នៅព្រឹកថ្ងៃទី២០ ខែតុលានេះ អ្នកគាំទ្ររបស់ Yu Menglong នៅតែបន្តស្វែងរកការពិតពីក្រោយមរណភាពភាពរបស់តារាប្រុសរូបនេះ ខណៈអ្នកគាំទ្រជាង ៥៣៥ ០០០ នាក់បានចូលរួមដាក់ញត្តិចង់បានយុត្តិធម៌ឱ្យអាយដលរបស់ខ្លួន។

សាវតានៃការដាក់ញត្តិនេះ បានកើតឡើងក្រោយពី Yu Menglong បានអញ្ជើញមិត្តភក្តិប្រមាណ ១០នាក់ឱ្យមកទទួលទានអាហារពេលល្ងាចជុំគ្នា មុននឹងតារាប្រុសវ័យ ៣៧ឆ្នាំបានស្លាប់បាត់បង់ជីវិតដោយធ្លាក់ពីលើអាគារមួយកន្លែងក្នុងទីក្រុងប៉េកាំង។ ប៉ុន្មានថ្ងៃបន្ទាប់ពីកើតហេតុ ប៉ូលិសបានប្រកាលលទ្ធផលកោសល្យវិច័យថា តារាប្រុសបានស្លាប់ដោយសារតែធ្លាក់ពីលើអាគារពិតមែន មិនមានជាប់ពាក់ព័ន្ធនឹងឧក្រិដ្ឋកម្មអ្វីបន្ថែមទេ។
ទោះបីជាមានការបកស្រាយពីប៉ូលិស បន្ថែមដោយការបញ្ជាក់ពីម្ដាយរបស់តារាប្រុសរូបនេះទៅហើយក្ដី តែអ្នកគាំទ្រនៅតែមិនជឿជាក់លើលទ្ធផលនៃការស៊ើបអង្កេតនេះ ដោយក្រោយមកក៏មានខ្សែអាត់សំឡេង និងវីដេអូជាច្រើន ដែលអ្នកគាំទ្រជឿជាក់ថាជា “ភស្តុតាង” បានផ្សព្វផ្សាយជាបន្តបន្ទាប់។
ដោយមានហេតុបែបនេះ អ្នកគាំទ្រនៅតែបន្តសង្ស័យថា ការស្លាប់នេះគឺជាអំពើឃាតកម្ម និងដាក់ការសង្ស័យទៅកាន់មិត្តភក្ដិដែលបានចូលរួមទទួលទានអាហារពេលល្ងាចនៅថ្ងៃនោះ។ បន្ថែមពីនេះ អ្នកគាំទ្រក៏បានសង្ស័យទៅលើទីភ្នាក់ងាររបស់ Yu Menglong ផងដែរ ដោយអះអាងថា នេះគឺជាតារាវ័យក្មេងរូបទី ៩ហើយ ដែលបានបាត់បង់ជីវិតក្នុងសោកនាដកម្ម ឬបាត់ខ្លួនយ៉ាងអាថ៌កំបាំង គិតចាប់តាំងពីឆ្នាំ ២០១១ មក។

ការសង្ស័យខាងលើនេះ បាននាំអ្នកគាំទ្រពីជុំវិញពិភពលោកឱ្យមកប្រមូលផ្ដុំគ្នានៅលើវេទិកាតស៊ូមតិ AVAAZ ដើម្បីបើកយុទ្ធនាការណ៍ “Seeking justice for Yu Menglong” ។ គិតត្រឹមព្រឹកថ្ងៃទី២០ ខែតុលា យុទ្ធនាការណ៍ស្វែងរកយុត្តិធម៌នេះមានអ្នកចូលរួមសរុបចំនួន ៥៣៥ ០៣៦នាក់ហើយ។
សេចក្ដីអធិប្បាយអំពីការដាក់ញត្តិនេះបានអះអាងថា ការស្លាប់របស់ Yu Menglong មិនមែនជាឧបទ្ទវហេតុនោះទេ។ ផ្អែកទៅលើ ខ្សែអាត់សំឡេង និងវីដេអូ ដែលអ្នកគាំទ្រជឿជាក់ថាជា “ភស្តុតាង” ទាំងនោះ តារាប្រុសត្រូវបានគេវាយដំ បង្ខំឲ្យផឹកស្រា និងបង្ខំឲ្យប្រើប្រាស់ថ្នាំញៀន មុនពេលដែលលោកត្រូវបានគេសម្លាប់យ៉ាងព្រៃផ្សៃដោយចេតនា។


សេចក្ដីអធិប្បាយបានឱ្យដឹងបន្ថែមថា បើសិនជាការស៊ើបអង្កេតពិតជារកឃើញថា ហេតុការណ៍នេះមានជាប់ពាក់ព័ន្ធនឹងបទឧក្រិដ្ឋកម្មមែន ពួកគេចង់ឱ្យមានការដាក់ទោសទៅលើជនល្មើស និងចង់ឱ្យអាជ្ញាធរពាក់ព័ន្ធចេញមកសុំទោសជាសាធារណៈ។ អ្នកគាំទ្រក៏បានអំពាវនាវឱ្យអាជ្ញាធរ ផ្ដល់ការគាំទ្រផ្នែកច្បាប់ និងផ្លូវចិត្តដល់ក្រុមគ្រួសារសពផងដែរ។
លើសពីការដាក់ញត្តិខាងលើ អ្នកគាំទ្រជាច្រើនរូបទៀត ក៏បានប្រើប្រាស់វិធីសាស្រ្តផ្សេងៗគ្នាក្នុងការស្វែងរកយុត្តិធម៌ឱ្យ Yu Menglong។ ជាក់ស្ដែង អ្នកគាំទ្រនៅតែបន្តប្រើប្រាស់ Hashtag “#JusticeForYuMenglong” នៅលើកម្មវិធី Weibo, X, TikTok និង Instagram ខណៈអ្នកខ្លះបានចាក់បញ្ចាំងរូបភាពរបស់លោកនៅលើផ្ទាំង LED ជាដើម៕



























Account
Security
Favourite Content