បើទោះបីជាមានវ័យទើបតែ ២៧ ឆ្នាំមែន ប៉ុន្តែតួឯកស្រីក្នុងរឿង Alchemy of Souls Season 2: Light and Shadow និង Moving តារាស្រី Go Yoon Jung បានធ្វើឱ្យអ្នកទស្សនាភ្ញាក់ផ្អើលមែនទែនជាមួយទេពកោសល្យនៃការសម្ដែង។ លើសពីនេះ នាងក៏ត្រូវបានគេសរសើរថាមានសម្រស់ស្រស់ស្អាតដូចទេពធីតាប្រចាំសាលាផងដែរ។ ដូច្នេះកុំឱ្យខាតពេលយូរ AMS នឹងចែករំលែកនូវអាថ៌កំបាំង ៣ យ៉ាងដែលនាងប្រើប្រាស់សម្រាប់ថែរក្សាសម្រស់៖
១. ញ៉ាំអាហារតិច និងផឹកទឹកច្រើន
តារាស្រី Go Yoon Jung គឺជាមនុស្សម្នាក់ដែលមានការតឹងរ៉ឹងក្នុងការគ្រប់គ្រងរបបអាហារមែនទែន ដូច្នេះនាងញ៉ាំអាហារម្សៅក្នុងបរិមាណតិចតួចប៉ុណ្ណោះ ហើយផឹកទឹកឱ្យបានច្រើនតាមអាចទៅរួច។ ដោយការញ៉ាំអាហារមានជាតិម្សៅច្រើនអាចធ្វើឱ្យងាយប្រមូលផ្ដុំជាតិខ្លាញ់ និងពិបាកក្នុងការរំលាយអាហារ ខណៈដែលការផឹកទឹកច្រើនអាចជួយរំលាយអាហារ និងបន្សាបជាតិពុល។ មិនតែប៉ុណ្ណោះ នាងជឿជាក់ថាការផឹកទឹកឱ្យបានច្រើនក៏អាចជួយឱ្យស្បែកមានសំណើម កាត់បន្ថយការឃ្លាន និងធ្វើឱ្យមានអារម្មណ៍ស្រស់ស្រាយទៀតផង។
២. ប្រើកង់យូហ្គា
ការទៅហាត់ប្រាណនៃកន្លែងហាត់ប្រាណអាចធ្វើឱ្យនាងមានអារម្មណ៍ពិបាក ដូច្នេះតារាស្រីរូបនេះបានប្រើប្រាស់កង់យូហ្គាដើម្បីលាតសន្ធឹង និងសម្រួលនូវឥរិយាបថរាងកាយផងដែរ។ នាងគិតថាការធ្វើបែបនេះជាប្រចាំមិនត្រឹមតែអាចការពារខ្នង និងសម្រួលឥរិយាបថនោះទេ ប៉ុន្តែវាថែមទាំងកាត់បន្ថយភាពរឹងឆ្កឹងលើដងខ្លួនព្រមទាំងការឈឺចាប់ផ្នែកឆ្អឹងខ្នង ឆ្អឹងអាងត្រគាក និងស្មាក្នុងពេលតែមួយទៀតផង។ លើសពីនេះ វាក៏អាចជួយសម្រួលចរន្តឈាមផងដែរ។
៣. មិនភ្លេចការហាត់ Pilates
Pilates គឺជាលំហាត់ប្រាណដែលសំខាន់ និងពេញនិយមបំផុតសម្រាប់ស្រ្តីនៅប្រទេសកូរ៉េខាងត្បូង មិនថាមនុស្សធម្មតា ឬតារាសម្ដែងនោះទេ។ ជាក់ស្ដែងដូចទៅនឹងតារាស្រីកើតឆ្នាំ ១៩៩៦ នេះដែរ នាងមិនដែលភ្លេចក្នុងការហាត់ Pilates នោះទេដោយនាងជឿជាក់ថាវាអាចជួយពង្រឹងសាច់ដុំ និងធ្វើឱ្យមានរាងរូវស្អាតតូចស្រឡូនផងដែរ។ បើទោះបីជាមានជិត ៣០ ឆ្នាំហើយ ដោយសារមានការហាត់ប្រាណ និងការហូបចុកទើបធ្វើឱ្យនាងនៅមានសម្រស់ស្រស់ស្អាតព្រមទាំងមានឈ្មោះជាទេពធីតាវិទ្យាល័យទៀតផង ៕