នាពេលកន្លងមកនេះ អ្នកគាំទ្ររឿងភាគកូរ៉េជាច្រើនប្រាកដជាបានទស្សនាខ្លះហើយនូវរឿងភាគ “The Trauma Code” ដែលបាននាំទស្សនិកជនឱ្យបានឃើញពីរឿងរ៉ាវកើតឡើងក្នុងបន្ទប់សង្គ្រោះបន្ទាន់ ផ្នែកមួយក្នុងចំណោមផ្នែកដែលមានភាពវឹកវរបំផុតក្នុងមន្ទីរពេទ្យ ដឹកនាំដោយលោកវេជ្ជបណ្ឌិត Baek Kang-hyuk ដែលសម្តែងដោយតារាប្រុស Ju Ji-hoon។ មែនទែនទៅ តារាប្រុសវ័យ ៤២ឆ្នាំរូបនេះត្រូវបានគេស្គាល់ថាជាតារាសម្តែងដ៏មានទេពកោសល្យ និងតែងតែមានរឿងថ្មីៗឱ្យអ្នកគាំទ្របានតាមដានឥតដាច់។

ទោះបីជាមានរឿងថ្មីៗចេញមកជាបន្តបន្ទាប់ ប៉ុន្តែ Ju Ji Hoon អាចសម្ដែងតួអង្គនីមួយៗបានយ៉ាងល្អដែលធ្វើឱ្យទស្សនិកជន ជឿជាក់យ៉ាងមុតមាំថាលោកគឺពិតជាតួអង្គនោះ។ ថ្ងៃនេះ AMS សូមនាំអ្នកទាំងអស់គ្នាមកមើលស្នាដៃដ៏អស្ចារ្យ ៥ រឿងទៀតរបស់ Ju Ji Hoon ដែលអាចបញ្ជាក់ថា មិនថាសម្ដែងតួអ្វី ឬអាជីពអ្វីទេ ក៏តារាប្រុសរូបនេះពិតជាអាចលេងបានសមទាំងអស់។
Princess Hour (ឆ្នាំ ២០០៦)
Ju Ji Hoon បានចូលប្រឡូកក្នុងវិស័យសិល្បៈតាមរយៈការបង្ហាញម៉ូត មុននឹងទទួលបានតំណែងតួឯកក្នុងរឿងភាគដែលល្បីល្បាញពេញទ្វីបអាស៊ីកាលពី២០ឆ្នាំមុន គឺរឿង Princess Hour ឬដែលទស្សនិកជនខ្មែរធ្លាប់ស្គាល់តាមរយៈចំណងជើង “ក្រមុំឡេះឡោះ កំលោះទុយមុយ”។ រឿងមួយនេះបាននាំមនុស្សជាច្រើនឱ្យស្គាល់ពិភពរឿងភាគកូរ៉េ ហើយក៏ជាស្នាដៃមួយដែលបង្ហាញពីវប្បធម៌កូរ៉េដល់ប្រជាជនអាស៊ីផងដែរ ជាមួយនឹងរឿងរ៉ាវរបស់ Shin Chae Kyung (សម្ដែងដោយ Yoon Eun Hye) ក្មេងស្រីឡេះឡោះដែលបានក្លាយជាមហេសីរាជទាយាទសោះកក្រោះ Lee Shin (សម្ដែងដោយ Ju Ji Hoon)។ ជឿថានៅក្នុងសម័យនោះមានមនុស្សជាច្រើន ប្រាកដជាលង់ស្នេហ៍នឹង Ju Ji Hoon ក្នុងរូបភាពជាព្រះអង្គម្ចាស់រូបសង្ហាតែមាត់រឹងចិត្តក៏រឹង។

Kingdom (ឆ្នាំ២០១៩)
វិថីជាតារាសម្ដែងរបស់ Ju Ji Hoon បានដំណើរការយ៉ាងល្អ រហូតដល់ត្រូវជាប់គាំងដោយសារករណីគ្រឿងញៀនដែលធ្វើឱ្យលោកត្រូវបានផ្ដន្ទាទោសតាមច្បាប់យ៉ាងពេញបន្ទុក ។ បន្ទាប់ពីបានឆ្លងកាត់ព្យុះដ៏ធំក្នុងជីវិតនិងបាត់មុខបាត់មាត់មួយរយៈ Ju Ji-hoon ក៏ត្រលប់មកវិញជាមួយនឹងគម្រោងដ៏ធំមួយក្នុងនាមជារាជទាយាទ Lee Chang ក្នុងរឿង “Kingdom” ជារឿងភាគកូរ៉េដំបូងបង្អស់របស់ Netflix ដែលរៀបរាប់ពីរឿងរ៉ាវនៅពីក្រោយការសោយទិវង្គតរបស់ព្រះមហាក្សត្រដោយសារមេរោគឆ្លងដ៏សាហាវ និងប្រែក្លាយមនុស្សគ្រប់គ្នាទៅជាខ្មោច Zombie។ រឿងនេះត្រូវបានគេចាត់ទុកថាជាស៊េរីដែលធ្វើឱ្យ Trend K-Zombie កាន់តែរឹងមាំនធ្វើឱ្យភាពយន្តបែប zombie កូរ៉េកាន់តែមានប្រជាប្រិយភាពយ៉ាងទូលំទូលាយរហូតមកដល់បច្ចុប្បន្ន និងជាការនាំយករឿងភាគកូរ៉េទៅកាន់ពិភពលោកម្តងទៀតនៅក្នុងសម័យ Streaming។

Blood Free (ឆ្នាំ២០២៤)
ក្រឡេកទៅមើលឆ្នាំ ២០២៤ វិញគឺអាចនិយាយបានថាជាឆ្នាំមាសសម្រាប់ Ju Ji Hoon ដោយសារតែលោកបានបង្ហាញមុខក្នុងរឿងជាច្រើន ហើយមួយរឿងៗសុទ្ធតែមានសាច់រឿងប្លែកៗមិនជាន់គ្នាថែមទៀត។ ចាប់ផ្តើមជាមួយនឹង Blood Free ដែលជារឿងបែបវិទ្យាសាស្ត្រក្នុងពិភពលោកអនាគតដែលបានឈានទៅដល់ចំណុចដែលមនុស្សអាចផលិតសាច់សិប្បនិម្មិតសម្រាប់បរិភោគបាន ប៉ុន្តែអាថ៌កំបាំងនៅពីក្រោយក្រុមហ៊ុនផលិតសាច់នេះធ្វើឱ្យសាធារណជនងឿងឆ្ងល់យ៉ាងខ្លាំង។ ក្នុងរឿងនេះ Ju Ji-hoon ដើរតួជា Woo Chae-woon ជាអង្គរក្សរបស់ CEO Yoon Ja-yo សម្ដែងដោយតារាស្រី Han Hyo-joo)។

Love Your Enemy (ឆ្នាំ២០២៤)
បន្ទាប់ពីបង្ហាញខ្លួនក្នុងរឿងភាគដែលតម្រូវឱ្យសម្ដែងឈុតឆាកពិបាកៗជាច្រើន ទីបំផុតទស្សនិកជនក៏បានឃើញ Ju Ji Hoon ត្រលប់មកសម្តែងជារឿងស្នេហាបែបកំប្លែងម្ដងទៀតជាមួយរឿង Love Your Enemy ដែលសម្តែងជាមួយ Jung Yu Mi។ រឿងនេះរៀបរាប់ពីទំនាក់ទំនងរវាងក្រមុំកំលោះពីរនាក់ដែលកើតមកក៏ក្លាយជាសត្រូវនឹងគ្នាតែម្ដងដោយសារជម្លោះរវាងគ្រួសារមុននឹងយូរៗទៅក៏ប្រែក្លាយជាស្នេហា ប៉ុន្តែបន្ទាប់មកអ្នកទាំងពីរត្រូវបែកគ្នា រហូតដល់ ១៨ ឆ្នាំក្រោយទើបបានត្រលប់មកជួបគ្នាម្តងទៀត។

Light Shop (ឆ្នាំ២០២៤)
អស់ពីរឿងបែបស្នេហាផ្អែមល្ហែម រន្ធត់ស្លន់ៗហើយ ពេលនេះដល់វគ្គទឹកភ្នែកម្ដងជាមួយរឿងភាគចុងឆ្នាំ២០២៤ “The Light Shop” ដែលស្ថិតនៅក្នុងចក្រវាឡតែមួយជាមួយនឹងរឿងភាគ “Moving”។ រឿងនេះនាំអ្នកគ្រប់គ្នាទៅស្វែងយល់ពីស្លាកស្នាមទំនាក់ទំនងរវាងមនុស្សជាច្រើន នៅពេលដែលពិភពនៃមនុស្សរស់ និងមនុស្សស្លាប់បានមកជួបគ្នាតាមរយៈហាងចង្កៀងអាថ៌កំបាំងនៅចុងផ្លូវដ៏ស្ងាត់មួយ។ ក្នុងរឿងនេះ Ju Ji Hoon ដើរតួជា Jung Won Young ដែលជាម្ចាស់ហាងនោះ ៕
























Account
Security
Favourite Content