ប្រាសាទមេបុណ្យខាងលិច ជាប្រាសាទបុរាណខ្មែរត្រូវបានស្ថាបនាឡើងនៅអំឡុងពាក់កណ្តាលសតវត្សទី១១ នៃគ្រឹស្តសករាជក្នុងរាជ្យព្រះបាទឧទយាទិត្យវរ្ម័នទី២ (ឆ្នាំ១០៤៩-១០៦៦) ដើម្បីឧទ្ទិសថ្វាយព្រះវិស្ណុក្នុងព្រហ្មញ្ញសាសនា។

រំលឹកទៅកាលពីជាង ៨០ឆ្នាំមុន ពោលគឺក្នុងឆ្នាំ១៩៣៦ ធ្លាប់មានក្រុមអ្នកស្រាវជ្រាវធ្វើកំណាយស្រាវជ្រាវ និងបានរកឃើញបដិមារូបព្រះវិស្ណុផ្ទំមួយកំណាត់ព្រះកាយខាងលើយ៉ាងធំនៅកណ្ដាលប្រាសាទ។

អ្វីដែលគួរឱ្យភ្ញាក់ផ្អើលនោះ ព្រះកាយព្រះវិស្ណុមួយកំណាត់ខាងលើនេះ ធ្វើអំពីសំរឹទ្ធ មានព្រះហស្ថស្ដាំពីរ ព្រះសីសៈ និងដើមទ្រូង។ កំណាត់ព្រះកាយដែលគេប្រទះឃើញនេះ មានកម្ពស់ ១២២ សង់ទីម៉ែត្រ ប្រវែង ២២២ សង់ទីម៉ែត្រ និងទទឹង៧២.៥ សង់ទីម៉ែត្រ។
កាន់តែអស្ចារ្យនោះ ព្រះបដិមានេះជាភស្ដុតាងសិល្បៈធំជាងគេ ដែលធ្វើពីលោហៈនៅក្នុងតំបន់អង្គរ ហើយប្រសិនបើនៅមានរូបរាងពេញទម្រង់ប្រហែលជាមានប្រវែងជាង ៤ ម៉ែត្រឯណោះ។ បច្ចុប្បន្ន ព្រះបដិមានេះតម្កល់ទុកនៅសារមន្ទីរជាតិភ្នំពេញ។

ប្រាសាទមេបុណ្យខាងលិច មានលក្ខណៈពិសេសប្លែក ដោយសារសំណង់ប្រាសាទមានទំហំ១០០ ម៉ែត្របួនជ្រុង មានកំពែងមួយជាន់ និងមានសំណង់ថ្មភក់រាងមូល ប្រៀបដូចជាអណ្ដូងទឹកដែលមានអង្កត់ផ្ចិត ៣ម៉ែត្រ ស្ថិតនៅចំកណ្ដាលស្រះទឹកក្នុងប្រាសាទ។ ឯកំពែងខាងកើត ស្ថាបត្យករបានរចនាជាថែវរំលេចដោយក្បាច់រចនាយ៉ាងស្អាត មានបង្អួចចំហ និងគោបុរៈចំនួន៣ ដែលធ្វើពីថ្មពណ៌ផ្កាឈូក៕



























Account
Security
Favourite Content