Youha គឺជាតារាចម្រៀងទោលខេប៉ុបម្នាក់ និងជាអតីតអ្នកហ្វឹកហាត់នៅផលិតកម្ម YG ផងដែរ។ អ្វីដែលធ្វើឲ្យមហាជនភ្ញាក់ផ្អើលមុនបានចេញធ្វើជាតារាចម្រៀងទោល នាងធ្លាប់ហ្វឹកហាត់យ៉ាងតឹងតែងអស់រយៈពេលជាង ១០ ឆ្នាំ។



បច្ចុប្បន្ន Youha គឺជាអ្នកចម្រៀងទោលស្ថិតនៅក្រោមការគ្រប់គ្រងរបស់ផលិតកម្ម Universal Music។ រូបនាងបានបញ្ចេញអាល់ប៊ុមថ្មីរបស់ខ្លួនមានចំណងជើងថា “Flight”។ ក្នុងឱកាសចេញបទចម្រៀងថ្មីរូបនាងបានផ្ដល់បទសម្ភាសន៍ និងនិយាយរៀបរាប់ពីរឿងរ៉ាវមួយចំនួនទាក់ទិនការតស៊ូមុនបានចេញច្រៀងក្រោយហ្វឹកហាត់ក្នុងផលិតកម្ម YG ១០ឆ្នាំ។
នាងបានលើកឡើងថា អំឡុងពេលដែលនាងនៅជាអ្នកហ្វឹកហាត់ នាងរស់នៅជាមួយអ្នកហ្វឹកហាត់ផ្សេងទៀត គេងស្នាក់នៅជាមួយគ្នា។ ស្របពេលដែលនាងឃើញអ្នកហ្វឹកហាត់ជាច្រើនត្រឡប់ទៅផ្ទះជាបន្ដបន្ទាប់។ នាងចាប់ផ្ដើមមានអារម្មណ៍ថា វាមិនមែនជារឿងងាយស្រួលឡើយក្នុងការជាប់ជាសមាជិកក្នុងក្រុម និងចេញច្រៀងជាផ្លូវការក្រោមផលិតកម្ម YG។



នាងធ្លាប់បានហ្វឹកហាត់ជាមួយ Miyeon ដែលជាសមាជិករបស់ក្រុម (G)I-DLE និង Moon Sua របស់ក្រុម Billie។ កាលពីមួយរយៈមុន នាងបានធ្វើការជាមួយក្រុម Billie នាងក៏បានជួប Moon Sua ម្ដងទៀត។ ពួកគេទាំងអស់គ្នាសុទ្ធតែចាកចេញពីផលិតកម្ម YG ទាំង Miyeon, Moon Sua និង Youha តែបច្ចុប្បន្នពួកយើងពិតជាធ្វើបានយ៉ាងល្អ។ Youha បន្តថា ពិតជារីករាយដែលមិត្ដភក្ដិរបស់នាង និងនាងអាចដើរតាមក្ដីសុបិនរបស់ខ្លួនដល់ទីបញ្ចប់។
គួរបញ្ជាក់ថា Youha ចេញមុខជាផ្លូវការដំបូងក្នុងឆ្នាំ ២០២០ ជាមួយក្រុមចម្រៀង “ISLAND” ជាបន្ដបន្ទាប់នាងក៏ប្រឹងប្រែងរហូតក្លាយជាតារាចម្រៀងទោល និងចេញអាល់ប៊ុមថ្មីផ្ទាល់ខ្លួន៕

























Account
Security
Favourite Content