បន្ទាប់ពីឆក់បេះដូងទស្សនិកជនទូទាំងអាស៊ីតាមរយៈភាពយន្តភាគបុរាណ “The Untamed” កាលពីឆ្នាំ២០១៩ នៅឆ្នាំ២០២៤នេះ ភាពល្បីល្បាញរបស់តារាសម្ដែងប្រុសចិន Wang Yibo បានបន្តលោតឡើងខ្ពស់ជាមួយស្នាដៃភាពយន្តភាគសង្រ្គាមចារកម្ម “War of Faith” និងបានបង្ហាញខ្លួនក្នុងកម្មវិធីបែបផ្សងព្រេង “Exploring The Unknown”។


ជាការពិត Wang Yibo ពេលនេះបានក្លាយជាសិល្បកររកចំណូលបានច្រើនបំផុតនៅក្រោមក្រុមហ៊ុន Yuehua Entertainment ដោយយោងតាមសារព័ត៌មានចិន Up Media តារាវ័យ ២៧ឆ្នាំរូបនេះធ្លាប់រកចំណូលបានប្រហែល ២៩០០ លានដុល្លារតៃវ៉ាន់ (៩០ លានដុល្លារអាមេរិក) សម្រាប់ក្រុមហ៊ុនក្នុងរយៈពេលតែមួយឆ្នាំ ខណៈប្រាក់ចំណូលផ្ទាល់ខ្លួនរបស់លោកឈានដល់ ១៣០០ លានដុល្លារតៃវ៉ាន់ (៤០ លានដុល្លារអាមេរិក)។
នៅពេលបន្តកិច្ចសន្យាថ្មីនៅឆ្នាំ ២០២២ អត្រាកម្រៃជើងសាររបស់ Wang Yibo បានកើនឡើងដល់ ៥៦% ពោលគឺស្ទើរតែ ៥០-៥០ ជាមួយក្រុមហ៊ុន ដែលអាចបង្ហាញថាលោកពិតជាមានឥទ្ធិពលខ្លាំងនៅក្នុងក្រុមហ៊ុននេះ ហើយបើនិយាយថា Wang Yibo គឺជាឃ្លាំងទ្រព្យរបស់ Yuehua ក៏មិនហួសហេតុដែរ។
សម្រាប់ឆមាសទី១ឆ្នាំនេះ តួលេខចំណូលរបស់ Wang Yibo ស្ថិតនៅចំណាត់ថ្នាក់ទីមួយក្នុងចំណោមសិល្បករទាំងអស់ក្នុងក្រុមហ៊ុនដោយអាចសម្រេចបាន ៨៧% ហើយនៃប្រាក់ចំណូលគោលដៅប្រចាំឆ្នាំរបស់ខ្លួន។ បុគ្គលិករបស់ទីភ្នាក់ងារនេះបានបង្ហាញបន្ថែមថា តារារូបនេះមានគម្រោងថតរឿង ចេញបទចម្រៀង និងគម្រោងប្រគំតន្ត្រីនៅឆមាសទីពីរនៃឆ្នាំនេះ ព្រមទាំងបានបដិសេធទាំងស្រុងចំពោះព័ត៌មានដែលនិយាយថា Wang Yibo កំពុងត្រូវបានក្រុមហ៊ុនទុកចោល។
តាមរយៈភាពជោគជ័យនៃភាពយន្តភាគ “War of Faith” ឱកាសទទួលការងារពាណិជ្ជកម្មរបស់ Wang Yibo ក៏កាន់តែប្រសើរឡើងថែមទៀត។ ជាក់ស្ដែងនៅឆ្នាំនេះ លោកបានចុះកិច្ចសន្យាថ្មីជាមួយនឹងម៉ាកយីហោចំនួន ៩ រួមមានទាំង Lacoste, Evisu និង Jimmy Choo ខណៈបានបន្តកិច្ចសន្យាជាមួយម៉ាកយីហោចំនួន ១៣ ផ្សេងទៀត ដែលអាចបញ្ជាក់កាន់តែច្បាស់ឥទ្ធិពល និងកេរ្តិ៍ឈ្មោះដ៏ទូលំទូលាយរបស់លោក ៕



























Account
Security
Favourite Content