សួនផ្កាពណ៌ស ចម្រុះពណ៌ស្វាយ កំពុងមានវត្តមានលើទឹកដីខេត្តបាត់ដំបង ហើយក៏ដល់រដូវរីកស្គុះស្គាយបង្អួតសម្រស់គ្នាយ៉ាងស្រស់ស្អាត ក្នុងសួនផ្កា ឡាអេសេវិន ។ សួនផ្កាចម្រុះពណ៌ដ៏ស្រស់ស្អាតមួយនេះ កំពុងក្លាយជាគោលដៅចុងឆ្នាំសម្រាប់ភ្ញៀវទេសចរទាំងក្នុង និងក្រៅតំបន់ទៅលេងកម្សាន្តពេលទៅដល់ទឹកដីបាត់ដំបង។


នារដូវផ្ការីកចុងឆ្នាំនេះ សួនផ្កាដំណក់ទឹកភ្លៀងពណ៌ស និងផ្កាឡាវែនឌ័រពណ៌ស្វាយ កំពុងបង្អួតសម្រស់ ហាក់ដូចជាត្រៀមខ្លួនយ៉ាងរួចរាល់រង់ចាំទទួលស្វាគមន៌ភ្ញៀវទេសចរដែលមានបំណងមកលេង និងគយគន់សម្រស់ឆើតឆាយរបស់ខ្លួន។ នៅក្នុងសួនផ្កាចម្រុះពណ៌មួយនេះមានផ្កាច្រើនប្រភេទ ហើយក៏រីកទៅតាមរដូវកាលផងដែរ ជាក់ស្តែងនៅចុងខែ ធ្នូ ដល់ដើមខែមករា ត្រឹមថ្ងៃទី ៥ ផ្កាដំណក់ទឹកភ្លៀងពណ៌សនឹងបន្តរីកស្គុះស្គាយយ៉ាងស្រស់ស្អាតប្រៀបបីដូចជាព្រិលសនារដូវរងារ រីឯផ្កាឡាវែនឌ័រពណ៌ស្វាយអាចបន្តភាពស្រស់ស្អាតរបស់ខ្លួនរហូតដល់ចុងខែមករាគឺពេញ ១ ខែតែម្តង។ ផ្កាជាច្រើនប្រភេទទៀតក៏កំពុងបន្តរីកជាបន្តបន្ទាប់គ្នា ដើម្បីជាចំណីចក្ខុដល់អ្នកដែលមកទស្សនាក្នុងសួនផ្កាដ៏ស្រស់ស្អាតមួយនេះ។



សួនដ៏ស្រស់ស្អាតមួយនេះមានទីតាំងនៅភូមិចម្ការសំរោង២ សង្កាត់ចំការសំរោង ខេត្ត បាត់ដំបង ។ សម្រាប់លេខទូរស័ព្ទទំនាក់ទំនង 070727737/ 011349799។ សម្រាប់ការចូលទស្សនានៅក្នុងសួនផ្កាដ៏ស្រស់ស្អាតមួយនេះ តែ ៥ ពាន់រៀលប៉ុណ្ណោះសម្រាប់មនុស្សធំ ហើយកុមារតូចៗ មិនគិតលុយនោះទេ ។ ចាំកាល់ទៀត បបួលគូកនសក់វែងសក់ខ្លីឲ្យអស់ ទៅថតរូបបង្កើតអនុស្សារវីយ៌ល្អៗជាមួយគ្នាម្តងទៅ៕
រូបភាព៖ បាត់ដំបងដែលខ្ញុំនឹក


























Account
Security
Favourite Content