ព័ត៌មានកម្សាន្តប្លែកៗ
រសនិយម
តន្រ្តី
ភាពយន្ត
មាតិកាឌីជីថល
បើកសោជីវិត
ចង់ដឹងរឿងគេ
វនយាត្រា
Cicada Agent
ព្រះនាងកង្កែប
សម្រាប់អ្នកដែលស្រឡាញ់ធម្មជាតិ ពិបាកនឹងមើលរំលងសម្រស់ទឹកជ្រោះណាស់។ មានអ្វីមួយដែលគួរឱ្យចាប់អារម្មណ៍អំពីអច្ឆរិយៈធម្មជាតិនេះ ដែលអាចនាំមកនូវអារម្មណ៍ស្ងប់ស្ងាត់ពោរពេញដោយសេចក្ដីសុខផ្លូវចិត្ត។ ទោះបីជាវាអាចជាដំណើរដ៏នឿយហត់មួយដើម្បីស្វែងរកភាពស្រស់ស្អាតបំផុតក៏ដោយ អារម្មណ៍នឹងប្រែជាស្រស់ស្រាយពេលដែលអ្នកបានឃើញសម្រស់ទឹកជ្រោះនៅចំពោះមុខ ភាពហត់នឿយទាំងអម្បាលម៉ាននឹងរលាយអស់ ការធ្វើដំណើរដ៏វែងឆ្ងាយរបស់អ្នកដូរមកវិញនូវទិដ្ឋភាពដ៏អស្វារ្យ ពិតសមតម្លៃបំផុត។
ជំនួសឱ្យការចំណាយពេលវិស្សមកាលរបស់អ្នកទៅកន្លែងទេសចរណ៍ធម្មតា ហេតុអ្វីមិនពិចារណាទៅទស្សនាទឹកធ្លាក់ដ៏ស្រស់ស្អាតបំផុតមួយក្នុងពិភពលោក? អត្ថបទនេះនឹងបង្ហាញពីទឹកជ្រោះស្អាតៗ គួរឱ្យភ្ញាក់ផ្អើលបំផុតមួយចំនួន រួមទាំងទឹកធ្លាក់ដែលជាប់ចំណាត់ថ្នាក់ក្នុងចំណោមកំពូលទាំង ១០ នៅលើពិភពលោក។
១. ទឹកធ្លាក់ Iguazu ក្នុងប្រទេសអាហ្សង់ទីន និងប្រេស៊ីល
នេះជាទឹកធ្លាក់ដ៏អស្ចារ្យបំផុតគួរតែស្ថិតក្នុងបញ្ជីដំណើរទស្សនាចររបស់អ្នក។ នេះជាទឹកធ្លាក់ដ៏ធំបំផុតក្នុងពិភពលោក មានបណ្ដុំទៅដោយទឹកជ្រោះរាប់រយ បន្តបន្ទាប់គ្នាលាតសន្ធឹងជិត ៣ គីឡូម៉ែត្រនៅតាមព្រំដែនរវាងប្រទេសប្រេស៊ីល និងអាហ្សង់ទីននៅលើទន្លេ Iguazu ។
ទឹកធ្លាក់ Iguazu ត្រូវបានហ៊ុំព័ទ្ធដោយព្រៃរងទឹកភ្លៀងរាប់ម៉ឺនហិច ផ្ដល់នូវទិដ្ឋភាពដ៏អស្ចារ្យក្រៃលែង ដក់ចិត្តក្នុងចិត្តមិនអាចបំភ្លេចបាន វាប្រៀបបានដូចជាឋានសួគ៌ទឹកធ្លាក់ នៅកណ្ដាលព្រៃព្រឹក្សាដ៏ល្វឹងល្វើយ។ ប្រសិនបើអ្នកចង់ទៅអំឡុងខែធ្នូ មករា និងកុម្ភៈ ទឹកធ្លាក់គឺខ្លាំងបំផុត អាកាសធាតុអាចសើម និងមានភ្លៀង។ ប៉ុន្តែប្រសិនបើអ្នកទៅអំឡុងខែមីនា-មេសា និងខែសីហា-កញ្ញា អាកាសធាតុល្អប្រសើរជាងបរិមាណទឹកអាចថមថយ និងមានមនុស្សច្រើនទៅកម្សាន្ត។
២. ទឹកធ្លាក់ Victoria ក្នុងប្រទេស Zimbabwe/Zambia
ទឹកធ្លាក់បន្ទាប់ គឺទឹកធ្លាក់ Victoria ដែលជាប់ចំណាត់ថ្នាក់ជាទឹកធ្លាក់ដ៏ល្បីល្បាញបំផុតនៅលើពិភពលោក។ ទោះបីជាវាមិនមែនជាទឹកធ្លាក់ខ្ពស់ជាងគេ ឬធំជាងគេក៏ដោយ ទឹកធ្លាក់ Victoria ត្រូវបានគេស្គាល់ជាទូទៅថាជាទឹកជ្រោះដ៏ធំបំផុតនៅលើពិភពលោកសម្រាប់ផ្ទាំងទឹកធ្លាក់ដ៏ធំមហិមារបស់វា។
ទឹកធ្លាក់ Victoria មានទទឹង ១៧០៨ ម៉ែត្រ និងមានកម្ពស់ខុសៗគ្នា ដែលនាំមកនូវទឹកធ្លាក់ចុះមកក្រោមខ្ពស់បំផុតរហូតដល់ ១០៨ម៉ែត្រ។ ទឹកធ្លាក់នេះស្ថិតនៅលើទន្លេ Zambezi រវាងប្រទេស Zimbabwe និង Zambia វាក៏ត្រូវបានគេហៅថា “The Smoke that Thunders”។
ទឹកធ្លាក់ Victoria គឺជាអច្ឆរិយវត្ថុធម្មជាតិដែលទាក់ទាញអ្នកទេសចរឱ្យធ្វើដំណើរដ៏អស្ចារ្យទៅកាន់ប្រទេស Zambia ឬ Zimbabwe សម្រាប់បទពិសោធន៍ក្នុង១ជីវិត គួរទៅស្គាល់ឱ្យបានម្ដង។ ប្រសិនបើអ្នកចង់ឃើញទិដ្ឋភាពដ៏អស្ចារ្យនៃអច្ឆរិយៈធម្មជាតិនេះ អ្នកគួរតែទៅចន្លោះខែមីនា និងខែសីហា ដើម្បីទទួលបានទិដ្ឋភាពដ៏ល្អបំផុតនៅក្រោមផ្ទៃមេឃដ៏ច្បាស់បំផុត។
៣. Angel Falls ក្នុងប្រទេស Venezuela
ទឹកធ្លាក់ Angel Falls មានទីតាំងស្ថិតនៅក្នុងប្រទេស Venezuela គឺជាទឹកធ្លាក់ដ៏ស្រស់ស្អាតបំផុតមួយ ហើយក៏ជាទឹកជ្រោះដែលមានកម្ពស់ខ្ពស់ជាងគេនៅលើពិភពលោកផងដែរ។ ជាមួយនឹងកម្ពស់មិនគួរឱ្យជឿរហូតដល់ ៩៧៩ ម៉ែត្រ Angel Falls គឺជាទឹកធ្លាក់ខ្ពស់បំផុត នាំយកទឹកដ៏ត្រជាក់ថ្លាឆ្វង់ធ្លាក់ចុះមកក្រោមជាមួយនឹងល្បឿនលឿនបំផុតរបស់វា ។ ទឹកធ្លាក់ Angel Falls មានប្រភពចេញពីទន្លេ Churun ហើយហូរកាត់គែមភ្នំ បង្កើតបានជាទឹកពណ៌ស ប្រៀបដូចពេជ្រហូរចុះមកខាងក្រោម។ ប្រសិនបើអ្នកចង់ទៅវិស្សមកាលនៅ Venezuela ទឹកជ្រោះដ៏ស្រស់ស្អាតនេះគឺជាកន្លែងទាក់ទាញបំផុតមិនគួររំលង។ យ៉ាងណាមិញ ដោយសារវាស្ថិតនៅក្នុងតំបន់ដាច់ស្រយាល ការមកដល់ទឹកធ្លាក់នេះគឺជាការលំបាក។
៤.ទឹកធ្លាក់ Niagara នៅសហរដ្ឋអាមេរិក/កាណាដា
នៅពេលដែលនិយាយពីទឹកធ្លាក់ដ៏ល្បីល្បាញបំផុតនៅលើពិភពលោក យើងគួរតែនិយាយអំពីទឹកធ្លាក់ Niagara ។ ទោះបីជាវាមិនមែនជាទឹកធ្លាក់ខ្ពស់បំផុតក៏ដោយ តែទឹកធ្លាក់ Niagara ពិតជាគួរឱ្យចាប់អារម្មណ៍បំផុត ពីវិសាលភាព និងថាមពលរបស់វា។ ទឹកធ្លាក់នេះនៅជាប់ព្រំដែនរវាងប្រទេសកាណាដា និងសហរដ្ឋអាមេរិក ដែលមានប្រភពមកពីទន្លេ Niagara បន្តភ្ជាប់ទៅកាន់បឹង Erie និងបឹង Ontario ។ ទឹកធ្លាក់ Niagara ត្រូវបានបង្កើតឡើងដោយទឹកធ្លាក់ចំនួន ៣ ទន្ទឹមគ្នា ដោយទឹកធ្លាក់ធំបំផុតគឺ Horseshoe Falls ដែលមានកំពស់ ១៦៧ហ្វីត។ ទឹកធ្លាក់ពីរផ្សេងទៀតគឺ American Falls និង Bridal Veil Falls ស្ថិតនៅខាងព្រំដែនសហរដ្ឋអាមេរិក។ ទិដ្ឋភាពទឹកដ៏ធំមហិមា ហូរធ្លាក់ចុះទៅជម្រៅដ៏សែនជ្រៅ បង្កើតបានជាអ័ព្ទផ្សែងខ្មួលខ្មាញ់ មានពណ៌ដូចឥន្ធនូរ បានធ្វើឱ្យទីនេះក្លាយជាឋានសួគ៌ក្រោមមេឃពិតៗ។
៥.Gullfoss នៅអ៊ីស្លង់
អ៊ីស្លង់មានលក្ខណៈភូមិសាស្ត្រដ៏ពិសេស និងទេសភាពដ៏អស្ចារ្យសម្រាប់ដំណើរផ្សងព្រេងរបស់អ្នក។ ទីកន្លែងធម្មជាតិដ៏ល្បីល្បាញបំផុតមួយរបស់អ៊ីស្លង់គឺទឹកជ្រោះ Gullfoss ។ វាត្រូវបានស្គាល់ជាទូទៅថាជា “Golden Falls” Gulfoss ព្រោះម្ដងម្កាលទឹកជ្រោះមួយនេះនឹងប្រែជាពណ៌មាសដោយសារពន្លឺព្រះអាទិត្យ អ្វីដែលអស្ចារ្យបំផុតនោះទីនេះជាប្រភពនៃឥន្ធនូ អាចមើលឃើញច្បាស់ៗនឹងភ្នែកបង្កប់ខ្លួនក្នុងអ័ព្ទផ្សែងរបស់វា។ Gullfoss បានធ្លាក់ចុះ មកកម្ពស់ ៣២ម៉ែត្រ និងមាន ២ថ្នាក់ បន្តហូរចូលទៅក្នុងទន្លេ Hvita, Gullfoss។ ទិដ្ឋភាពទឹកជ្រោះដ៏ធំហូរធ្លាក់ពីទីខ្ពស់ បង្កើតបានជាផ្សែងប្រៀបពពកដ៏ស្ដើង ឃើញច្បាស់នឹងភ្នែក។ ប្រសិនបើអ្នកមានគម្រោងទៅលេងអ៊ីស្លង់ អ្នកគួរតែមករដូវក្តៅនៅពេលអាកាសធាតុក្តៅជាងមុន ដែលជាពេលវេលាដ៏ល្អបំផុតដើម្បីមើលទឹកធ្លាក់ក្នុងសភាពអស្ចារ្យបំផុត។ អ្នកអាចទៅទស្សនាពេលព្រលឹម ឬពេលរសៀល ដើម្បីមើលទេសភាពពណ៌មាសដ៏គួរឱ្យចាប់អារម្មណ៍។
៦.ទឹកធ្លាក់ Ban Gioc-Detian ក្នុងប្រទេសវៀតណាម
ទឹកជ្រោះដ៏ល្បីក្នុងពិភពលោកដែលយើងនឹងនិយាយបន្តនេះគឺស្ថិតក្នុងទ្វីបអាស៊ី។ វាមានទីតាំងនៅជាប់ព្រំដែនចិន និងវៀតណាម ទឹកធ្លាក់ Ban Gioc ក៏ជាប់ចំណាត់ថ្នាក់ជាទឹកធ្លាក់ដ៏ធំបំផុតរបស់អាស៊ីផងដែរ។ ទឹកធ្លាក់នេះហូរតាមទន្លេ Quay Son ដែលបែងចែកប្រទេសទាំងពីរ។ វាត្រូវបានគេស្គាល់ថាជាទឹកធ្លាក់ Detian ឬទឹកធ្លាក់ Ban Giocពិតជាមិនអាចប្រកែកបានទេថា វាក៏ស្ថិតក្នុងចំណោមទឹកធ្លាក់ដ៏ល្អបំផុតនៅលើពិភពលោក។ ទឹកជ្រោះនេះព័ទ្ធជុំវិញដោយរុក្ខជាតិខៀវស្រងាត់ ជាពិសេសវាស្ថិតនៅកណ្ដាលនៃជ្រលងភ្នំ Karst ប្រៀបបានដូចជាទ្វារបើកចំហរ ឱ្យទឹកជ្រោះនេះធ្លាក់មកបង្កើតបាននូវទេសភាពដ៏ស្រស់ស្អាតក្រៃលែង។ ប្រសិនបើអ្នកចង់ទៅលេងទឹកធ្លាក់ Ban Gioc សូមទៅនៅចន្លោះខែកញ្ញាដល់ខែតុលា ដើម្បីទទួលបានទេសភាពល្អបំផុត។
៧.ទឹកធ្លាក់ Tukad Cepung នៅកោះបាលី ប្រទេសឥណ្ឌូនេស៊ី
បញ្ជីចុងក្រោយនៃទឹកធ្លាក់ដ៏ស្រស់ស្អាតបំផុតនៅលើពិភពលោកគឺមកពីប្រទេសឥណ្ឌូនេស៊ី។ ទឹកធ្លាក់ Tukad Cepung គឺជាទឹកធ្លាក់ដ៏ស្រស់ស្អាតបំផុតមួយរបស់បាលី។ ផ្នែកដ៏គួរឱ្យចាប់អារម្មណ៍បំផុតនៃទឹកជ្រោះនេះគឺនៅពេលដែលកាំរស្មីព្រះអាទិត្យចាំងឆ្លងកាត់ វានឹងបញ្ចាំងពណ៌ឥន្ទនូនៅលើទឹកដែលមានពន្លឺចែងចាំងប្រៀបបានជាទិដ្ឋភាពកើតចេញពីវេទមន្ត។ នៅពេលដែលអ្នកទៅដល់ទីនោះ អ្នកនឹងទទួលបានអារម្មណ៍ត្រជាក់ស្រួលខ្លួន ចេញពីធម្មជាតិពិតៗ ហើយអ្នកក៏អាចចុះទៅងូត ឬហែលទឹកលេងនៅផ្នែកខាងក្រោម នៃទឹកត្រជាក់ និងស្រស់ស្អាតបំផុតក្នុងពិភពលោក ៕
Account
Security
Favourite Content