ព័ត៌មានកម្សាន្តប្លែកៗ
រសនិយម
តន្រ្តី
ភាពយន្ត
មាតិកាឌីជីថល
បើកសោជីវិត
ចង់ដឹងរឿងគេ
វនយាត្រា
Cicada Agent
ព្រះនាងកង្កែប
រដូវកាន់បិណ្ឌបានមកដល់ហើយ ជាទំនៀមប្រជាជនខ្មែរ ដែលជាពុទ្ធសាសនិកជន តែងទៅវត្តអារាម យកចង្ហាន់ ប្រគេនព្រះសង្ឃ ដើម្បីឧទ្ទិសកុសលផលបុណ្យ ទៅកាន់ដូនតាដែលបានចែកឋានទៅ។ ក្នុងនោះក៏មានក្រុមគ្រួសារខ្លះ ឆ្លៀតឱកាសធ្វើបុណ្យជុំគ្រួសារនេះ តែងចង់ហួសទៅកម្សាន្ត នៅតំបន់ទេសចរណ៍ផ្សេងៗ ដើម្បីលម្ហែអារម្មណ៍។ ថ្ងៃនេះ AMS នឹងមកបង្ហាញវត្តអារាម ៥ កន្លែងនៅមិនឆ្ងាយពីភ្នំពេញប៉ុន្មានទេ មានរមណីយដ្ឋានស្អាតៗ ហើយសំបូរម្ហូបអាហារតម្លៃសមរម្យទៀត៖
១.វត្តមង្គលសិរីគៀនឃ្លាំង
វត្តអារាមមួយនេះ ជាទីពេញនិយមសម្រាប់អ្នករាជធានីភ្នំពេញ ព្រោះអារាមមួយនេះ នៅមិនឆ្ងាយពីក្រុង ពោលគឺស្ថិតនៅសង្កាត់ព្រែកលៀប ខណ្ឌជ្រោយចង្វារ តាមបណ្ដោយផ្លូវជាតិលេខ ៦។ អារាមដ៏ស្រស់ស្អាតមួយនេះ ស្ថិតនៅប្របនឹងដងទន្លេ មានខ្យល់អាកាសបរិសុទ្ធ មានដើមឈើធំៗ និងព្រះវិហារមានក្បូរក្បាច់យ៉ាងល្អវិចិត្រ។ មិនតែប៉ុណ្ណោះ ពេលចេញពីវត្ត ពុទ្ធបរិស័ទអាចហួសទៅរកទទួលអាហារថ្ងៃត្រង់ជុំគ្រួសារ នៅតាមកញ្ចុះ បណ្ដោយមាត់ទន្លេព្រែកលៀប មានម្ហូបឆ្ងាញ់ៗដ៏សំបូរបែប។
២.វត្តកៀនស្វាយក្រៅ
រមណីយដ្ឋានកៀនស្វាយក្រៅ ជារមណីយដ្ឋានធម្មជាតិ ស្ថិតនៅក្នុង ឃុំ ភូមិធំ ស្រុកកៀនស្វាយ ចម្ងាយផ្លូវសរុបពីភ្នំពេញ ១៩ គ.ម។ នៅទីនោះមាន វត្តមួយដែលមានឈ្មោះថា វត្តកៀនស្វាយក្រៅ។ ដើម្បីទៅដល់វត្តនោះអ្នកទេសចរត្រូវធ្វើដំណើរតាមផ្លូវជាតិលេខ ១ ដោយឆ្លងកាត់ស្ពានព្រះមុនីវង្ស លុះទៅដល់គីឡូម៉ែត្រលេខ ១៩ មានផ្លូវលំនៅខាងឆ្វេងដៃ មានខ្លោងទ្វារបញ្ជាក់ថា វត្តកៀនស្វាយក្រៅ ។ បន្តតាមផ្លូវលំនោះ ចម្ងាយប្រហែល ៣០០០ម៉ែត្រ ទៀតនឹងទៅដល់ទីអារាមនោះ ។ ចេញដំណើរហួសពីវត្តប្រមាណជា ១០០ ម៉ែត្រ យើងឃើញកន្លែងកម្សាន្តមួយ ដែលត្រូវគេ ស្គាល់ថា “កៀនស្វាយ ” ។ នៅទីនេះសំបូរម្ហូបអាហារឆ្ងាញ់ៗណាស់ ហើយថែមទាំងមានតម្លៃធូរថ្លៃទៀត។
៣.វត្តភ្នំរាប
វត្តភ្នំរាប ឬក៏គេច្រើនហៅថា វត្តសុវណ្ណធម្មរាជ មានទីតាំងស្ថិតនៅ សង្កាត់ពន្សាំង ខណ្ឌព្រែកព្នៅ និងមានចម្ងាយប្រហែល 43km ពីវត្តភ្នំរាជធានីភ្នំពេញ។ នៅទីនេះមានប្រាសាទថ្មមួយយ៉ាងធំស្កឹមស្កៃ យករចនាប័ទ្មលំនាំតាមប្រាសាទអង្គរយ៉ាងស្រស់ស្អាត ជាទីពេញនិយមសម្រាប់ថតរូប។ មិនតែប៉ុណ្ណោះវត្តមួយនេះល្បីមានបារមីពូកែស័ក្ដិសិទ្ធិពុទ្ធបរិស័ទច្រើនមកបន់ស្រន់ សុំសេចក្ដីសុខ សេចក្ដីចម្រើន។ ចេញពីវត្តមួយនេះ យើងអាចហួសទៅស្វែងរកម្ហូបអាហារឆ្ងាញ់ៗដែលមានលក់នៅក្រៅរបងវត្ត មានជាកញ្ចុះអង្គុយសម្រាកលម្ហែកាយមិនខ្វះឡើយ។
៤.វត្តភ្នំប្រសិទ្ធិត្រៃត្រឹង្ស
ប្រាសាទភ្នំបាសិទ្ធ ឬភ្នំប្រសិទ្ធិមានទីតាំងស្ថិតនៅភូមិតាពេជ្រ ឃុំឈ្វាំង ស្រុកពញាឭ ខេត្តកណ្តាល និងចម្ងាយ ២៨គីឡូម៉ែត្រពីរាជធានីភ្នំពេញតាមផ្លូវជាតិលេខ៥ ដល់ផ្សារព្រែកព្នៅបត់ឆ្វេងតាមថ្នល់កៅស៊ូដែលនាំយើងរហូតដល់ខ្លោងទ្វារវត្តភ្នំប្រសិទ្ធិត្រៃត្រឹង្ស ដែលស្ថិតនៅខាងស្តាំដៃ។ យើងអាចបន្តដំណើរតាមផ្លូវចាក់ស៊ីម៉ង់ទៅដល់វត្តនៅលើកំពូលភ្នំ។ នៅទីនេះក៏មានជាកញ្ចុះជាច្រើនមានលក់ម្ហូបអាហារឆ្ងាញ់ៗ ហើយក៏ជាទីពេញនិយមសម្រាប់ថ្ងៃសម្រាកធម្មតា និងថ្ងៃបុណ្យទាន។
៥.ភ្នំឧដុង្គ
ភ្នំឧដុង្តមានចំងាយប្រមាណ ៤០គីឡូម៉ែត្រពីភាគពាយព្យនៃរាជធានីភ្នំពេញ។ ទីកន្លែងនេះមានការទាក់ទាញជាថ្មី បន្ទាប់ពីការកសាង ព្រះសក្យមុនីចេតិយដ៏ធំនៅលើកំពូលភ្នំឧដុង្គជ្រុងខាងជើង ដែលមើលទៅឃើញធំខ្ពស់ និងមានភាពស្រស់បំព្រង។ ភ្នំឧដុង្តស្ថិតនៅក្នុងឃុំផ្សារដែក និងឃុំភ្នំបាត ស្រុកពញាឭ ខេត្តកណ្តាល។ រមណីយដ្ឋាននេះមានឈ្មោះចំនួន ៣ គឺ ភ្នំឧដុង្គ ភ្នំព្រះរាជ្យទ្រព្យ និងភ្នំអដ្ឋរស្ស។ ក្រៅពីទីកន្លែងគោរពសក្ការបែបព្រះពុទ្ធសាសនាទីនេះ មានផ្សារលក់ដូរម្ហូបអាហារដ៏សំបូរបែប មិនខ្វះឡើយ ជាពិសេសម្ហូបបែបស្រុកស្រែ និងមានកញ្ចុះអង្គុយញ៉ាំមិនខ្វះ៕
Account
Security
Favourite Content