ជាធម្មតា នៅពេលដែលធ្វើដំណើរទៅលេងនៅប្រទេសកូរ៉េខាងត្បូង ភ្ញៀវទេសចរបរទេសទូទៅតែងតែនិយមផ្ដោតយកទីក្រុងសេអ៊ូលជាទិសដៅគោល។ ដោយឡែក សម្រាប់អ្នកដែលនិយមស្ដាប់បទចម្រៀងខេប៉ុប ការដែលបានទៅដើរនៅទីតាំងជាមួយគ្នានឹងស្រុកកំណើតរបស់តារាក្នុងដួងចិត្ត ប្រហែលជាពេលវេលាដ៏ល្អបំផុតសម្រាប់ពួកគេ។
ហេតុដូចនេះហើយ ទីក្រុងទាំង ៥ខាងក្រោមនេះ ជាទីតាំងដែលអ្នកគាំទ្រចម្រៀងខេប៉ុបគួរបញ្ចូលក្នុងគម្រោងដើរលេង ពេលទៅដល់ប្រទេសកូរ៉េខាងត្បូង៖
១. ទីក្រុង Busan



ស្ថិតនៅភាគខាងត្បូងនៃប្រទេសកូរ៉េខាងត្បូង Busan ជាស្រុកកំណើតរបស់តារាខេប៉ុបជាច្រើនរូប រួមាន Jungkook និង Jimin សមាជិក BTS, Woozi សមាជិក Seventeen និង Winter សមាជិក Aespa។ ដោយមានទីតាំងភូមិសាស្រ្តជាប់នឹងផ្ទៃសមុទ្រ Busan ជាទីក្រុងមួយដែលមានមុខម្ហូបធ្វើពីគ្រឿងសមុទ្រយ៉ាងសម្បូរបែប ក៏ដូចជាម្ហូបល្បីប្រចាំតំបន់ដែលជាបបរបែបកូរ៉េឈ្មោះ Gukbap ។
សម្រាប់កន្លែងដើរលេងដែលមិនគួររំលងវិញ អ្នកអាចដើរទស្សនាភាពវប្បធម៌ចម្រុះពណ៌ Gamcheon ក៏ដូចជាជិះរថភ្លើងគយគន់ទេសភាពឆ្នេរ Haeundae។
២. ទីក្រុង Jeonju


តារាមិនតិចរូបទេដែលបានចាប់កំណើតក្នុងទីតាំងពេញដោយវប្បធម៌ប្រពៃណី Jeonju។ តួយ៉ាង Sunggyu ពីក្រុម INFINITE, Hwasa ពីក្រុម MAMAMOO, Taeyeon ពីក្រុម Girls’ Generation និងតារាសម្តែង Bae In Hyuk សុទ្ធតែមានស្រុកកំណើតនៅទីនេះ។
Jeonju ជាទីក្រុងមួយមានទីតាំងស្ថិតនៅក្នុងខេត្ត North Jeolla ប្រទេសកូរ៉េខាងត្បូង និងមានកេរ្តិ៍ឈ្មោះល្បីល្បាញទាក់ទងនឹងប្រវត្តិសាស្រ្ត វប្បធម៏ប្រពៃណី ជាពិសេសគឺទីតាំងភូមិ Hanok តែម្ដង។ មន្តស្នេហ៍នៃភូមិបុរាណមួយនេះ គឺទិដ្ឋភាពនៃសំណង់អាគារចំណាស់ ធម្មជាតិ និងម្ហូបអាហាររសជាតិដើមរបស់កូរ៉េ។
៣. ទីក្រុង Daegu


Daegu ជាទីក្រុងធំទី៣ របស់កូរ៉េខាងត្បូង បន្ទាប់ទីក្រុងសេអ៊ូល និងBusan ហើយក៏ជាទីក្រុងកំណើតរបស់ SUGA សមាជិក BTS និង Irene សមាជិក Red Velvet ផងដែរ។
ដ្បិតមិនមែនជាទីតាំងពេញនិយមប៉ុន្មានសម្រាប់អ្នកទេសចរ ក៏ប៉ុន្តែ Daegu ជាទីក្រុងមួយដែលមានលាយបញ្ចូលគ្នារវាងភាពទាក់ទាញបែបប្រពៃណី និងបែបទំនើប។ បើសិនជាអ្នកបានទៅកាន់ទីតាំងមួយនេះ សូមកុំរំលងសួនកម្សាន E-World, បឹង Susong និងផ្សារ Seomun ដែលជាទីប្រជុំនូវម្ហូបអាហារឆ្ងាញ់ៗនៅពេលរាត្រី។
៤. ទីក្រុង Ulsan



មិនត្រឹមតែជាទីតាំងដែលស័ក្តិសមបំផុតសម្រាប់អ្នកដែលចូលចិត្តស្រូបខ្យល់អាកាសធម្មជាតិ និងសិក្សាពីវប្បធម៌ក្នុងពេលតែមួយប៉ុណ្ណោះទេ ទីក្រុង Ulsan ក៏ជាស្រុកកំណើតរបស់តារាខេប៉ុបល្បីៗដូចជា Wonbin សមាជិកក្រុម RIIZE, តារាសម្តែង Han So Hee, តារាចម្រៀង BIBI និង Yura សមាជិកក្រុម Girl’s Day ផងដែរ។
សម្រាប់ទីតាំងបែបវប្បធម៌ និងធម្មជាតិសំខាន់ៗនៅក្នុងទីក្រុងមួយនេះ មានដូចជា ព្រៃឫស្សី Taehwagang សារមន្ទីរត្រីបាឡែន Jangsaengpo, ទឹកជ្រោះ Paraeso, កោះ Seuldo និងទន្លេ Taehwa។
៥. កោះ Jeju



កោះ Jeju ជាទីតាំងលំហែអារម្មណ៍ដ៏ល្បីល្បាញមួយនៅក្នុងប្រទេសកូរ៉េខាងត្បូង។ បន្ថែមពីនេះទៀត តារាៗដូចជា Seungkwan ពីក្រុម Seventeen, Mina ពីក្រុម Gugudan, Baekho ពីក្រុម NU’EST និង Joy ពីក្រុម Red Velvet ក៏សុទ្ធសឹងតែមានស្រុកកំណើតនៅដែនសមុទ្រមួយនេះដូចគ្នា។
កោះ Jeju ជាគោលដៅទេសចរណ៍សម្រាប់អ្នកដែលចង់គេចចេញពីទីក្រុង មកស្វែងរកខ្យល់អាកាសបរិសុទ្ធ ទេសភាពស្រស់បំព្រង និងបរិយាកាសស្ងប់ស្ងាត់នៅមាត់សមុទ្រ។ ទីតាំងសំខាន់ៗដែលអ្នកមកដល់កោះមួយនេះហើយមិនងាយនឹងរំលង រួមមាន ភ្នំ Hallasan, ភ្នំ Seongsan Ilchulbong និងតំបន់ឆ្នេរសមុទ្រជុំវិញផ្ទៃកោះ៕
























Account
Security
Favourite Content