នៅព្រឹក ថ្ងៃទី១៧ ខែមីនានេះ ក្រុមគ្រួសាររបស់តារាចម្រៀងកូរ៉េខាងត្បូង Wheesung ប្រកាសថានឹងនាំយកប្រាក់ដែលទទួលបានពីបុណ្យសពរបស់លោកទាំងអស់ទៅជួយដល់ការងារសង្គម ដោយប្រើឈ្មោះតារាប្រុសរូបនេះជាសប្បុរសជន។

យោងតាម Tajo Entertainment ដែលជាភ្នាក់ងារបស់ Wheesung ប្អូនប្រុសរបស់តារាវ័យ ៤៣ឆ្នាំរូបនេះបានចែករំលែកថា៖ “ចំណូលទាំងអស់ដែលទទួលបាននៅកំលុងពេលបុណ្យសព នឹងយកទៅប្រើប្រាស់ដើម្បីបង្កើតផលវិជ្ជមានដល់សង្គម ក្រោមឈ្មោះ Wheesung។ យើងនឹងពិភាក្សាជាមួយអ្នកជំនាញនៅក្នុងវិស័យនេះ ដើម្បីស្វែងរកមធ្យោបាយ ប្រកបដោយនិរន្តរភាព និងមានន័យបំផុត”។
តំណាងគ្រួសាររូបដដែលនេះ ក៏បានបង្ហាញការដឹងគុណចំពោះភ្ញៀវដែលចូលរួមនៅក្នុងពិធីបុណ្យផងដែរ ថា៖ “កំលុងពិធីបុណ្យសពកាលពីចុងសប្ដាហ៍នេះ មានមិត្តរួមការងារ និងអ្នកគាំទ្រជាច្រើនបានមកកំដរបងប្រុសរបស់ខ្ញុំសម្រាប់ដំណើរចុងក្រោយរបស់គាត់។ នេះវាការផ្ដល់ភាពកក់ក្ដៅ និងធ្វើឱ្យគាត់មានអារម្មណ៍ថា គាត់មិនឯកានោះទេ។ ក្រុមគ្រួសាររបស់យើងបានប្រឹងប្រែងអស់ពីសមត្ថភាព ដើម្បីបង្ហាញការគោរពឲ្យបានត្រឹមត្រូវ ប៉ុន្តែប្រសិនបើមានចំណុចខ្វះខាតណាមួយយើងក៏សុំការយោគយល់ពីអ្នកទាំងអស់គ្នាផងដែរ”។
លោកបន្តថា៖ “មានមនុស្សជាច្រើនមកចូលរួមសម្រាលទុក្ខរបស់ខ្ញុំ ដោយនិយាយថា ពួកគេបានរកឃើញក្ដីសុខ និងភាពរឹងមាំតាមរយៈចម្រៀងរបស់បងខ្ញុំ។ វាធ្វើឱ្យខ្ញុំមានអារម្មណ៍ច្រណែនបន្តិច ដែលបានឃើញមនុស្សមួយចំនួនអាចស្រឡាញ់គាត់ដល់ថ្នាក់នេះ”។

“បើទោះបីជា បងប្រុសខ្ញុំបានជួបនឹងអារម្មណ៍អវិជ្ជមាន និងការឈឺចាប់ ដែលគាត់មិនអាចយកឈ្នះបានដោយងាយៗក្ដី តែគាត់មិនដែលឈប់ប្រឹងប្រែងបង្កើតបទចម្រៀងពីរោះៗ ហើយរក្សាក្ដីស្រឡាញ់ក្នុងការច្រៀងនោះទេ” ប្អូនប្រុសរូបនេះ បាននិយាយដូច្នេះ ដោយសង្ឃឹមថា ការខិតខំក្នុងពេលកន្លងមក និងអាចធ្វើឱ្យស្នាដៃរបស់ Wheesung នៅតែស្ថិតក្នុងការចងចាំរបស់អ្នកស្ដាប់ជារៀងរហូត។
សូមបញ្ជាក់ផងដែរថា Wheesung បានទទួលមរណភាពនៅថ្ងៃទី១០ ខែមីនា ត្រឹមវ័យ ៤៣ឆ្នាំ ដោយមានអ្នកម្ដាយ ជាអ្នកប្រទះឃើញសាកសពនៅក្នុងផ្ទះរបស់គាត់ ឯសង្កាត់ Gwangjin ភាគខាងកើតនៃទីក្រុងសេអ៊ូល។ យ៉ាងណាមិញ មូលហេតុជាក់លាក់ពីក្រោយការស្លាប់នេះ នៅមិនទាន់បានផ្សព្វផ្សាយនៅឡើយទេ៕
























Account
Security
Favourite Content