នៅថ្ងៃពុធទី១៥ ខែមករានេះ YouTuber រហស្សនាម Sojang ដែលត្រូវបានគេស្គាល់សម្រាប់ការផ្សព្វផ្សាយពាក្យចចាមអារ៉ាមមិនច្បាស់លាស់អំពីតារាកូរ៉េជាច្រើនរូប ត្រូវបានតុលាការស្រុក Incheon កាត់ទោសឱ្យជាប់ពន្ធនាគាររយៈពេល ២ ឆ្នាំ ជាមួយការព្យួរទោសរយៈពេល ៣ ឆ្នាំ។
លើសពីនេះ តុលាការក៏បានបញ្ជាឱ្យ YouTuber អាយុ ៣៦ ឆ្នាំដែលមាននាមត្រកូលថា Park រូបនេះ ត្រូវបង់ប្រាក់ពិន័យចំនួន ២១០ លានវ៉ុន (ប្រមាណ ១៤ ម៉ឺនដុល្លារ) និងអនុវត្តការងារសហគមន៍ចំនួន ១២០ ម៉ោង។
សូមរំឭកថា ចាប់ពីខែតុលា ឆ្នាំ ២០២១ ដល់ខែមិថុនា ឆ្នាំ ២០២៣ Park បានបង្ហោះវីដេអូចំនួន ២៣ អំពីពាក្យចចាមអារ៉ាមទាក់ទងនឹងតារាល្បី ៗ និងអ្នកមានឥទ្ធិពលចំនួន ៧ រូបរួមមានទាំងតារាចម្រៀង Jang Won-young ក្រុម IVE និង Kang Daniel ដែលក្រោយមកនាងត្រូវបានតុលាការចោទប្រកាន់ពីបទបរិហារកេរ្តិ៍។
ពាក្យចចាមអារ៉ាមទាំងនោះរួមមានប្រធានបទរសើបៗដូចជា ការពាក់ព័ន្ធពេស្យាចារ ការវះកាត់កែសម្ផស្ស ឬជីវិតស្នេហារបស់តារាល្បី។ ការស៊ើបអង្កេតបានរកឃើញថាសម្រាប់រយៈពេលពីរឆ្នាំចាប់តាំងពីខែមិថុនាឆ្នាំ ២០២១ Park អាចរកចំណូលបាន ២៥០ លានវ៉ុន ស្មើនឹងប្រមាណ ១៧ ម៉ឺនដុល្លារអាមេរិកពីឆានែល YouTube របស់នាង។
កាលពីឆ្នាំមុន YouTuber រូបនេះធ្លាប់ទទួលការផាកពិន័យជាច្រើនរួមមានការពិន័យជាទឹកប្រាក់ ៣០ លានវ៉ុន (២ម៉ឺនដុល្លារ) សម្រាប់ការបរិហារកេរ្តិ៍ Kang Daniel និង ១០០ លានវ៉ុន (៦៨០០០ ដុល្លារ) សម្រាប់ការបរិហារកេរ្តិ៍ Jang Won-young។ សមាជិកក្រុម BTS V និង Jungkook ក៏បានដាក់ពាក្យបណ្តឹងទាមទារសំណងចំនួន ៩០ លានវ៉ុន (៦១០០០ដុល្លារ) ពី YouTuber រូបនេះផងដែរ ៕