Jennie នឹងបង្ហាញខ្លួនក្នុងនាមជាម្ចាស់ផ្ទះសំណាក់ ក្នុងកម្មវិធី “My Name is Gabriel” របស់ JTBC។
តាមរយៈក្រុមការងាររបស់កម្មវិធី Jennie នឹងបង្ហាញខ្លួនចាប់ពីភាគទី ១៣ ដែលនឹងចាក់ផ្សាយនៅថ្ងៃទី២៧ ខែកញ្ញា រហូតដល់ថ្ងៃទី៤ ខែតុលា។ ដំណឹងនេះបានបង្កឱ្យមានភាពរំជើបរំជួលជាខ្លាំងដល់អ្នកគាំទ្ររបស់នាង ព្រោះវាជាឱកាសដ៏កម្រមួយក្នុងការទស្សនាជីវិតប្រចាំថ្ងៃរបស់តារាលំដាប់ពិភពលោកដូចជា Jennie ប្ដូរទៅរស់នៅម្ខាងទៀតនៃពិភពលោកដែលគ្មាននរណាស្គាល់នាង។
សមាជិកក្រុម BLACKPINK រូបនេះនឹងដើរតួជា Maria ដែលជាម្ចាស់ផ្ទះសំណាក់បែបកសិដ្ឋាន ក្នុងភូមិមួយជិតទីក្រុងរ៉ូម នាប្រទេសអ៊ីតាលី។ Jennie និងត្រូវចំណាយពេល ៧២ម៉ោងរស់នៅទីនេះ ជាមួយនឹងតួនាទីសំខាន់ៗមួយចំនួន ដូចជាការទទួលភ្ញៀវ ចម្អិនអាហារ រៀបចំពិធីជប់លៀង និងបង្រៀនធ្វើម្ហូបជាដើម។ ទាំងនេះជាមួយជ្រុងទៀតនៃជីវិតនាង ដែលអ្នកគាំទ្រមិនដែលឃើញកន្លងមក។
ផ្ទាំង poster តួអង្គ Maria ជាមួយបរិយាកាសបែបអ៊ីតាលីរបស់ Jennie ដែលបានចេញផ្សាយរួចទៅហើយ បានទាក់ទាញចំណាប់អារម្មណ៍អ្នកទស្សនាមិនតិចនោះទេ ដោយហេតុថា ទស្សនិកជន និងអ្នកគាំទ្ររបស់នាងកំពុងចាប់ភ្នែកមើល Jennie ថា តើនាងនឹងមានការផ្លាស់ប្ដូរកម្រិតណា ពីអាជីពជាតារា K-pop ទៅជាម្ចាស់ផ្ទះសំណាក់ ៕