បន្ទាប់ពីបាត់មុខពីឆាកតន្រ្តីអស់រយៈពេល ៦ ឆ្នាំ តារាហុងកុង Andy Lau (លីវ តឺហួ) ក៏បានត្រលប់មកម្ដងទៀត នៅក្នុងការប្រគំតន្ត្រីដ៏ធំដែលរៀបចំឡើងកាលពីពេលថ្មីៗនៅមជ្ឈមណ្ឌល Hong Kong Coliseum ខណៈសំបុត្រចូលទស្សនាគឺលក់ដាច់អស់គ្មានសល់។
ក្រៅពីមិត្តភ័ក្តិអ្នកសិល្បៈជាច្រើនបានចូលរួមគាំទ្រ អ្វីដែលធ្វើឲ្យគ្រប់គ្នាកាន់តែចាប់អារម្មណ៍នោះគឺការបង្ហាញខ្លួនដ៏កម្រម្ដងទៀតរបស់កូនស្រីអាយុ ១២ ឆ្នាំតែមួយគត់របស់លោក ឈ្មោះ Hanna ដែលបាននៅខាងមុខជាមួយម្តាយដើម្បីគាំទ្រការសម្ដែងរបស់ឪពុកដែរ។ ទស្សនិកជនជាច្រើនដែលបានស្ថិតនៅទីនោះបានថតរូបនិងចូលទៅកាន់បណ្ដាញសង្គមដើម្បីចែករំលែកទិដ្ឋភាពដ៏កម្រនៃគ្រួសាររបស់តារារូបនេះ។
គេនៅចាំបានថា លីវ តឺហួ បានរៀបការស្ងាត់ៗជាមួយភរិយាឈ្មោះ Carol Chu ជាជនជាតិចិន-ម៉ាឡេស៊ីនៅ ទីក្រុង Las Vegas សហរដ្ឋអាមេរិកក្នុងឆ្នាំ ២០០៨ ហើយមួយឆ្នាំក្រោយមកទើបបានប្រកាសប្រាប់សាធារណជនពីចំណងអាពាហ៍ពិពាហ៍របស់ខ្លួន ជាការបញ្ចប់ការសង្ស័យជាច្រើនទសវត្សរ៍ជុំវិញស្ថានភាពទំនាក់ទំនងរបស់ពួកគេ។ នៅថ្ងៃទី ៩ ខែឧសភា ឆ្នាំ ២០១២ កូនស្រីរបស់ពួកគេ Hanna ក៏បានកើត។ ទោះបីជាមិនសូវចេញមុខជាសាធារណៈ ប៉ុន្តែម្ដាយនិងកូនស្រីទាំងពីរនាក់បានបង្ហាញការគាំទ្រយ៉ាងពេញទំហឹងចំពោះតារាចម្រៀងនិងសម្តែងវ័យ ៦៣ ឆ្នាំដែលជាស្វាមីនិងឪពុក នៅក្នុងការប្រគំតន្ត្រីនានារបស់លោក។
អ្នកចូលរួមទស្សនាការប្រគំតន្ត្រីបានរៀបរាប់ថា៖ “Hanna ពាក់ម៉ាស ពាក់អាវយឺតពណ៌ស ស្លៀកសំពត់ និងទម្លាក់សក់ចុះក្រោម នាងមើលទៅពេញវ័យច្រើន បើធៀបនឹងពេលដែលគេប្រទះឃើញនាងចូលរួមការប្រគំតន្ត្រីរបស់ប៉ានាងកាលអាយុ ៦ឆ្នាំ។ នាងពិតជាទទួលបានហ្សែនដ៏ល្អរួមបញ្ចូលគ្នាពីឪពុកជាកំពូលតារាចម្រៀងនិងសម្ដែង រួមទាំងម្ដាយដែលជាអតីតបវរកញ្ញា និងតារាម៉ូដែលម៉ាឡេស៊ី” ៕