ជាទូទៅស្ថានភាពស្បែករបស់មនុស្សម្នាក់ៗនឹងប្រែប្រួលទៅតាមវ័យនៃអាយុកាល ជាពិសេសនៅពេលដែលអាយុកាន់ច្រើន។ ប៉ុន្តែជឿជាក់ថាមិនថាអាយុច្រើនយ៉ាងណានោះទេ វាគ្រាន់តែជាតួលេខប៉ុណ្ណោះបើសិនយើងមានវិធីថែរក្សាស្បែកត្រឹមត្រូវ។ ដូច្នេះថ្ងៃនេះផងដែរ AMS សូមចែករំលែកជូនប្រិយមិត្តនូវ ៥ គន្លឹះមូលដ្ឋានថែរក្សាស្បែក ទោះអាយុច្រើនប៉ុណ្ណាក៏មិនបញ្ហា៖
១. ការសម្អាតមុខ

ការប្រើប្រាស់ទឹកជូតគ្រឿងសម្អាងនឹងជួយកម្ចាត់ធូលី និងប្រេងដែលនៅសេសសល់យ៉ាងជ្រៅនៅក្នុងរន្ធញើស។ វិធីមួយនេះអាចជួយសម្អាតស្បែកបានយ៉ាងជ្រៅ និងសម្រួលនូវបញ្ហាមុន ជាពិសេសអ្នកដែលឧស្សាហ៍ផាត់មុខ។ ជម្រើសល្អគឺយើងគួរតែស្វែងរកផលិតផលសម្អាតគ្រឿងសម្អាងណាមួយដែលមានភាពស្រាលស្រទន់ និងសម្អាតបានជ្រៅ។
២. ប្រើ cleanser សម្អាតមុខដែលមានសាច់ស្រាល (gentle)
ក្រោយជូតសម្អាតមុខរួចហើយគឺឈានដល់ការលាងសម្អាតមុខជាមួយហ្វូម ឬក្រែមលាងសម្អាតមុខដើម្បីជម្រះនូវជាតិកខ្វក់ឱ្យបានកាន់តែស្អាតបន្ថែម។ ជាងនេះការលាងសម្អាតមុខនឹងជួយឱ្យសារធាតុចិញ្ចឹមក្នុងផលិតផលថែរក្សានៃជំហានបន្ទាប់អាចជ្រាបចូលក្នុងស្បែកមុខបានកាន់តែល្អផងដែរ។ ដូច្នេះនេះជាហេតុផលដែលយើងគួរតែប្រើផលិតផលដែលមានភាពស្រទន់ ឬ gentle ដើម្បីការពាររលាក និងពង្រឹងស្បែកមុខមុនពេលស្បែកវិវត្តទៅមុខ។
៣. ផ្ដល់សំណើមដល់ស្បែកដោយទឹក Toner

ការប្រើប្រាស់ទឹក Toner គឺជាដំណោះស្រាយដ៏ល្អដែលអាចជួយរក្សាតុល្យភាព pH លើស្បែកបានយ៉ាងល្អ។ វិធីនេះផងដែរនឹងរក្សាបាននូវកម្រិតសំណើមជាក់លាក់មួយ ខណៈដែលវាអាចជួយទៅបង្រួមរន្ធញើសយ៉ាងមានប្រសិទ្ធិភាពព្រមទាំងជួយសម្រួលដល់ការស្រូបយកសារធាតុចិញ្ចឹមចេញពីផលិតផលបន្ទាប់ផងដែរ។ ដូច្នេះហើយជាការប្រសើរយើងអាចជ្រើសនូវផលិតផលដែលសាកសមនឹងប្រភេទស្បែកមុខ និងគ្មានជាតិអាល់កុល។ ជាពិសេសផលិតផលនោះមានគ្រឿងផ្សំដូចជា chamomile, burdock root និង allantoin ដែលធ្វើអោយស្បែកមានតុល្យភាព។
៤. ប្រើប្រាស់ Retinol
Retinol មានតួនាទីជួយបន្សាបរ៉ាឌីកាល់សេរីដែលបំផ្លាញសារធាតុខូឡាជែនលើស្បែក ព្រមទាំងជួយជំរុញដល់សរសៃឈាម រក្សា និងការពារបរិមាណខូឡាជែនក្នុងស្បែកក៏ដូចជាការពារភាពចាស់យ៉ាងមានប្រសិទ្ធិភាព។ លើសពីនេះ Retinol ក៏មានប្រយោជន៍ក្នុងការលាងសម្អាតកោសិកាងាប់ និងជួយឱ្យស្បែកស្រអាប់ប្រែជាភ្លឺថ្លាឡើងវិញផងដែរ។ ប៉ុន្តែត្រូវចងចាំថា Retinol ក៏អាចធ្វើឱ្យស្បែកយើងរលាកបានយ៉ាងងាយ ប្រសិនបើមិនយល់អំពីរបៀបនៃការប្រើប្រាស់ឱ្យបានត្រឹមត្រូវ។
៥. ឡេការពារកម្ដៅថ្ងៃ

ជំហានមួយនេះគឺជាជំហានដែលសំខាន់ខ្លាំងបំផុតនៅក្នុងទម្លាប់នៃការថែរក្សាស្បែកមុខ មិនថាស្បែកមុខរបស់យើងប្រភេទណានោះទេ។ ការប៉ះពាល់ពីពន្លីព្រះអាទិត្យ និងកត្តាផ្សេងៗដែលជះឥទ្ធិពលពីបរិយាកាសខាងក្រៅនឹងធ្វើឱ្យស្បែកមុខខ្មៅស្រអាប់ រលាក ឡើងមុន និងជាំជាដើម។ ដូច្នេះហើយទើបយើងចាំបាច់ត្រូវតែប្រើឡេការពារកម្ដៅថ្ងៃ មិនថានៅក្នុងផ្ទះ ឬចេញក្រៅឡើយ៕

























Account
Security
Favourite Content