សម្រាប់ប្រិយមិត្តជាហ្វេនចាស់វស្សារបស់ TVB ច្បាស់ជាស្គាល់ហើយនូវតារាស្រី Aimee Chan ដែលបានចូលរួមសម្ដែងក្នុងខ្សែភាពយន្តភាគជាច្រើនរបស់ហុងកុង។ ជាងនេះទៅទៀត នាងក៏ជាបវរកញ្ញាហុងកុងឆ្នាំ ២០០៦ ទៀតផង។ ក្រោយចូលសិល្បៈបានមួយរយៈធំ នាងបានរៀបការជាមួយតារាប្រុស Moses Chan និងទទួលបានចំណងដៃកូនប្រុសស្រីគួរឱ្យស្រឡាញ់ ៣ នាក់ផងដែរ។
ប្រសិនបើមើលតាមការបង្ហោះរូបភាពរបស់នាងនៅលើបណ្ដាញសង្គម យើងអាចនឹងគិតថាតារាស្រីរូបនេះមានអាយុត្រឹមជាង ៣០ ឆ្នាំប៉ុណ្ណោះ ប៉ុន្តែជាក់ស្ដែងនាងមានអាយុដល់ទៅ ៤២ ឆ្នាំទៅហើយ។ ចង់ដឹងថា Aimee Chan មានអាថ៌កំបាំងបែបណាខ្លះ តោះ! មកមើលទាំងអស់គ្នា៖
១. ប្រើផលិតផលថែសម្រស់ធម្មជាតិ
ចាប់តាំងពីចូលប្រឡូកក្នុងសិល្បៈរហូតមកដល់បច្ចុប្បន្ន Aimee Chan ចូលចិត្តប្រើផលិតផលថែរក្សាសម្រស់ដែលមានគ្រឿងផ្សំបែបធម្មជាតិ។ ជាមួយគ្នានេះ នាងក៏មិនចូលចិត្តប្រើផលិតផលណាដែលមានគ្រឿងផ្សំច្រើនពេកនោះទេ។ ជាពិសេស នាងបានផ្ដោតលើផលិតផលថែរក្សាស្បែកមុខដែលមានផ្ទុកនូវវីតាមីន A ដោយសារនាងជឿជាក់ថាវាអាចជួយបង្រួមរន្ធញើស និងកាត់បន្ថយស្នាមជ្រួញ។
រហូតចូលមកដល់វ័យ ៤០ ឆ្នាំតារាស្រីរូបនេះក៏បានផ្ដោតសំខាន់ខ្លាំងលើការប្រើផលិតផលប្រឆាំងភាពចាស់ផងដែរ។ លើសពីនេះ ការប្រើផលិតផលប្រឆាំងភាពចាស់ក៏ជួយកម្ចាត់ស្នាមអុជខ្មៅព្រមទាំងការពារស្បែកពីការបំពុលដោយបរិយាកាសខាងក្រៅផងដែរ។
២. ញ៉ាំអាហារសុខភាព
Aimee Chan មានទម្លាប់ញ៉ាំអាហារមានបន្លែច្រើនលើកលែងតែពេលនាងមានទម្ងន់ដែលតម្រូវឱ្យនាងញ៉ាំអាហារមានវីតាមីន និងសារធាតុចិញ្ចឹមឱ្យបានច្រើនដូចជាសាច់ ឬគ្រឿងសមុទ្រ។ រហូតមកដល់ពេលនាងសម្រាលកូនហើយពួកគេអាចញ៉ាំអាហារបាន ទើបនាងបែរមកញ៉ាំអាហាដូចកាលពីមុនវិញ។ ចំពោះអាហារណាដែលមានអំបិល និងស្ករច្រើនគឺត្រូវជៀសវាងដាច់ខាត។ បន្ថែមលើនេះ សូម្បីតែអាហារចៀន បំពង ឬអាហារប្រើប្រេងច្រើនក៏នាងមិនញ៉ាំដែរ។ ការធ្វើបែបនេះអាចជួយឱ្យនាងមានសុខភាពល្អ និងរក្សាទម្ងន់បាន។
៣. ចម្អិនម្ហូបដោយខ្លួនឯង
ជំនួសឱ្យការញ៉ាំអាហារខាងក្រៅ Aimee Chan តែងតែចម្អិនអាហារដោយខ្លួនឯង។ ចំពោះវិធីចម្អិនអាហារគឺត្រឹមត្រូវតាមកម្រិតស្ដង់ដាដែលនាងកំណត់ដោយផ្ទាល់ដោយសារនាងត្រូវប្រាកដចិត្តថាពួកគេញ៉ាំអាហារទាំងនោះបានទាំងឆ្ងាញ់ និងមានអត្ថប្រយោជន៍ដល់សុខភាព។ ជាពិសេសកូនៗដែលកំពុងលូតលាស់ទទួលបានសារធាតុចិញ្ចឹមគ្រប់គ្រាន់។
៤. ហាត់ប្រាណឱ្យបានទៀងទាត់
បើទោះបីជានាងមានអារម្មណ៍ហត់នឿយយ៉ាងណា ក៏នាងត្រូវបង្ខំខ្លួនឯងឱ្យហាត់ប្រាណយ៉ាងហោចណាស់ត្រឹម ២០ នាទីដែរ។ ចំពោះវិធីហាត់ប្រាណរបស់នាងមានដូចជារាំ យូហ្គា ឡើងភ្នំ និង weight training ជាដើម។ មិនត្រឹមតែសម្រាប់ខ្លួនឯងប៉ុណ្ណោះ ប៉ុន្តែគឺសម្រាប់ក្រុមគ្រួសារទាំងមូល ជាពិសេសកូនៗរបស់ក៏ត្រូវតែមានទម្លាប់ហាត់ប្រាណផងដែរ។
៥. រស់នៅដោយថាមពលវិជ្ជមាន
គន្លឺះដ៏សំខាន់មិនអាចភ្លេចបានសម្រាប់នាងគឺការរស់នៅជាមួយថាមពលវិជ្ជមាន។ ដូច្នេះនាងត្រូវប្រើជីវិតឱ្យបានល្អដោយរស់នៅដោយភាពរីករាយ និងសុទិដ្ឋិនិយមជាមួយមនុស្សជុំវិញខ្លួន។ នាងបាននិយាយថាការរស់នៅថាមពលវិជ្ជមានគឺអាចផ្ដល់ភាពកក់ក្ដៅ ស្នាមញញឹមដល់ប្ដី និងកូនៗព្រមទាំងជំនួយដល់សម្រស់ទៀតផង៕