នៅក្នុងកម្មវិធីតន្ត្រី “Infinity Beyond: Greater Bay Area Season” កាលពីពេលថ្មីៗនេះ តារាប្រុស Aaron Kwok បាននិយាយថា៖ “ខ្ញុំមិនញ៉ាំបាយពេលថ្ងៃទេ ត្រឹមតែនំប៉័ងធម្មតាមួយចំណិតគឺគ្រប់គ្រាន់ហើយសម្រាប់ខ្ញុំ” ។ លោកបានបន្ថែមថា៖ “ខ្ញុំធ្លាប់ធាត់ខ្លាំង។ នៅពេលដែលអ្នកធ្លាប់ធាត់ អ្នកប្រាកដជាមិនចង់ធាត់ម្ដងទៀតទេ”។
Aaron Kwok ថា ព្រមជាមួយរបបអាហារដ៏តឹងរឹង លោកក៏រក្សាទម្លាប់ធ្វើលំហាត់ប្រាណជាប្រចាំ និងតាមដានយ៉ាងដិតដល់នូវទម្ងន់របស់លោក ដើម្បីប្រាកដថាវាស្ថិតនៅក្នុងកម្រិតដែលមានសុខភាពល្អ។ លោកក៏បានប្រាប់ដែរថា គាត់ចូលគេងនៅម៉ោង ៦ ព្រឹក ហើយភ្ញាក់ពីម៉ោង ១ រសៀល ជារៀងរាល់ថ្ងៃ។
ទម្លាប់នៃការតមអាហារ និងការហាត់ប្រាណរបស់លោក ទទួលបានការចាប់អារម្មណ៍យ៉ាងឆាប់រហ័សនៅលើបណ្ដាញសង្គម ដោយមានអ្នកគាំទ្រជាច្រើនសម្តែងការព្រួយបារម្ភថាលោកអាចនឹងបាក់កម្លាំងខ្លាំង។ ដើម្បីបន្ធូរបន្ថយកង្វល់របស់ពួកគេ Kwok បានចូលទៅកាន់ Weibo ដើម្បីធានាដល់អ្នកតាមដានរបស់ខ្លួនថា ទម្លាប់របស់លោកគឺបានផលសម្រាប់លោក ប៉ុន្តែលោកបានព្រមានអ្នកគាំទ្រកុំឱ្យព្យាយាមធ្វើតាម។
លោកបាននិយាយថា “អាហារមួយថ្ងៃមួយពេលគឺបានផលសម្រាប់ខ្ញុំ ប៉ុន្តែសូមកុំយកគំរូខ្ញុំ”។
បច្ចុប្បន្នមានវ័យ ៥៩ឆ្នាំ Aaron Kwok ឆ្នាំបានចាប់ផ្តើមអាជីពសិល្បៈដំបូងជាអ្នករាំ ដែលក្រោយមក លោកបានពង្រឹងជំនាញក្នុងការសម្តែង និងច្រៀង មុននឹងទទួលបានភាពល្បីល្បាញ និងទ្រព្យសម្បត្តិដ៏ច្រើនសម្បើម។ កាសែត South China Morning Post បានប៉ាន់ប្រមាណទ្រព្យសម្បត្តិរបស់លោកនៅឆ្នាំ ២០២១ ថាមានប្រហែល ២០ លានដុល្លារ ៕


























Account
Security
Favourite Content