កម្រងរូបភាពដ៏ស្រស់ត្រកាលនៃបរិវេណប្រាសាទអង្គរវត្តនារដូវកាលបៃតងនេះត្រូវបានបណ្ដាមហាជនចែករំលែកព្រោងព្រាតពេញបណ្ដាញសង្គម និងទទួលបានការសរសើរយ៉ាងច្រើនក្រាស់ក្រែល។

ថ្មីៗ នេះនៅលើផេកផ្លូវការរបស់អាជ្ញាធរជាតិអប្សរាបានបង្ហោះរូបភាពស្អាតៗនៃប្រាសាទអង្គរវត្តអមដោយទេសភាពខៀវស្រងាត់ក្នុងរដូវកាលបៃតង។ សម្រស់ដ៏ស្រស់ត្រកាលនៃប្រាសាទបុរាណមួយនេះកំពុងទាក់ភ្នែកភ្ញៀវទេសចរជាតិនិងអន្តរជាតិដែលបានមកទស្សនាពាំនាំនូវទិដ្ឋភាពដ៏ល្អឯកទៅចែកចាយបន្ត។
តាមរយៈរូបភាពដែលទើបបង្ហោះថ្មីៗ ដោយផេកផ្លូវការខាងលើបានបង្ហាញនូវជ្រុងនៃបរិវេណប្រាសាទអង្គរវត្តដែលមើលខាងណាក៏បៃតងស្រស់អមដោយវាលស្មៅខៀវស្រងាត់ដែលលូតលាស់ក៏ព្រោះតែដង្ហើមទឹកដែលបង្អុរចុះដោយព្រះភិរុណ។ ពិតណាស់ សម្រស់ប្រាសាទដ៏ប្រណីតអមដោយទេសភាពយ៉ាងល្អឯកព្រមជាមួយខ្យល់អាកាសដ៏បរិសុទ្ធទៀតផងនោះពិតជាបានធ្វើឱ្យអ្នកទេសចរបានធូរស្រាលរាល់កង្វល់ពេលបានមកទស្សនាម្ដងៗ។










គួរឱ្យដឹងដែរថា ប្រាសាទចំណាស់មួយនេះទទួលបានការស្ញប់ស្ញែងមិនដាច់ពីសំណាក់ទេសចរទាំងក្នុងនិងក្រៅស្រុក។ ប្រាសាទនេះដែរពុំដែលត្រូវបានភ្ញៀវទេសចររំលងនោះទេរាល់ពេលមកប្រទេសកម្ពុជានិងបានមកដល់ខេត្តសៀមរាប។
ប្រាសាទអង្គរវត្ត ឬអង្គរតូចមានទីតាំងស្ថិតនៅភាគខាងជើងនៃក្រុងសៀមរាបនៃខេត្តសៀមរាប ដែលមានចម្ងាយប្រមាណ ៧ គីឡូម៉ែត្រពីទីរួមខេត្តសៀមរាប តាមផ្លូវកូម៉ៃ ឬផ្លូវសាលដឺហ្គោល៕
រូបភាព ៖ ស៊ិន ប្រណី,រដ្ឋ ផល្លីន


























Account
Security
Favourite Content